ନୂଆଦିଲ୍ଲୀ,୪।୧୨: କଂଗ୍ରେସ ନେତା ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରାର ଏକ ଭିଡିଓ ପୋଷ୍ଟ କରିଛି। ରାହୁଲ ଗାନ୍ଧୀ ଭିଡିଓରେ କହିଛନ୍ତି, ଯେତେବେଳେ ମୁଁ ରାଜନୀତିରେ ପ୍ରବେଶ କଲି, ୨୦୦୮-୦୯ ପର୍ଯ୍ୟନ୍ତ, ଦେଶର ସମସ୍ତ ଗଣମାଧ୍ୟମ ମୋତେ ୨୪ ଘଣ୍ଟା ‘ବାଃ-ବାଃ’ କରୁଥିଲେ। ତା’ପରେ ମୁଁ ଦୁଇଟି ପ୍ରସଙ୍ଗ ଉଠାଇଲି ଏବଂ ସବୁକିଛି ବଦଳିଗଲା। ସେଥିମଧ୍ୟରୁ ଗୋଟିଏ ନିୟମଗିରି ଏବଂ ଅନ୍ୟଟି ଭଟ୍ଟା ପାରସୌଲ। ମୁଁ ଗରିବ ଲୋକଙ୍କ ଅଧିକାର ରକ୍ଷା କରିବା ଆରମ୍ଭ କଲି, ସେତେବେଳେ ପୁରା ମିଡିଆ ମୋ ଉପରେ ଲେଖିବା ଆରମ୍ଭ କଲା।
ରାହୁଲ ଗାନ୍ଧୀ ଆହୁରି ମଧ୍ୟ କହିଛନ୍ତି, ଭାରତର ସମ୍ପତ୍ତି ଯାହା ମୂଳତଃ ମହାରାଜାଙ୍କର ଥିଲା, ତାହା ସମ୍ବିଧାନ ମାଧ୍ୟମରେ ଜନସାଧାରଣଙ୍କୁ ଦିଆଯାଇଥିଲା, କିନ୍ତୁ ଭାଜପା ଏହାର ବିପରୀତ କାର୍ଯ୍ୟ କରୁଛି। ଭାଜପା ସେହି ସମ୍ପତ୍ତିଗୁଡ଼ିକୁ ମହାରାଜାଙ୍କୁ ଫେରାଇ ଦେଉଛି। ମୋ ଭାବମୂର୍ତ୍ତିକୁ ଖରାପ କରିବା ପାଇଁ ଭାଜପା ହଜାର ହଜାର କୋଟି ଟଙ୍କା ଖର୍ଚ୍ଚ କରିଛି, କିନ୍ତୁ ତାହା କାମ କରୁନାହିଁ। ମୋ ଭାବମୂର୍ତ୍ତିକୁ ଖରାପ କରିବା ପାଇଁ ସେମାନେ ଯେତେ ଅଧିକ ଖର୍ଚ୍ଚ କରନ୍ତି, ସେମାନେ ମୋତେ ଅଧିକ ଶକ୍ତି ଦିଅନ୍ତି କାରଣ ସତ୍ୟକୁ ଲୁଚାଇ ଦିଆଯାଇପାରିବ ନାହିଁ। ଯେତେବେଳେ ଏକ ବଡ଼ ଶକ୍ତିର ସହିତ ତୁମେ ଯୁଦ୍ଧ କରିବ, ତୁମକୁ ବ୍ୟକ୍ତିଗତ ଭାବେ ଆକ୍ରମଣ କରାଯିବ। ସେଥିପାଇଁ ମୁଁ ଜାଣେ ମୁଁ ସଠିକ ରାସ୍ତାରେ ଅଛି।
ସୂଚନାଯୋଗ୍ୟ, ରାହୁଲ ଗାନ୍ଧୀ ନିୟମଗିରି ଜମି ଅଧିଗ୍ରହଣକୁ ବିରୋଧ କରିଥିଲେ ଏବଂ ଏହାକୁ ବେଆଇନ ବୋଲି କହିଥିଲେ। ଏହା ବ୍ୟତୀତ ୨୦୧୧ରେ ଉତ୍ତରପ୍ରଦେଶର ଭଟ୍ଟା ପାରସୌଲଠାରେ ଜମି ଅଧିଗ୍ରହଣକୁ ନେଇ ବଡ଼ ଧରଣର କୃଷକଙ୍କ ବିରୋଧ ଦେଖିବାକୁ ମିଳିଥିଲା। ତତ୍କାଳୀନ ମାୟାବତୀ ସରକାର ବିରୋଧରେ କୃଷକଙ୍କ ବିରୋଧ ପ୍ରଦର୍ଶନରେ ରାହୁଲ ଗାନ୍ଧୀ ଅଂଶଗ୍ରହଣ କରିଥିଲେ।