ହାଇଦ୍ରାବାଦ, ୨୩।୭: ହାଇଦ୍ରାବାଦ ସୂର୍ଯ୍ୟପେଟ ଜିଲାରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଗୋଟିଏ ଗ୍ରାମରେ ମାଙ୍କଡ଼ ପଲ ଆକ୍ରମଣ କରି ୩୦ ଛେଳି ଛୁଆକୁ ମାରି ଦେଇଛନ୍ତି। ଏହି ଘଟଣାଟି ଚିନ୍ଥାଲାପାଲେମ ମଣ୍ଡଳ ଅନ୍ତର୍ଗତ ବନଦ୍ରିଗୁଡେମ ଗ୍ରାମରେ ଘଟିଛି। ଏହି ଗ୍ରାମରେ ଅଧିକାଂଶ ସମୟ ମାଙ୍କଡ଼ଙ୍କ ଦୌରାତ୍ମ ଦେଖିବାକୁ ମିଳିଥାଏ। ଗ୍ରାମର ଟୋକଲା ସଇଦୁଲ ନାମକ ଜଣେ ଛେଳି ପାଳକ ବୁଧବାର ଛେଳି ନେଇ ଚରାଇବା ପାଇଁ ଗ୍ରାମ ନିକଟସ୍ଥ ଜଙ୍ଗଲକୁ ଯାଇଥିଲେ। ତେବେ ସଇଦୁଲ କିଛି ଛେଳି ଛୁଆକୁ ସାଥିରେ ନ ନେଇ ସେମାନଙ୍କୁ ଗୁହାଳରେ ଛାଡ଼ି ଜଙ୍ଗଲକୁ ଯାଇଥିଲେ। ସଇଦୁଲଙ୍କ ଘରେ ମଧ୍ୟ ସେହି ସମୟରେ କେହି ଉପସ୍ଥିତ ନ ଥିଲେ। ଏହାର ସୁଯୋଗ ଦେଇ ଏକ ୨୦ ଜଣିଆ ମାଙ୍କଡ଼ ପଲ ଗୁହାଳ ମଧ୍ୟରେ ପଶି ଛେଳି ଛୁଆଗୁଡ଼ିକୁ ଆକ୍ରମଣ କରିଥିଲେ। ଏହା ଜାଣିପାରି ପଡ଼ୋଶୀ ଲୋକ ମଧ୍ୟ ମାଙ୍କଡ଼ ପଲଙ୍କୁ ଘଉଡ଼ାଇବାକୁ ଚେଷ୍ଟା କରି ବିଫଳ ହୋଇଥିଲେ। ଶେଷରେ ମାଙ୍କଡ଼ଙ୍କ ଆକ୍ରମଣରେ ୩୦ ଛେଳି ଛୁଆ ମରିଯାଇଥିବା ଜଣାପଡ଼ିଛି। ସଇଦୁଲ ଯେତେବେଳେ ଘରକୁ ଫେରିଥିଲେ ମାଙ୍କଡ଼ଙ୍କ ଦ୍ୱାରା ହୋଇଥିବା ଏ ଦୌରାତ୍ମକୁ ଦେଖି ମର୍ମାହତ ହୋଇଥିଲେ।
