ଭୁବନେଶ୍ୱର,୭।୬(ବ୍ୟୁରୋ): ରାଜଧାନୀରେ ଦିନକୁ ଦିନ ବିଭିନ୍ନ ଚୋର ଗ୍ୟାଙ୍ଗ ସକ୍ରିୟ ହୋଇଉଠିଥିବା ବେଳେ କମିଶନରେଟ ପୋଲିସ ପକ୍ଷରୁ କଡ଼ା ଯାଞ୍ଚ ଓ ଚଢ଼ାଉ କରି ଅନେକ ଗ୍ୟାଙ୍ଗର ସଦସ୍ୟମାନଙ୍କୁ ଧରିବାରେ ସଫଳ ହୋଇଛି। ନିକଟରେ ଡକାୟତି କରୁଥିବା ବାଓ୍ବରିଆ ଗ୍ୟାଙ୍ଗର କେତେଜଣ ସଦସ୍ୟକୁ ପୋଲିସ ଧରିଥିବା ବେଳେ ସୋମବାର ପୁଣି ଏକ ଲୁଟେରା ଗ୍ୟାଙ୍ଗ ଏରାଗୁଲାର ୨ସଦସ୍ୟଙ୍କୁ ହାଇଟେକ୍ ଛକରୁ ଗିରଫ କରିଛି। ସେମାନେ ହେଲେ ଗଞ୍ଜାମ ଜିଲା ଆସ୍କା ଥାନା ଅନ୍ତର୍ଗତ ଠେଙ୍ଗାପାଲି ଗ୍ରାମର ଏମ୍. ଚକ୍ରବର୍ତ୍ତୀ ଓ ଏ. ନବୀନ। ସେମାନଙ୍କଠାରୁ ୮ଟି ମୋବାଇଲ ଫୋନ, ଚୋରା ବାଇକ୍ ଏବଂ ନଗଦ ଦେଢ ଲକ୍ଷ ଟଙ୍କା ଜବତ ହୋଇଛି। ଯାଞ୍ଚବେଳେ ଏହି ଗ୍ୟାଙ୍ଗର ସଦସ୍ୟମାନେ ଚୋରା ବାଇକ୍ରେ ଭୁବନେଶ୍ୱରର ବିଭିନ୍ନ ସ୍ଥାନରେ ଲୁଟ୍, ଛିନ୍ତାଇ କରିବା ପରେ ଅନ୍ୟ ରାଜ୍ୟକୁ ଫେରାର ହୋଇଯାଉଥିବା ଜଣାପଡ଼ିଥିଲା। ଅଭିଯୁକ୍ତଦ୍ୱୟଙ୍କ ଆନ୍ତଃରାଜ୍ୟ ଲିଙ୍କ୍ ଥିବାବେଳେ ଗଞ୍ଜାମ ଓ ଯାଜପୁରରେ ରହି ଅପରାଧର କାର୍ଯ୍ୟକଳାପ ଅପରେଟ କରିଥାନ୍ତି। ତେଣୁ ଏହି ଗ୍ୟାଙ୍ଗରେ ଥିବା ଅନ୍ୟ ସଦସ୍ୟଙ୍କୁ ଖୁବ୍ଶୀଘ୍ର ଧରିବା ସହ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଙ୍ଗଳବାର ଖବରଦାତା ସମ୍ମିଳନୀରେ ଡିସିପି ପ୍ରତୀକ ସିଂ ସୂଚନା ଦେଇଛନ୍ତି।
