ଭୁବନେଶ୍ୱର,୮।୧୨ (ବ୍ୟୁରୋ): ଅଭିନେତ୍ରୀ ବର୍ଷା ପ୍ରିୟଦର୍ଶିନୀ ଚାକିରି ଦେବାକୁ କହି ଜଣେ ମହିଳାଙ୍କୁ ୩୦ ହଜାର ଟଙ୍କା ଠକିବା ଅଭିଯୋଗକୁ ନେଇ ଚର୍ଚ୍ଚା ସୃଷ୍ଟି ହୋଇଛି। ହେଲେ ବର୍ଷା ଏହି ଅଭିଯୋଗକୁ ଖଣ୍ଡନ କରିବା ସହ ଘଟଣା ସଂକ୍ରାନ୍ତରେ ବୁଧବାର ଭୁବନେଶ୍ୱର ଡିସିପି ପ୍ରତୀକ ସିଂଙ୍କୁ ଭେଟି ତାଙ୍କ ନାଁରେ ମିଥ୍ୟା ଅଭିଯୋଗ ହୋଇଥିବା କହିଛନ୍ତି। ତେବେ ସମସ୍ତ ପ୍ରମାଣ ତଦନ୍ତକାରୀ ଅଧିକାରୀଙ୍କୁ ଦେବାକୁ ବର୍ଷାଙ୍କୁ ଡିସିପି ସିଂ କହିଛନ୍ତି। ଏଥିସହ ବର୍ଷା ତାଙ୍କ ଫେସ୍ବୁକ୍ ପେଜ୍ରେ ସ୍ପଷ୍ଟୀକରଣ ଦେଇ କହିଛନ୍ତି, ମୋ ନାଁରେ ଯେଉଁମାନେ ଷଡ଼ଯନ୍ତ୍ର କରିଛନ୍ତି, ସେମାନଙ୍କ ବିରୋଧରେ ଆଇନର ଦ୍ୱାରସ୍ଥ ହେବି। ଶହୀଦନଗର ଥାନାରେ ସତ୍ୟକାଳୀ ବସ୍ତିରେ ରହୁଥିବା କଲ୍ୟାଣୀ ନାମ୍ନୀ ମହିଳା ବର୍ଷାଙ୍କ ନାମରେ ଉକ୍ତ ଠକେଇ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ୪ ମାସ ତଳେ ଜନତା ମଇଦାନରେ ବର୍ଷାଙ୍କୁ ଭେଟିଥିଲେ କଲ୍ୟାଣୀ। ହେଲେ ବର୍ଷା ସମୟ ନ ଥିବା କହିବା ସହ ସାଙ୍ଗରେ ଥିବା ସହଯୋଗୀ ଆୟୁଷୀ ପ୍ରିୟଦର୍ଶିନୀଙ୍କ ସହ କଥା ହେବାକୁ କଲ୍ୟାଣୀଙ୍କୁ କହିଥିଲେ। ପରବର୍ତ୍ତୀ ସମୟରେ ଆୟୁଷୀ କଲ୍ୟାଣୀଙ୍କୁ ଏକ ପ୍ରତିଷ୍ଠିତ ସୁନା ଦୋକାନରେ ଚାକିରି କରାଇ ଦେବାକୁ କହିବା ସହ ଏଥିପାଇଁ ବର୍ଷାଙ୍କ ଆକାଉଣ୍ଟଙ୍କୁ ଟଙ୍କା ପଠାଇବାକୁ କହିଥିଲେ। ଗତ ଜୁଲାଇ ୨୭ରେ ବର୍ଷାଙ୍କ ଆକାଉଣ୍ଟକୁ କଲ୍ୟାଣୀ ୩୦ ହଜାର ପଠାଇଥିଲେ। ଚାକିରି ନ ଦେବାରୁ ସେ ହାଇକକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ମାମଲା ରୁଜୁ କରି ତଦନ୍ତ କରିବାକୁ କୋର୍ଟଙ୍କ ପକ୍ଷରୁ ଶହୀନଗର ଥାନାକୁ ଚିଠି ଆସିଥିଲା। ପରେ ପୋଲିସ ବର୍ଷା, ସହଯୋଗୀ ଆୟୁଷୀ ଓ ଜଣେ ସୁନା ଦୋକାନୀଙ୍କ ନାଁରେ ମାମଲା (ନଂ ୫୬୫/୨୨) ରୁଜୁ କରିଛି। ଥାନାଧିକାରୀ ମନୋଜ କୁମାର ଶତପଥୀ କହିଛନ୍ତି, ଭୁଲ୍ରେ ଟଙ୍କା ଆସିଥିବା ଭାବି ଉକ୍ତ ଆକାଉଣ୍ଟକୁ ୩୦ ହଜାର ଟଙ୍କା ଫେରାଇ ଦେଇଥିବାର ଟ୍ରାଞ୍ଜାକ୍ସନ ଦସ୍ତାବିଜ୍ ବର୍ଷା ଦେଇଛନ୍ତି। ମାମଲାର ସତ୍ୟତା ଜାଣିବାକୁ ଅଧିକ ତଦନ୍ତ କରାଯାଉଥିବା ସେ କହିଛନ୍ତି।