ବ୍ରହ୍ମପୁର ଅଫିସ,୧୦ା୧୧: ବ୍ରହ୍ମପୁର ସହରରେ ଏବେ ଲୁଟେରା ଗ୍ୟାଙ୍ଗ ସକ୍ରିୟ ହୋଇପଡିଛନ୍ତି। ସେମାନେ ବିଭିନ୍ନ ତାଲାବନ୍ଦ ଘରକୁ ଟାର୍ଗେଟ କରୁଥିବା ଘଟଣା ସାମ୍ନାକୁ ଆସୁଛି। ସଦର ଥାନା ଅଧୀନ ଆଦିଶକ୍ତିନଗରରେ ଏକ ତାଲାବନ୍ଦ ଘରୁ କଳାକନା ବୁଲାଇଛନ୍ତି ଦୁର୍ବୃତ୍ତ। ସୁନା ଗହଣା, ରୁପା କଏନ, ଲାପ୍ଟପ୍ ଓ ଟଙ୍କା ଆଦି ଚୋରି କରି ନେଇଥିବା ଜଣାପଡିଛି। ଏନେଇ ଘର ମାଲିକ ମହେନ୍ଦ୍ର ପଣ୍ଡାଙ୍କ ଅଭିଯୋଗ ପରେ ପୋଲିସ ଘଟଣାସ୍ଥଳରେ ପହଞ୍ଚି ସିସିଟିଭି ଫୁଟେଜ ସଂଗ୍ରହ କରି ତଦନ୍ତ ଆରମ୍ଭ କରିଛି।
ସୂଚନା ଯୋଗ୍ୟ, ପୁରୁଷୋତ୍ତମପୁର ଅଞ୍ଚଳର ମୂଳ ନିବାସୀ ମହେନ୍ଦ୍ର ପଣ୍ଡା ଏକ ଘରୋଇ ସଂସ୍ଥାରେ କାମ କରନ୍ତି। ସେ ବ୍ରହ୍ମପୁର ଆଦିଶକ୍ତିନଗରରେ ଘର ଭଡ଼ା ନେଇ ନିଜ ପରିବାର ସହ ରହୁଛନ୍ତି। ଗତ ୯ ତାରିଖରେ ତାଙ୍କ ଶଳାଙ୍କ ସ୍ବାସ୍ଥ୍ୟ ଖରାପ ଥିବାବେଳେ ତାଙ୍କୁ ଦେଖିବା ପାଇଁ ଘରେ ତାଲା ପକାଇ ପୁରୁଷୋତ୍ତମପୁର ଯାଇଥିଲେ। ବୁଧବାର ଘରକୁ ଫେରିଥିଲେ। ସେତିକିବେଳେ ସେ ଘର ତାଲା ଭଙ୍ଗା ଯାଇଥିବା ଦେଖିବାକୁ ପାଇଥିଲେ। ଘର ଭିତରକୁ ଗଲା ବେଳକୁ ଦୁର୍ବୃତ୍ତମାନେ ଆଲମୀରା ଭାଙ୍ଗି ଚୋରି କରିଥିବା ସେ ଜାଣିବାକୁ ପାଇଥିଲେ। ଏନେଇ ମହେନ୍ଦ୍ର ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା (ନଂ.୫୩୨/୨୨) ରୁଜୁ କରି ତଦନ୍ତ ଚଳାଇଛି।