ବିଶେଷକରି ବ୍ୟାଙ୍କରୁ ଟଙ୍କା ଉଠାଇ ଫେରୁଥିବା ଓ ଡିପୋଜିଟ କରିବାକୁ ଯାଉଥିବା ଗ୍ରାହକଙ୍କୁ ଟାର୍ଗେଟ କରିଥାନ୍ତି। ପରେ ଏମାନଙ୍କ ଭିତରୁ ଜଣେ ଦୁଇଜଣ ବ୍ୟାଙ୍କ ଭିତରେ ରହି ଟଙ୍କା ଉଠାଉଥିବା ବ୍ୟକ୍ତିଙ୍କ ଉପରେ ନଜର ରଖି ବାହାରେ ଥିବା ଗ୍ୟାଙ୍ଗର ଅନ୍ୟମାନଙ୍କୁ ଖବର ଜଣାନ୍ତି। ଫଳରେ ସେମାନେ ଉକ୍ତ ବ୍ୟକ୍ତିଙ୍କୁ ପିଛା କରିବା ସହ ରାସ୍ତାରେ ଟଙ୍କା ପକାଇ କିମ୍ବା ଅନ୍ୟମନସ୍କ କରାଇ ଟଙ୍କା ବ୍ୟାଗକୁ ଲୁଟ୍ କରିନିଅନ୍ତି। ଏପରିକି ଛୁରି, ଖଣ୍ଡା, ଭୁଜାଲି ଭଳି ମାରଣାସ୍ତ୍ର ବ୍ୟବହାର କରି ଚୋରି, ଛିନ୍ତାଇ, ଲୁଟ୍ପାଟ କରନ୍ତି। ଲୁଟ୍ ପରେ ସେମାନେ ବାହାର ରାଜ୍ୟକୁ ଯାଇ ଉକ୍ତ ଚୋରା ସାମଗ୍ରୀକୁ ସେଠାରେ ବିକି ପୁଣି ଓଡ଼ିଶା ଫେରିଆସନ୍ତି। ଯଥା ପଶ୍ଚିମବଙ୍ଗ, ଆସାମ, ବେଙ୍ଗାଲୁରୁ, ଚେନ୍ନାଇ ଆଦି ରାଜ୍ୟରେ ବିକ୍ରି କରୁଥିବା ଜଣାପଡିଛି। ତେବେ ଏଭଳି ଅଧିକ ଅଭିଯୋଗ ହେବା ପରେ ପୋଲିସ ତଦନ୍ତ ବେଳେ କେତେଜଣ ଅଭିଯୁକ୍ତଙ୍କୁ ଚିହ୍ନଟ କରି ଖୋଜୁଥିଲା। ୨ଦିନ ତଳେ ଉପରୋକ୍ତ ୨ଅଭିଯୁକ୍ତ ହାଇଟେକ ଛକ ନିକଟରେ ଲୁଟ୍ ପାଇଁ ଷଡ଼ଯନ୍ତ୍ର କରୁଥିବା ବେଳେ ପୋଲିସ ଚଢ଼ାଉ କରି ଧରିଥିଲା। ଅଭିଯୁକ୍ତଦ୍ୱୟକୁ ଥାନାକୁ ଆଣି ପଚରାଉଚରା ବେଳେ ଆନ୍ତଃରାଜ୍ୟ ର଼୍ୟାକେଟ ଚଲାଇବା ସହ ତାଙ୍କ ହ୍ବାଟସଆପକୁ ବାହାର ରାଜ୍ୟର ଲୋକଙ୍କ ମେସେଜ ଆସୁଥିଲା। କେଉଁ ପ୍ରକାର ଦାମୀ ମୋବାଇଲ ଅଛି ଏବଂ ତାହା କେତେ ଟଙ୍କାରେ ବିକ୍ରି କରିବ ଡିମାଣ୍ଡ କରୁଥିବା ତଦନ୍ତ ବେଳେ ପୋଲିସ ଜାଣିବାକୁ ପାଇଛି। ଏହି ୨ ଅଭିଯୁକ୍ତଙ୍କ ନାମରେ କଟକ-ଭୁବନେଶ୍ୱରର ବିଭିନ୍ନ ଥାନାରେ ୮ ମାମଲା ରହିଛି। ସେହିପରି ୨୦୨୧ରେ ମଧ୍ୟ କମିଶନରେଟ ପୋଲିସ ଏରାଗୁଲା ଗ୍ୟାଙ୍ଗର ୮ ଜଣଙ୍କୁ ଗିରଫ କରି କୋର୍ଟଚାଲାଣ କରିଥିଲା।