ନୂଆଦିଲ୍ଲୀ,୩୦।୮: କେନ୍ଦ୍ର ସରକାର ସରକାରୀ ନିଯୁକ୍ତିରେ ପରିବର୍ତ୍ତନ କରିବା ଲାଗି ଯୋଜନା ପ୍ରସ୍ତୁତ କରୁଛନ୍ତି। ସୂଚନା ମୁତାବକ, ରାଷ୍ଟ୍ରାୟତ୍ତ ଉଦ୍ୟୋଗ ଅଧ୍ୟକ୍ଷ ଏବଂ ଏମ୍ଡି ନିଯୁକ୍ତି କ୍ଷେତ୍ରରେ ଏଭଳି ପରିବର୍ତ୍ତନ ହେବ। ଏଭଳି ପଦକ୍ଷେପ ଦ୍ୱାରା ଟାଲେଣ୍ଟ ପୁଲ୍ର ସମ୍ପ୍ରସାରଣ କରିବାକୁ ସରକାର ଲକ୍ଷ୍ୟ ରଖିଛନ୍ତି। ପବ୍ଲିକ ଏଣ୍ଟରପ୍ରାଇଜ ସିଲେକ୍ସନ ବୋର୍ଡ(ପିଇଏସ୍ବି) ଏ ନେଇ ବିଭିନ୍ନ ପ୍ରସ୍ତାବ ଦେଇଛି। ପୂର୍ବରୁ ବ୍ୟାଙ୍କିଙ୍ଗ କ୍ଷେତ୍ର ଉଚ୍ଚ ପଦପଦବୀଗୁଡିକୁ ପୂରଣ କରିବାରେ ସଂସ୍କାର ଧାରା ଗ୍ରହଣ କରାଯାଇଛି। ବର୍ତ୍ତମାନ ରାଷ୍ଟ୍ରାୟତ୍ତ ଉଦ୍ୟୋଗର ପାଳି ବୋଲି କୁହାଯାଉଛି। କମ୍ପାନୀଗୁଡିକର ସମସ୍ତ ଅଧ୍ୟକ୍ଷ ପଦବୀ ସମେତ ପରିଚାଳନା ନିର୍ଦ୍ଦେଶକ, ମାନବ ସମ୍ବଳ ଏବଂ ଅର୍ଥ ବିଭାଗର ନିର୍ଦ୍ଦେଶକ ଭଳି ପଦବୀ ଲାଗି ବର୍ଷ ଆରମ୍ଭରୁ ସାକ୍ଷାତକାର କରାଯିବାକୁ ପରାମର୍ଶରେ କୁହାଯାଇଛି। ଏଭଳି ସାକ୍ଷାତକାର ଆଧାରରେ ସରକାରଙ୍କୁ ସୁପାରିଶ କରାଯିବ ବୋଲି ଜଣାପଡିଛି। ନିଯୁକ୍ତି ସମୟରେ ବ୍ୟକ୍ତି ବିଶେଷଙ୍କ ପରଫରମାନ୍ସକୁ ଗୁରୁତ୍ୱ ଦିଆଯିବ। ଅଧିକ ସ୍କୋର କରିଥିବା ବ୍ୟକ୍ତି ବିଶେଷଙ୍କୁ ପ୍ରାଥମିକତା ମିଳିବ। ଏକାଥରେ ପଦବୀଗୁଡିକ ଲାଗି ବିଜ୍ଞାପନ ଦିଆଯିବ। ଗୋଟିଏ ପଦବୀ ଲାଗି ଅନ୍ତତଃ ପକ୍ଷେ ୧୬ ଜଣ ଆବେଦନ କରିପାରିବେ। ଏହା ବର୍ତ୍ତମାନ ୧୨ ରହିଛି। ଏହା ସହ ଅନ୍ୟ ପ୍ରସ୍ତାବ ମଧ୍ୟ ରହିଥିବା ଜଣାପଡିଛି।
