ତୃତୀୟ ଟି୨୦: ଦକ୍ଷିଣ ଆଫ୍ରିକାର ରୋମାଞ୍ଚକ ବିଜୟ

ସେଣ୍ଟ ଜର୍ଜେଶ(ଗ୍ରେନେଡା), ୧।୭: ସ୍ଥାନୀୟ ନ୍ୟାଶନାଲ କ୍ରିକେଟ ଷ୍ଟାଡିୟମରେ ମଙ୍ଗଳବାର ଖେଳାଯାଇଥିବା ଓ୍ବେଷ୍ଟଇଣ୍ଡିଜ ବିପକ୍ଷ ତୃତୀୟ ଟି୨୦ ମ୍ୟାଚ୍‌ରେ ଭ୍ରମଣକାରୀ ଦକ୍ଷିଣ ଆଫ୍ରିକା ରୋମାଞ୍ଚମ ଢଙ୍ଗରେ ମାତ୍ର ୧ ରନରେ ବିଜୟ ହାସଲ କରିଛି। ଟସ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଦକ୍ଷିଣ ଆଫ୍ରିକା ୮ ଉଇକେଟ ହରାଇ ୧୬୭ ରନ ସଂଗ୍ରହ କରିଥିଲା। ଜବାବରେ ଓ୍ବେଷ୍ଟଇଣ୍ଡିଜ ୭ ଉଇକେଟ ହରାଇ ୧୬୬ ରନରେ ସୀମିତ ରହିବା ସହ ବିଜୟଠାରୁ ମାତ୍ର ୨ ରନ ଦୂରରେ ରହିଯାଇଥିଲା। ଏହି ବିଜୟ ସହ ୫ ମ୍ୟାଚ୍‌ ବିଶିଷ୍ଟ ସିରିଜରେ ଦକ୍ଷିଣ ଆଫ୍ରିକା ୨-୧ରେ ଅଗ୍ରଣୀ ହାସଲ କରିଛି। ଗୁରୁବାର ଚତୁର୍ଥ ଟି୨୦ ଖେଳାଯିବ। ୧୩ ରନ ଦେଇ ମୂଲ୍ୟବାନ ୨ ଉଇକେଟ ନେଇଥିବା ଦକ୍ଷିଣ ଆଫ୍ରିକା ବୋଲର ତାବରେଜ ସାମ୍‌ସି ପ୍ଲେୟର ଅଫ୍‌ ଦି ମ୍ୟାଚ୍‌ ବିବେଚିତ ହୋଇଛନ୍ତି।
୧୬୮ ରନ ଟାର୍ଗେଟର ପିଛା କରି ଓ୍ବେଷ୍ଟଇଣ୍ଡିଜ ନିୟମିତ ଅନ୍ତରରେ ଉଇକେଟ ହରାଇଥିଲା। ଓପନର ଏଭିନ ଲୁଇସ ସର୍ବାଧିକ ୨୭, ନିକୋଲାସ ପୁରନ ୨୬, ଆନ୍ଦ୍ରେ ରସେଲ ୨୫, ଲିଣ୍ଡେଲ ସିମନ୍ସ ୨୨, ଜାସନ ହୋଲ୍ଡର ୧୬, ଶିମରନ ହେଟମେର ୧୭ ରନକରି ଆଉଟ ହୋଇଥିବା ବେଳେ ଫାବିଆନ ଆଲେନ ୧୪ ରନକରି ଅପରାଜିତ ରହିଥିଲେ। ଦକ୍ଷିଣ ଆଫ୍ରିକାର ଅନରିଚ୍‌ ନୋର୍ଜ ଓ ତାବରେଜ ସାମ୍‌ସି ଦୁଇଟି ଲେଖାଏ, ଜର୍ଜ ଲିଣ୍ଡେ, ଲୁନ୍‌ଗି ଏନ୍‌ଗିଡି ଓ କାଗିସୋ ରାବାଡା ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ଦକ୍ଷିଣ ଆଫ୍ରିକା ତରଫରୁ ଓପନର କ୍ୱିଣ୍ଟନ ଡିକକ୍‌ ସର୍ବାଧିକ ୭୨ (୫୧ ବଲ, ୫ ଚୌକା, ୨ ଛକା), ରସି ଭାନ ଡେର ଡୁସେନ ୩୨, ଏଡେନ ମାରକ୍ରାମ ୨୩, ରିଜା ହେଣ୍ଡ୍ରିକ୍ସ ୧୭ ରନ ସଂଗ୍ରହ କରିଥିଲେ। ବୋଲିଂରେ ଓ୍ବେଷ୍ଟଇଣ୍ଡିଜ ତରଫରୁ ଓବେଡ ମ୍ୟାକ୍‌କଏ ୪ ଓ ଡ୍ବେନ ବ୍ରାଭୋ ୩ଟି ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର:
ଦକ୍ଷିଣ ଆଫ୍ରିକା ୨୦ ଓଭରରେ ୧୬୭/୮
(ଡିକକ- ୭୨, ଡୁସେନ- ୩୨, ମାରକ୍ରାମ- ୨୩, ମ୍ୟାକକଏ- ୪/ ୨୨, ବ୍ରାଭୋ- ୩/୨୫)।
ଓ୍ବେଷ୍ଟଇଣ୍ଡିଜ ୨୦ ଓଭରରେ ୧୬୬/୭
(ଲୁଇସ- ୨୭, ପୁରନ- ୨୬, ରସେଲ- ୨୫, ସିମନ୍ସ-୨୨, ନୋର୍ଜ-୨/୨୯, ସାମସି- ୨/୧୩)।