ଓ୍ବେଲିଂଟନ,୪।୩(ଏପି): ଅଲରାଉଣ୍ଡର ଗ୍ଲେନ୍ ମ୍ୟାକ୍ସଓ୍ବେଲ, ଅଧିନାୟକ ଆରୋନ ଫିଞ୍ଚ୍ଙ୍କ ଦମ୍ଦାର ବ୍ୟାଟିଂ ଓ ପରେ ଆଷ୍ଟନ ଅଗରଙ୍କ ଘାତକ ବୋଲିଂ ବଳରେ ଅଷ୍ଟ୍ରେଲିଆ ତୃତୀୟ ଟି୨୦ ମ୍ୟାଚ୍ରେ ନ୍ୟୁଜିଲାଣ୍ଡକୁ ବୃହତ୍ ୬୪ ରନରେ ପରାସ୍ତ କରିଛି। ସ୍ଥାନୀୟ ଓ୍ବେଷ୍ଟପ୍ୟାକ ଷ୍ଟାଡିୟମରେ ବୁଧବାର ଖେଳାଯାଇଥିବା ଏହି ମ୍ୟାଚ୍ରେ ଅଷ୍ଟ୍ରେଲିଆ ଟସ ହାରି ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୪ ଉଇକେଟ ହରାଇ ୨୦୮ ରନ ସଂଗ୍ରହ କରିଥିଲା। ଜବାବରେ ନ୍ୟୁଜିଲାଣ୍ଡ ୧୭.୧ ଓଭରରେ ୧୪୪ ରନକରି ଅଲଆଉଟ ହେବା ସହ ପରାସ୍ତ ହୋଇଛି। ପରାଜୟ ସତ୍ତ୍ୱେ ନ୍ୟୁଜିଲାଣ୍ଡ ୫ ମ୍ୟାଚ୍ ବିଶିଷ୍ଟ ଏହି ସିରିଜରେ ୨-୧ରେ ଅଗ୍ରଣୀ ବଜାୟ ରଖିଛି। ଫଳରେ ସିରିଜ ଜୀବନ୍ତ ରହିଛି। ୩୦ ରନ ବ୍ୟୟ କରି ମୂଲ୍ୟବାନ ୬ ଉଇକେଟ ଅକ୍ତିଆର କରି କ୍ୟାରିୟରର ଶ୍ରେଷ୍ଠ ପ୍ରଦର୍ଶନ କରିଥିବା ଅଷ୍ଟ୍ରେଲିଆ ସ୍ପିନର ଆଷ୍ଟନ ଅଗର ମ୍ୟାନ ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।
୨୦୯ ରନ ଟାର୍ଗେଟର ପିଛା କରି ଘରୋଇ ଦଳ ନିୟମିତ ବ୍ୟବଧାନରେ ଉଇକେଟ ହରାଇ ଆତ୍ମସମର୍ପଣ କରିଥିଲା। ଦଳର ୬ ଜଣ ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁପାରି ନ ଥିଲେ। ଅଭିଜ୍ଞ ଓପନର ମାର୍ଟିନ ଗୁପ୍ଟିଲ ୪୩, ଡେଭନ କନ୍ଓ୍ବେ ୩୮, ଗ୍ଲେନ ଫିଲିପ୍ସ ୧୩, ମାର୍କ ଚାପ୍ମ୍ୟାନ ୧୮, କାଏଲ ଜେମିଶନ ୧୧ ରନ ସଂଗ୍ରହ କରି ଆଉଟ ହୋଇଥିବା ବେଳେ ଅନ୍ୟମାନେ ବିଫଳ ହୋଇଥିଲେ। ବୋଲିଂରେ ନ୍ୟୁଜିଲାଣ୍ଡ ତରଫରୁ ଅଗରଙ୍କ ୬ ଉଇକେଟ ସଫଳତାକୁ ବାଦ୍ ଦେଲେ ରିଲେ ମେରେଡିଥ୍ ୨ ଓ ଅଭିଜ୍ଞ ସ୍ପିନର ଆଡାମ ଜାମ୍ପା ଓ କେନ୍ ରିଚାର୍ଡସନ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ମାଥ୍ୟୁ ଓ୍ବେଡଙ୍କୁ ହରାଇ ପ୍ରାରମ୍ଭିକ ଝଟ୍କା ଖାଇଥିଲା। ଓ୍ବେଡ୍ ୫ ରନକରି ଟ୍ରେଣ୍ଟ ବୋଲ୍ଟଙ୍କ ଦ୍ୱାରା ଆଉଟ ହୋଇଥିଲେ। ଅଧିନାୟକ ଫିଞ୍ଚ୍ ୪୪ ବଲରୁ ୮ ଚୌକା ଓ ୨ ଛକା ସହ ୬୯ ରନର ଦ୍ରୁତ ଅର୍ଦ୍ଧଶତକୀୟ ପାଳି ଖେଳି ଆଉଟ ହୋଇଥିଲେ। ସେହିପରି ଜୋଶ ଫିଲିପ୍ ୨୭ଟି ବଲର ସମ୍ମୁଖୀନ ହୋଇ ୩ ଚୌକା ଓ ୧ ଛକା ସହ ଦ୍ରୁତ ୪୩ ରନ ସଂଗ୍ରହ କରିଥିଲେ। ଫିଞ୍ଚ୍ ଓ ଫିଲିପ୍ ସ୍ପିନର ଇସ୍ ସୋଧିଙ୍କ ଦ୍ୱାରା ଆଉଟ ହୋଇଥିଲେ। ଏହାପରେ ମ୍ୟାକ୍ସଓ୍ବେଲ ମାତ୍ର ୩୧ଟି ବଲର ସମ୍ମୁଖୀନ ହୋଇ ୮ ଚୌକା ଓ ୫ ଛକା ସହ ଦ୍ରୁତ ୭୦ ରନ ସଂଗ୍ରହ କରି ଦଳକୁ ବୃହତ୍ ସ୍କୋର ପ୍ରଦାନ କରି ଟିମ୍ ସୌଦିଙ୍କ ଦ୍ୱାରା ଆଉଟ ହୋଇଥିଲେ। ମାର୍କସ ଷ୍ଟୋଇନିସ ୯ ଓ ମିଚେଲ ମାର୍ଶ ୬ ରନ କରି ଅପରାଜିତ ରହିଥିଲେ। ବୋଲିଂରେ ନ୍ୟୁଜିଲାଣ୍ଡର ସୋଧି ୨, ସୌଦି ଓ ବୋଲ୍ଟ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଅଷ୍ଟ୍ରେଲିଆ ୨୦ ଓଭରରେ ୨୦୮/୪
(ଫିଞ୍ଚ୍- ୬୯, ମ୍ୟାକ୍ସଓ୍ବେଲ- ୭୦, ଫିଲିପ- ୪୩, ସୋଧି- ୨/୩୨, ସୌଦି- ୧/୩୭, ବୋଲ୍ଟ- ୧/୩୯)।
ନ୍ୟୁଜିଲାଣ୍ଡ ୧୭.୧ ଓଭରରେ ୧୪୪ ଅଲ୍ଆଉଟ୍
(ଗୁପ୍ଟିଲ- ୪୩, କନ୍ଓ୍ବେ- ୩୮, ଅଗର- ୬/୩୦, ମେରେଡିଥ- ୨/୪୨, )