ନୂଆଦିଲ୍ଲୀ,୨୯।୧୧: ବର୍ଷର ଶେଷ ମାସ ଅର୍ଥାତ ଡିସେମ୍ବରରୁ ଅନେକ ପରିବର୍ତ୍ତନ ହେବାକୁ ଯାଉଛି। ଏଲ୍ପିଜି ଗ୍ୟାସ ସିଲିଣ୍ଡରଠାରୁ ଆରମ୍ଭ କରି ଅନ୍ଲାଇନ୍ ଟ୍ରାନ୍ଜାକ୍ସନ ଉପରେ ଏହି ପରିବର୍ତ୍ତନ ହେବ।
ପ୍ରତି ମାସ ପହିଲାରେ ଏଲ୍ପିଜି ଗ୍ୟାସ ସିଲିଣ୍ଡର ଦାମରେ ପରିବର୍ତ୍ତନ କରାଯାଇଥାଏ। ଏଣୁ ଡିସେମ୍ବର ପହିଲାରୁ ଗ୍ରାହକଙ୍କୁ ନୂତନ ଦାମ ଦେବାକୁ ପଡ଼ିପାରେ।
ଡିସେମ୍ବର ୧ରୁ ରିଅଲ ଟାଇମ୍ ଗ୍ରସ ସେଟଲମେଣ୍ଟ ସିଷ୍ଟମ(ଆର୍ଟିଜିଏସ୍) ସମ୍ପର୍କିତ ଏକ ନିୟମରେ ପରିବର୍ତ୍ତନ ହେବାକୁ ଯାଉଛି। ଡିଜିଟାଲ ନେଣଦେଣକୁ ପ୍ରୋତ୍ସାହିତ କରିବାକୁ ଯାଇ ଆର୍ବିଆଇ ଆର୍ଟିଜିଏସ୍ ସେବାକୁ ନିରନ୍ତର ଉପଲବ୍ଧ କରାଇବାକୁ ନିଷ୍ପତ୍ତି ନେଇଛି। ଏଥିଯୋଗୁ ଗ୍ରାହକମାନେ ଏବେ ଆର୍ଟିଜିଏସ୍ ଜରିଆରେ ଟଙ୍କା ନେଣଦେଣ କରିପାରିବେ। ପୂର୍ବରୁ ଏହା ନ ଥିଲା।
ପୂର୍ବରୁ ବୀମା କିସ୍ତି ଠିକ୍ ଭାବେ ନ ଭରିଲେ ଲାଭ ମିଳି ନଥାଏ। ଏପରିକି ପଲିସିକୁ କମ୍ପାନୀ ବନ୍ଦ କରିଦେଉଥିଲା। ହେଲେ ଏବେ ବୀମା କିସ୍ତି ଦେବାକୁ ଅସମର୍ଥ ହୋଇଥିଲେ ହେଁ ପଲିସି ବନ୍ଦ ହେବ ନାହିଁ। କାରଣ ନୂଆ ବ୍ୟବସ୍ଥାନୁଯାୟୀ ୫ ବର୍ଷ ପରେ ପଲିସିଧାରକ କିସ୍ତିର ପରିମାଣ ୫୦% କମ୍ କରିପାରିବେ। ଏଣୁ ଅଧା କିସ୍ତି ଦେଇ ପଲିସି ଜାରି ରଖିପାରିବେ।
ରେଳ ବିଭାଗ ପକ୍ଷରୁ କିଛି ପରିବର୍ତ୍ତନ କରାଯାଇ ଡିସେମ୍ବରରୁ କିଛି ନୂଆ ଟ୍ରେନ ଚାଲିବାକୁ ନିଷ୍ପତ୍ତି ନିଆଯାଇଛି। ଏଥିରେ ଝେଲମ୍ ଏକ୍ସପ୍ରେସ୍ ଏବଂ ପଞ୍ଜାବ ମେଲ ସାମିଲ ରହିଛି।
