ମେଲବୋର୍ନ, ୨।୧(ପି.ଟି.)-
ଚଳିତ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜର ଅବଶିଷ୍ଟ ୨ଟି ମ୍ୟାଚ ପାଇଁ ୟର୍କର ସ୍ପେଶାଲିଷ୍ଟ ଥଙ୍ଗାରାସୁ ନଟରାଜନ ଓ ଶାର୍ଦ୍ଦୁଳ ଠାକୁରଙ୍କୁ ସୁଯୋଗ ମିଳିଛି। ଆହତ ଉମେଶ ଯାଦବଙ୍କ ସ୍ଥାନ ନେଇଛନ୍ତି ନଟରାଜନ। ସେହିପରି ମହମ୍ମଦ ଶାମିଙ୍କ ସ୍ଥାନରେ ଶାର୍ଦ୍ଦୁଳଙ୍କୁ ସାମିଲ କରାଯାଇଛି। ମେଲବୋର୍ନରେ ଅନୁଷ୍ଠିତ ଦ୍ୱିତୀୟ ଟେଷ୍ଟର ୩ୟ ଦିବସରେ ଉମେଶଙ୍କ ଗୋଡ଼ ପୁଟିଆ ମାଂସପେଶୀ ଟାଣି ଧରିଥିଲା। ଆଗାମୀ ୨ ଟେଷ୍ଟ ଅବଧି ମଧ୍ୟରେ ସେ ସମ୍ପୂର୍ଣ୍ଣ ସୁସ୍ଥ ହେବା ସମ୍ଭାବନା କମ୍ ରହିଛି। ତେଣୁ ସେ ସିରିଜରୁ ଓହରି ଯାଇଥିବା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସମ୍ପାଦକ ଜୟ ଶାହା ପ୍ରକାଶ କରିଛନ୍ତି। ତେଣୁ ଜାତୀୟ ସିନିୟର ଚୟନ କମିଟି ତାଙ୍କ ବଦଳ ଖେଳାଳିଭାବେ ନଟରାଜନଙ୍କୁ ବାଛିଛନ୍ତି। ସେହିପରି ଡାହାଣ ହାତ ଭାଙ୍ଗିଥିବାରୁ ଶାମି ଓହରି ଯାଇଥିବାରୁ ତାଙ୍କ ସ୍ଥାନରେ ଶାର୍ଦ୍ଦୁଳଙ୍କୁ ନିଆଯାଇଛି ବୋଲି ସେ କହିଛନ୍ତି। ଆହତ ଅବସ୍ଥାରୁ ମୁକୁଳିବାପାଇଁ ଉଭୟ ଉମେଶ ଓ ଶାମି ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ ଏକାଡେମୀରେ ଚିକିତ୍ସିତ ହେବେ।
୨୯ ବର୍ଷୀୟ ନଟରାଜନ ଜଣେ ନେଟ୍ ବୋଲରଭାବେ ଅଷ୍ଟ୍ରେଲିଆ ଗସ୍ତ କରିଥିଲେ। ପରେ ସେ ଦିନିକିଆ ଓ ଟି୨୦ ଦଳରେ ସାମିଲ ହେବାର ପରିସ୍ଥିତି ସୃଷ୍ଟି ହୋଇଥିଲା। ୨ଟି ଦିନିକିଆ ଓ ୩ଟି ଟି୨୦ ମ୍ୟାଚରେ ସେ ପ୍ରଭାବୀ ପ୍ରଦର୍ଶନ କରି ୮ଟି ଉଇକେଟ ନେଇଥିଲେ। ତାମିଲନାଡ଼ୁ ପକ୍ଷରୁ ୨୦ଟି ପ୍ରଥମଶ୍ରେଣୀ କ୍ରିକେଟ ମ୍ୟାଚ ଖେଳିଥିବା ନଟରାଜନ ଏବେ ଟେଷ୍ଟ ଦଳରେ ସାମିଲ ହେବାର ସୌଭାଗ୍ୟ ପାଇଛନ୍ତି। ରୋହିତ ଶର୍ମା କ୍ୱାରାଣ୍ଟାଇନ୍ ଅବଧି ଶେଷ କରିବାପରେ ଦଳରେ ଯୋଗ ଦେଇଛନ୍ତି। ସିରିଜ ୧-୧ ସ୍ଥିତିରେ ଥିବାବେଳେ ତୃତୀୟ ଟେଷ୍ଟ ଚଳିତମାସ ୭ ତାରିଖରେ ସିଡ୍ନୀରେ ଆରମ୍ଭ ହେବ।
ଭାରତୀୟ ଦଳ: ଅଜିଙ୍କ୍ୟ ରାହାନେ (ଅଧିନାୟକ), ରୋହିତ ଶର୍ମା, ମୟଙ୍କ ଅଗ୍ରଓ୍ବାଲ, ପୃଥ୍ବୀ ଶ’, ଲୋକେଶ ରାହୁଲ, ଚେତେଶ୍ୱର ପୂଜାରା, ହନୁମା ବିହାରୀ, ଶୁବମନ ଗିଲ୍, ରିଦ୍ଧିମାନ ଶାହା, ରିଷଭ ପନ୍ତ, ଯଶପ୍ରୀତ୍ ବୁମ୍ରା, ନଭଦୀପ ସଇନି, କୁଲଦୀପ ଯାଦବ, ରବୀନ୍ଦ୍ର ଜାଡେଜା, ରବିଚନ୍ଦ୍ରନ ଅଶ୍ୱିନ, ମହମ୍ମଦ ସିରାଜ, ଶାର୍ଦ୍ଦୁଳ ଠାକୁର, ଟି. ନଟରାଜନ।
