ଜମନକିରା,୧୪ା୫(ଡି.ଏନ.ଏ.): ମାଲିକଙ୍କୁ ନ ଜଣାଇ ରାତାରାତି ଖୋଳିଦିଆଯାଉଛି ଚାଷଜମି। ଜମନକିରା ବ୍ଲକ ଅଞ୍ଚଳରେ ଓସିସି (ଓଡ଼ିଶା କନଷ୍ଟ୍ରକଶନ କମ୍ପାନୀ)ର ଏଭଳି ମନମୁଖୀ କାର୍ଯ୍ୟକୁ ଚାଷୀମାନେ ବିରୋଧ କରିବା ସହ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସୂଚନା ଅନୁସାରେ, ଜମନକିରା ବ୍ଲକ ଫାଶୀମାଲ ପଞ୍ଚାୟତ ଅନ୍ତର୍ଗତ ପୁକୁଡା, ଦେହୁରିନିମାଲ, ଫାଶିମାଲ, ତିଲେଇମାଲ ଆଦି ଗ୍ରାମଗୁଡ଼ିକୁ ସରକାର କୃଷିଭିତ୍ତିକ ଉନ୍ନତି ପାଇଁ କ୍ଷୁଦ୍ର ଜଳସେଚନ ବିଭାଗ କୁଚିଣ୍ଡା ପକ୍ଷରୁ ଓସିସିକୁ ଠିକା ଦିଆଯାଇଛି। ହେଲେ ଓସିସି କର୍ମଚାରୀ ଚାଷୀଙ୍କ ବିନା ଅନୁମତିରେ ଚାଷଜମିରେ ୮ରୁ ୧୦ଫୁଟ ଗାଢ଼ କରି ପାଇପ୍ଲାଇନ୍ ବିଛାଉଛନ୍ତି। ଏହା ଦ୍ୱାରା କ୍ଷେତରେ ଟ୍ରାକ୍ଟର କିମ୍ବା ପାୱାରଟିଲର ପଶିବା ଅସମ୍ଭବ ହେବ ବୋଲି ଚାଷୀମାନେ ଅନୁଭବ କରୁଛନ୍ତି। ଏ ନେଇ ପ୍ରଶାସନକୁ ଅବଗତ କରିଥିଲେ ମଧ୍ୟ ସୁଫଳ ମିଳୁ ନ ଥିବା ଅଞ୍ଚଳର ଚାଷୀମାନେ ଗଣମାଧ୍ୟମକୁ କହିଛନ୍ତି। ଠିକାସଂସ୍ଥାର ଏଭଳି କାମ ବିରୋଧରେ ଆନ୍ଦୋଳନ କରାଯିବ ବୋଲି ଚାଷୀ ସଂଗଠନ ପକ୍ଷରୁ କୁହାଯାଇଛି। ଏ ସମ୍ପର୍କରେ କୁଚିଣ୍ଡାଠାରେ ଅବସ୍ଥାପିତ କ୍ଷୁଦ୍ର ଜଳସେଚନ ବିଭାଗ ସହକାରୀ ଯନ୍ତ୍ରୀ ସୌଦାମିନୀ କିଷାନଙ୍କୁ ପଚାରିବାରୁ ସେ କହିଥିଲେ, ଏହା କେନ୍ଦ୍ର ସରକାରଙ୍କ ଦ୍ୱାରା ପରିଚାଳିତ ଜଳସେଚନ ବିଭାଗ ପକ୍ଷରୁ ଓସିସି ଦ୍ୱାରା କାର୍ଯ୍ୟ କରାଯାଉଛି। ତେବେ ଚାଷୀଙ୍କ ମତାମତ ନେଇ ଏହା କରିବା କଥା ବୋଲି ସେ କହିଥିଲେ। ସେହିପରି ଓସିସି ସୁପରଭାଇଜର ଭଗବତ ମଲ୍ଲିକ କହନ୍ତି, ଗାଁର ମୁଖିଆଙ୍କୁ ପଚାରି ଏହି କାମ କରୁଛୁ। ଯଦି ସେଭଳି ଅଭିଯୋଗ ହେଉଛି ତା’ହେଲେ ସମ୍ପୃକ୍ତ ଜମି ମାଲିକଙ୍କୁ ପଚାରି କାମ କରିବୁ ବୋଲି କହିଥିଲେ।