କଟକ ଅଫିସ,୧୧ା୪: ମୋବାଇଲ ଚୋରି ଅଭିଯୋଗରେ ଜଣେ ନାବାଳକକୁ ୩ଦିନ ଫାଣ୍ଡି ହାଜତରେ ରଖି ଅସହ୍ୟ ନିର୍ଯାତନା ଦିଆଯାଇଥିବା ଅଭିଯୋଗ ହୋଇଛି। ହାଜତ ଭିତରେ ପୋଲିସ ବାବୁ ଥାର୍ଡ ଡିଗ୍ରୀ ପ୍ରୟୋଗ କରିଥିବା ନିଜେ ନାବାଳକ ଜଣକ କ୍ୟାମେରା ସମ୍ମୁଖରେ କହିଛନ୍ତି। ଏପରିକି ଚୋରି ଅଭିଯୋଗ ମାନିବାକୁ ଏକ ପାଇପ ସାହାଯ୍ୟରେ ଖୁବ୍ ଜୋର୍ରେ ପିଟିଥିବା ସେ କହିଛନ୍ତି। କଟକ ଏସ୍ସିବି ମେଡିକାଲ ଫାଣ୍ଡି ପୋଲିସ ବିରୋଧରେ ଏପରି ସଙ୍ଗିନ ଅଭିଯୋଗ ଆସିଛି।
ସୂଚନାଯୋଗ୍ୟ, ମୋବାଇଲ ଚୋରି ଅଭିଯୋଗରେ ୧୨ ବର୍ଷର ଜଣେ ନାବାଳକକୁ ମେଡିକାଲ ଫାଣ୍ଡି ପୋଲିସ ଗତ ଶୁକ୍ରବାର ଧରି ଫାଣ୍ଡିକୁ ଆଣିଥିଲା। ତେବେ ଗତ ୩ ଦିନ ହେଲା ତାକୁ ହାଜତ ଭିତରେ ରଖି ଅକଥନୀୟ ନିର୍ଯାତନା ଦିଆଯାଉଥିବା ଖବର ପାଇ ଚାଇଲ୍ଡ ଲାଇନ ସଦସ୍ୟ ଫାଣ୍ଡିରେ ପହଞ୍ଚିଥିଲେ। ନାବାଳକଙ୍କୁ ହାଜତ ଭିତରେ ରଖିବା ନିୟମ ନ ଥିବା ବେଳେ କେଉଁ ପରିସ୍ଥିତିରେ ରଖାଯାଇଛି ବୋଲି ପ୍ରଶ୍ନ କରିବାରୁ ଫାଣ୍ଡି ଅଧିକାରୀ ନାବାଳକଙ୍କୁ ବାହାରକୁ ଆଣି ଚାଇଲ୍ଡ ଲାଇନକୁ ହସ୍ତାନ୍ତର କରିଥିଲେ। ଅନ୍ୟପକ୍ଷରେ ଫାଣ୍ଡିରେ କର୍ମଚାରୀ ନ ଥିବାରୁ ପିଲାଟିକୁ ଭିତରେ ରଖାଯାଇଥିଲା ବୋଲି ଫାଣ୍ଡି ଅଧିକାରୀ କହିଥିଲେ।