ଲାହୋର/ଇସ୍ଲାମାବାଦ,୧୫ା୩: ବହୁଚର୍ଚ୍ଚିତ ତୋଶାଖାନା ମାମଲାରେ ପାକିସ୍ତାନର ଗାଦିଚ୍ୟୁତ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ମୁଣ୍ଡ ଉପରେ ଗିରଫଦାରି ଖଣ୍ଡା ଝୁଲୁଛି। ପୋଲିସ ଇମ୍ରାନ୍ଙ୍କୁ ଗିରଫ କରିବା ପାଇଁ ମଙ୍ଗଳବାର ଲାହୋରସ୍ଥିତ ତାଙ୍କ ଜମାନ୍ ପାର୍କ ବାସଭବନରେ ପହଞ୍ଚତ୍ଥିଲା। ସେଠାରେ ଉପସ୍ଥିତ ପାକିସ୍ତାନ ତେହରିକ୍-ଇ-ଇନ୍ସାଫ୍ (ପିଟିଆଇ) ସମର୍ଥକମାନେ ଗିରଫଦାରିକୁ ବିରୋଧକରି ବିକ୍ଷୋଭ ପ୍ରଦର୍ଶନ କରିଥିଲେ। ବିକ୍ଷୋଭ ବେଳେ ପୋଲିସ ଓ ସମର୍ଥକଙ୍କ ମଧ୍ୟରେ ଖଣ୍ଡଯୁଦ୍ଧ ଦେଖିବାକୁ ମିଳିଥିଲା। ତେବେ ଇମ୍ରାନ୍ ଇସ୍ଲାମାବାଦ୍ ହାଇକୋର୍ଟରୁ ସୁରକ୍ଷାମତ୍କ ଜାମିନ ହାସଲ କରିଥିବାରୁ ପୋଲିସ ତାଙ୍କୁ ଗିରଫ କରିପାରି ନାହିଁ।
ମୁଖ୍ୟ ଇମ୍ରାନ୍ ଖାନ୍ ପ୍ରଧାନମନ୍ତ୍ରୀ ଥିବାବେଳେ ପାଇଥିବା ଏକ ଦାମୀ ଗ୍ରାଫ୍ ହାତଘଣ୍ଟା ସମେତ କେତେକ ଉପହାରକୁ ସରକାରୀ ଭଣ୍ଡାର (ତୋଶାଖାନା)ରୁ ରିହାତି ମୂଲ୍ୟରେ କିଣିଥିଲେ। ପରେ ସେ ଏହାକୁ ଅଧିକ ମୂଲ୍ୟରେ ବିକ୍ରି କରିଦେଇଥିବା ଅଭିଯୋଗ ରହିଛି। ଅତିରିକ୍ତ ଜିଲା ଜଜ୍ ଜାଫର ଇକ୍ବାଲ୍ଙ୍କ କୋର୍ଟ ସୋମବାର ତୋଶାଖାନା ମାମଲାର ଶୁଣାଣି କରି ଇମ୍ରାନ୍ଙ୍କ ବିରୋଧରେ ଗିରଫ ପରଓ୍ବାନା ଜାରି କରିଥିଲେ। ଏଥିସହ ତାଙ୍କୁ ମାର୍ଚ୍ଚ ୧୮ ସୁଦ୍ଧା କୋର୍ଟରେ ହାଜର କରାଇବାକୁ ପୋଲିସକୁ ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ନିର୍ଦ୍ଦେଶକ୍ରମେ ଇସ୍ଲାମାବାଦ୍ ଡିଆଇଜି (ଅପରେଶନ୍ସ) ଶେହଜାଦ ବୁଖାରିଙ୍କ ନେତୃତ୍ୱରେ ପୋଲିସ ଇମ୍ରାନ୍ଙ୍କ ଜମାନ୍ ପାର୍କ ବାସଭବନରେ ପହଞ୍ଚତ୍ଥିଲା। ସଶସ୍ତ୍ର ପୋଲିସ ଟିମ୍ ଏବଂ ପିଟିଆଇ ସମର୍ଥକଙ୍କ ମଧ୍ୟରେ ସଂଘର୍ଷ ହୋଇଥିଲା। ଇମ୍ରାନ୍ଙ୍କ ସମର୍ଥକମାନେ ପୋଲିସକୁ ଠେଲାମାଡ଼ କରିଥିଲେ। ପୋଲିସ ଲୁହବୁହା ବାଷ୍ପ ପ୍ରୟୋଗ କରୁଥିବାବେଳର ଭିଡିଓକୁ ପିଟିଆଇ ନେତା ଶିରିନ୍ ମଜାରି ସୋସିଆଲ ମିଡିଆରେ ଶେୟାର କରିଛନ୍ତି। ଦଳର ଉପନେତା ଶାହ ମେହମୁଦ କୁରେଶି କହିଛନ୍ତି, ପିଟିଆଇ ନେତା ରକ୍ତାକ୍ତ ସଂଘର୍ଷକୁ ଏଡ଼ାଇବା ପାଇଁ ଏକ ସମ୍ଭାବ୍ୟ ପନ୍ଥା ବାହାର କରିବାକୁ ପ୍ରସ୍ତୁତ। ସେହିପରି ଦଳୀୟ ନେତାମାନେ ଗିରଫ ପରଓ୍ବାନାକୁ ଚ୍ୟାଲେଞ୍ଜ କରି ଇସ୍ଲାମାବାଦ୍ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିବା ପୂର୍ବତନ ମନ୍ତ୍ରୀ ଫଓ୍ବାଦ୍ ଚୌଧରୀ ସୂଚନା ଦେଇଛନ୍ତି।
ଇତିିମଧ୍ୟରେ ୭୦ ବର୍ଷୀୟ ଇମ୍ରାନ୍ ଦେଶବାସୀଙ୍କ ଉଦ୍ଦେଶ୍ୟରେ ଏକ ଭିଡିଓ ମେସେଜ୍ ଜାରି କରିଛନ୍ତି। ଏଥିରେ ସେ କହିଛନ୍ତି, ପୋଲିସ ମୋତେ ଗିରଫ କରିବାକୁ ଆସିଛି। ମୁଁ ଗିରଫ ହେଲେ ପାକିସ୍ତାନ ଶୋଇପଡ଼ିବ ବୋଲି ସେମାନେ ଭାବୁଛନ୍ତି। ମୋର ଯଦି କିଛି ହୋଇଯାଏ, ମୋତେ ଯଦି ହତ୍ୟା କରାଯାଏ ତେବେ ଏହି ଦେଶ ଲଢ଼େଇ ଜାରି ରଖିବ ବୋଲି ଆପଣମାନଙ୍କୁ ପ୍ରମାଣିତ କରିବାକୁ ପଡ଼ିବ।
ତୋଶାଖାନା ରେକର୍ଡ ପ୍ରକାଶିତ
ପାକିସ୍ତାନ ସରକାର ୨୦୦୨ରୁ ୨୦୨୨ ମଧ୍ୟରେ ହୋଇଥିବା ତୋଶାଖାନା ଗିଫ୍ଟ ସମ୍ପର୍କିତ ରେକର୍ଡକୁ ପ୍ରଥମ ଥର ପାଇଁ ସାର୍ବଜନୀନ କରିଛନ୍ତି। ୪୪୬ ପୃଷ୍ଠା ସମ୍ବଳିତ ଏହି ଗିଫ୍ଟ ରେକର୍ଡରେ ଦେଶର ରାଷ୍ଟ୍ରପତି ଓ ପ୍ରଧାନମନ୍ତ୍ରୀମାନେ ଗ୍ରହଣ କରିଥିବା ଉପହାର ବିବରଣୀ ସମ୍ପର୍କରେ ଉଲ୍ଲେଖ କରାଯାଇଛି। ଗ୍ରହୀତାଙ୍କ ମଧ୍ୟରେ ନଓ୍ବାଜ ଶରିଫ, ଇମ୍ରାନ୍ ଖାନ୍, ଆସିଫ ଅଲି ଜର୍ଦ୍ଦାରି, ଶାହିଦ୍ ଖାକନ ଅବ୍ବାସି ଏବଂ ଜେନେରାଲ (ଅବସରପ୍ରାପ୍ତ) ପରଭେଜ୍ ମୁଶାରଫ୍ଙ୍କ ନାମ ରହିଛି। ବର୍ତ୍ତମାନର ପ୍ରଧାନମନ୍ତ୍ରୀ ଶେହବାଜ୍ ଶରିଫ୍ ଜଣେ ମାତ୍ର ଶାସକ, ଯିଏକି ତୋଶାଖାନାରୁ କୌଣସି ଦାମୀ ଉପହାର ନେଇନାହାନ୍ତି। ଇମ୍ରାନ୍ ୨୦୧୮ ଅକ୍ଟୋବରରେ ୩.୮ ନିୟୁତ ପାକିସ୍ତାନୀ ରୁପି (ପିକେଆର୍) ମୂଲ୍ୟର ୫ଟି ହାତଘଣ୍ଟାକୁ ମାତ୍ର ୨୫୦,୦୦୦ ରୁପି ପଇଠ କରି ନେଇଛନ୍ତି। ସେହିପରି ୧.୫ ନିୟୁତ ପିକେଆର୍ ମୂଲ୍ୟର ରେଲେକ୍ସକୁ ୨୯୪,୦୦୦ ପିକେଆର୍ରେ ନେଇଥିଲେ। ୨୦୧୯ରେ ସେ ୧.୯ ନିୟୁତ ପିକେଆର୍ର ଏକ ଘଣ୍ଟାକୁ ୯୩୫,୦୦୦ ଦେଇ ନେଇଥିଲେ। ୨୦୨୦ରେ ଅନ୍ୟ ଏକ ରୋଲେକ୍ସକୁ ୨.୪ ନିୟୁତ ପିକେଆର୍ରେ ନେଇଥିଲେ, ଯାହାର ପ୍ରକୃତ ମୂଲ୍ୟ ୪.୪ ପିକେଆର୍।