କୋରାପୁଟ,୨୧ା୨(ଅମିତାଭ ବେହେରା): କୋରାପୁଟ ତହସିଲଦାରଙ୍କ ୟୁଜର ଆଇଡି ଓ ପାସୱାର୍ଡକୁ ହ୍ୟାକ କରି ଜାଲ ପ୍ରମାଣପତ୍ର ଦେଇ ବିଭିନ୍ନ ବ୍ୟକ୍ତିଙ୍କଠାରୁ ଟଙ୍କା ହଡପ ଘଟଣାରେ ଜଣେ ଅଭିଯୁକ୍ତଙ୍କୁ କୋରାପୁଟ ସାଇବର ପୋଲିସ ଗିରଫ କରିଛି। ଅଭିଯୁକ୍ତ ହେଲେ ଖୋର୍ଦ୍ଧା ଜିଲା ଟାଙ୍ଗି ଥାନା ଅଞ୍ଚଳର ଗଣେଷ ବେହେରା(୧୯)। ତାଙ୍କଠାରୁ ଲ୍ୟାପ୍ଟପ୍, କମ୍ପ୍ୟୁଟର ମନିଟର, ବହୁ ସିମ୍, ଭୋଟର କାର୍ଡ, ଆଧାରକାର୍ଡ ଓ ଜାଲ ପ୍ରମାଣପତ୍ର ଜବତ କରାଯାଇଥିବା ସାଇବର ଥାନା ଅଧିକାରୀ ଭବାନୀ ପ୍ରଧାନ ସୂଚନା ଦେଇଛନ୍ତି।
୨୦୨୪ ଅଗଷ୍ଟ ୨୨ରେ କୋରାପୁଟ ତହସିଲଦାର ସାଇବର ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ପୋଲିସ ଏକ ମାମଲା(ନଂ ୧୧/୨୪) ରୁଜୁ କରି ତଦନ୍ତ ଆରମ୍ଭ କରିଥିଲା।
ପୋଲିସ ତଦନ୍ତ ପରେ ୩ଟି ମୋବାଇଲ, ଗୋଟିଏ ଲ୍ୟାପ୍ଟପ୍, ଦୁଇଟି କମ୍ପ୍ୟୁଟର ମନିଟର, ଗୋଟିଏ ସିପିୟୁ, ୨ଟି ସିମ, ୨ଟି ଏଟିଏମ୍ କାର୍ଡ, ୨୬ ନଂ ଜାଲ ଆଧାରକାର୍ଡ, ମନୋଜ କୁମାର ବେହେରାଙ୍କ ନାମରେ ୨ଟି ପାନକାର୍ଡ, ୩ଟି ଜାଲ ପାନକାର୍ଡ କାଗଜ, ୬ଟି ଭୋଟର କାର୍ଡ, ଜାଲ ରାଶନ କାର୍ଡ ଓ ୫ଟି ପାସବୁକ ଆଦି ଜବତ କରିଛି। ଗଣେଷ ତାଙ୍କ ଭାଇ ମନୋଜଙ୍କୁ ନେଇ ସର୍ଭିସ ପ୍ଲସ ପୋର୍ଟାଲ ଖୋଲି ଜାଲ ଜାତିଗତ ପ୍ରମାଣପତ୍ର, ଲିଗାଲ ପ୍ରମାଣପତ୍ର, ଜାଲ ପ୍ରମାଣପତ୍ର ଓ ବିଭିନ୍ନ ପ୍ରମାଣପତ୍ର ପ୍ରସ୍ତୁତ କରି ହିତାଧିକାରୀଙ୍କୁ ଦେଇ ଜଣଙ୍କଠାରୁ ୧୧୨୫ ଟଙ୍କା ଓ ବ୍ୟାପକ ଟଙ୍କା ଠକେଇ କରୁଥିବା ନେଇ କୋରାପୁଟ ତହସିଲଦାର ଓ ଜିଲାର ବହୁ ବ୍ୟକ୍ତି ସାଇବର ଥାନାରେ ଅଭିଯୋଗ କରିଥିଲେ।
