ଖ୍ରୀଷ୍ଟଚର୍ଚ୍ଚ,,୩୦।୧୧ : ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ଓଡିଆଇ ସିରିଜର ତୃତୀୟ ତଥା ଶେଷ ମ୍ୟାଚ ମଧ୍ୟ ବର୍ଷା ଯୋଗୁ ବାତିଲ ହୋଇଯାଇଛି। ଏହା ସହ ନ୍ୟୁଜିଲାଣ୍ଡ ତିନି ମ୍ୟାଚ ବିଶିଷ୍ଟ ସିରିଜକୁ ୧-୦ରେ ଜିତିଛି। ଖ୍ରୀଷ୍ଟଚର୍ଚ୍ଚରେ ଖେଳାଯାଉଥିବା ଏହି ମ୍ୟାଚରେ ନ୍ୟୁଜିଲାଣ୍ଡ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଭାରତୀୟ ଦଳ ବ୍ୟାଟିଂ କରି ୪୭.୩ ଓଭରରେ ୧୦ ଓ୍ବିକେଟ ହରାଇ ୨୧୯ କରିଛି। ନ୍ୟୁଜିଲାଣ୍ଡ ସମ୍ମୁଖରେ ବିଜୟ ଲକ୍ଷ୍ୟ ୨୨୦ ରନ ରହିଥିଲା।
ଅଧିନାୟକ ଶିଖର ଧାୱନ କେବଳ ୨୮ ରନ୍, ଗିଲ ୧୩ ରନ, ପନ୍ତ ୧୦ ରନ ଏବଂ ଆୟର ୪୯ ରନ କରିଥିଲେ। ଏଥି ସହିତ, ୱାଶିଂଟନ ସୁନ୍ଦର ୫୧ ରନ କରିଥିଲେ। ଏହାର ଜବାବରେ ନ୍ୟୁଜିଲାଣ୍ଡ ୧୮ ଓଭରରେ ୧ ୱିକେଟ ହରାଇ ୧୦୪ ରନ କରିଥିଲା। କିନ୍ତୁ ବର୍ଷା ଯୋଗୁ ପରବର୍ତ୍ତୀ ମ୍ୟାଚ ଖେଳାଯାଇ ପାରିଲା ନାହିଁ। ଭୂମି ଓଦା ହେବା ଯୋଗୁ ଅମ୍ପାୟାରମାନେ ମ୍ୟାଚ ବନ୍ଦ କରିବାକୁ ନିଷ୍ପତ୍ତି ନେଇଥିଲେ। ଡକୱର୍ଥ-ଲୁଇସ ନିୟମ ପ୍ରୟୋଗ ହୋଇପାରିଲା ନାହିଁ। ଏହି କାରଣରୁ ମ୍ୟାଚକୁ ବାତିଲ କରାଯାଇଥିଲା।
ନ୍ୟୁଜିଲାଣ୍ଡ ପାଇଁ ଆଡାମ ମିଲନେ ଏବଂ ଡାରିଲ ମିଚେଲ ପ୍ରତ୍ୟେକ ତିନୋଟି ୱିକେଟ ନେଇଥିଲେ। ଏଥି ସହିତ ବ୍ୟାଟିଂରେ ଫିନ ଆଲେନ ନ୍ୟୁଜିଲାଣ୍ଡ ପାଇଁ ୫୭ ରନ କରିଥିଲେ ଏବଂ ଡିଭନ କନୱେ ୩୮ରନ ସଂଗ୍ରହ କରିଥିଲେ।
