ନୂଆଦିଲ୍ଲୀ, ୧୫ା୧୨ (ପି.ଟି.): ବିରାଟ କୋହଲିଙ୍କ ଅନୁପସ୍ଥିତିରେ ଅଜିଙ୍କ୍ୟ ରାହାନେଙ୍କୁ ଅଷ୍ଟ୍ରେଲିଆ ବିପକ୍ଷ ଶେଷ ତିନୋଟି ଟେଷ୍ଟ ମ୍ୟାଚରେ ଭାରତୀୟ ଦଳର ନେତୃତ୍ୱ ନେବାକୁ ପଡ଼ିବ। ଏହାଦ୍ୱାରା ସେ ଚାପରେ ରହିବେ ଏବଂ ତାଙ୍କ ପ୍ରଦର୍ଶନ ଉପରେ ପ୍ରଭାବ ପକାଇବ ବୋଲି ଯାହା କୁହାଯାଉଛି ତାହା ଠିକ ନୁହେଁ ବୋଲି ମହାନ୍ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର କହିଛନ୍ତି। ଆଡିଲେଡ୍ଠାରେ ପ୍ରଥମ ଦିବାରାତ୍ର ଟେଷ୍ଟ ଖେଳି ସାରିବା ପରେ କୋହଲି ପିତୃତ୍ୱ ଛୁଟିରେ ଯିବେ। ରାହାନେ ଏହି ଅବସରରେ ୪ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ଅବଶିଷ୍ଟ ମ୍ୟାଚରେ ଦଳର ନେତୃତ୍ୱ ନେବେ ବୋଲି ଆଶା କରାଯାଉଛି। ଗାଭାସ୍କର କହିଛନ୍ତି, ରାହାନେ ଅତୀତରେ ଯେଉଁ ଦୁଇଥର ଅଧିନାୟକ ଭାର ନେଇଛନ୍ତି ବିଜୟୀ ହୋଇଛନ୍ତି। ତେଣୁ ସେ ଚାପରେ ରହିବା ପ୍ରଶ୍ନ ଉଠୁ ନାହିଁ। ତାଙ୍କ ନେତୃତ୍ୱରେ ଧର୍ମଶାଳାରେ ଅନୁଷ୍ଠିତ ଅଷ୍ଟ୍ରେଲିଆ ବିପକ୍ଷ ମ୍ୟାଚରେ ଭାରତ ବିଜୟୀ ହୋଇଥିଲା। ପୁନଶ୍ଚ ତାଙ୍କ ଅଧିନାୟକତ୍ୱରେ ଭାରତ ଆଫଗାନିସ୍ତାନକୁ ପରାସ୍ତ କରିଥିଲା। ରାହାନେଙ୍କୁ ବର୍ତ୍ତମାନ କେବଳ ୩ଟି ଟେଷ୍ଟ ମ୍ୟାଚରେ କାମଚଳା ଅଧିନାୟକ ଦାୟିତ୍ୱ ତୁଲାଇବାକୁ ପଡ଼ିବ। ରାହାନେଙ୍କ ନେତୃତ୍ୱରେ ଦୁଇଟି ଓ୍ବାର୍ମଅପ୍ ମ୍ୟାଚ ମଧ୍ୟ ଡ୍ର ଭାବେ ଶେଷ ହୋଇଛି।