ନୂଆଦିଲ୍ଲୀ,୪।୧୦: ଉତ୍ତରପ୍ରଦେଶର ଲକ୍ଷ୍ମୀପୁର ଖେରୀ ହିଂସା ପରେ ଘଟଣାସ୍ଥଳକୁ ଯାଉଥିବା କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରଙ୍କୁ ନଜରବନ୍ଦୀ କରାଯାଇଛି। ସୋମବାର କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀ ପ୍ରିୟଙ୍କାଙ୍କୁ ଉପଦେଶ ଦେଇ କହିଛନ୍ତି,ସେମାନେ ତୁମ ସାହସକୁ ଭୟ କରୁଛନ୍ତି, କିନ୍ତୁ ତୁମେ ପଛକୁ ଫେରିବେ ନାହିଁ। ରାହୁଲ ଗାନ୍ଧୀ ଟୁଇଟ୍ କରି କହିଛନ୍ତି, ପ୍ରିୟଙ୍କା, ମୁଁ ଜାଣେ ତୁମେ ପଛଘୁଞ୍ଚା ଦେବ ନାହିଁ – ସେମାନେ ତୁମର ସାହସକୁ ଭୟ କରୁଛନ୍ତି। ନ୍ୟାୟ ପାଇଁ ଏହି ଅହିଂସା ସଂଗ୍ରାମରେ ଆମେ ଦେଶର ଅନ୍ନଦାତାଙ୍କୁ ଜିତାଇକି ରହିବା। ସେହିପରି କଂଗ୍ରେସ ମୁଖପାତ୍ର ରଣଦୀପ ସୁରଜେୱାଲା କହିଛନ୍ତି ଯେ, ପ୍ରିୟଙ୍କା ଗାନ୍ଧୀଙ୍କ ଗିରଫଦାରୀ ତଥା ଆନ୍ଦୋଳନ କୃଷକଙ୍କ ନ୍ୟାୟର ପ୍ରତିଧ୍ୱନୀକୁ ଆହୁରି ଦୃଢ କରିବ।
ସୂଚନାଯୋଗ୍ୟ, ଲକ୍ଷ୍ମୀପୁର ଖେରୀର ଟିକୋନିଆ ଅଞ୍ଚଳରେ ହୋଇଥିବା ହିଂସା ପରେ ୮ ଜଣଙ୍କର ମୃତ୍ୟୁ ଘଟିଥିଲା। ସୋମବାର ସକାଳେ ଘଟଣାସ୍ଥଳକୁ ଯାଉଥିବା ପ୍ରିୟଙ୍କା ଗାନ୍ଧୀ ଭଦ୍ରଙ୍କୁ ସୀତାପୁରରେ ଅଟକ ରଖାଯାଇଥିଲା। ପ୍ରିୟଙ୍କା ଏବଂ କଂଗ୍ରେସ ରାଜ୍ୟ ସଭା ସଦସ୍ୟ ଦୀପେନ୍ଦ୍ର ହୁଡାଙ୍କ ସମେତ କେତେକ ବରିଷ୍ଠ ନେତା ଲକ୍ଷ୍ମୀପୁର ଖେରୀ ଅଭିମୁଖେ ଯାଉଥିଲେ। ଏହି ସମୟ ମଧ୍ୟରେ ଅଖିଳେଶ ଯାଦବ, ଶିବପାଲ ଯାଦବ, ରାମ ଗୋପାଳ ଯାଦବ, ସଞ୍ଜୟ ସିଂଙ୍କ ସମେତ ସମସ୍ତ ନେତାଙ୍କୁ ଲକ୍ଷ୍ମପୁର ଯିବାକୁ ଜିଦ ଧରିଥିବାବେଳେ ପୋଲିସ ମଧ୍ୟ ସେମାନଙ୍କୁ ଅଟକ ରଖିଛି।