ମସ୍କୋ,୧୯।୨ : ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଗୋଟିଏ ବର୍ଷ ଶେଷ ହେବାକୁ ଯାଉଛି। ୨୦୨୨ ଫେବୃଆରୀ ୨୪ ରେ, ରୁଷିଆ ୟୁକ୍ରେନ ଉପରେ ଆକ୍ରମଣ ଆରମ୍ଭ କରିଥିଲା। କେହି ଆଶା କରି ନ ଥିଲେ ଯେ ୟୁକ୍ରେନ ରୁଷିଆ ସାମ୍ନାରେ ଠିଆ ହୋଇପାରିବ ଏବଂ ଏହି ଯୁଦ୍ଧ ଏକ ବର୍ଷ ଧରି ହେବ। ୟୁକ୍ରେନ ସୁପର ପାୱାର ଦେଶଙ୍କ ସହଯୋଗରେ ରୁଷିଆକୁ କଡ଼ା ଟକ୍କର ଦେଉଛି।
ତେବେ ରୁଷିଆ ଉପରେ ଅଧିକ କଟକଣା ହେବ ଲାଗୁ ହେବା ନିଶ୍ଚିତ ହୋଇଛି। ଜି-୭ଦେଶର ବୈଦେଶିକ ମନ୍ତ୍ରୀମାନେ ୟୁକ୍ରେନକୁ ସମର୍ଥନ ଜାରି ରଖିବା ଏବଂ ରୁଷିଆ ଉପରେ ଅଧିକ କଟକଣା ଲାଗୁ କରିବାକୁ ସହମତ ହୋଇଛନ୍ତି। ଏକ ଅନ୍ତର୍ଜାତୀୟ ସୁରକ୍ଷା ସମ୍ମିଳନୀରେ ଆଲୋଚନା ପାଇଁ ଜାପାନ ୧୮ ଫେବୃଆରୀରେ ଜର୍ମାନୀର ମ୍ୟୁନିକରେ ଜି-୭ ବୈଠକ ଆୟୋଜନ କରିଥିଲା।
ଏହି ବୈଠକକୁ ୟୁକ୍ରେନର ବୈଦେଶିକ ମନ୍ତ୍ରୀ ଡିମିତ୍ରୋ କୁଲେବାଙ୍କୁ ମଧ୍ୟ ନିମନ୍ତ୍ରଣ କରାଯାଇଥିଲା। ସେ ଟୁଇଟ କରି କହିଛନ୍ତି, ଜାପାନର ବୈଦେଶିକ ମନ୍ତ୍ରୀ ହାୟାଶି ୟୋସିମାସାଙ୍କ ନିମନ୍ତ୍ରଣରେ ମୁଁ ଜି-୭ ମନ୍ତ୍ରୀସ୍ତରୀୟ ବୈଠକରେ ଯୋଗ ଦେଇଥିଲି। ୨୦୨୩ ରେ ୟୁକ୍ରେନର ବିଜୟ ପାଇଁ ଆମେ ଆବଶ୍ୟକ କରୁଥିବା ସମସ୍ତ ବିଷୟ ଉପରେ ଧ୍ୟାନ ଦେଇଥିଲୁ। ଅସ୍ତ୍ରଶସ୍ତ୍ରର ଶୀଘ୍ର ଯୋଗାଣ ଏବଂ ନୂତନ ପ୍ରତିବନ୍ଧକ ଜାରି ଉପରେ ଆଲୋଚନା ହୋଇଥିଲା। ରୁଷିଆ ହୃଦୟଙ୍ଗମ କରିବା ଉଚିତ ଯେ ଏହାର ଆକ୍ରୋଶର ମୁକାବିଲା କରିବାରେ ଆମେ କ୍ଲାନ୍ତ ହେବୁ ନାହିଁ।
ଏହାକୁ ନେଇ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କ ଚିନ୍ତା ବଢ଼ିବାରେ ଲାଗିଛି।
