ସିଓଲ୍,୨୪ା୧୦:ଦକ୍ଷିଣ କୋରିଆରେ ଫ୍ଲୁ’ଜନିତ ସ୍ବାସ୍ଥ୍ୟ ସଙ୍କଟ ଦୂର କରିବା ପାଇଁ ସରକାର ଟିକାକରଣ କାର୍ଯ୍ୟକ୍ରମ ଚଳାଇଥିବାବେଳେ ଆଉ ଏକ ବିପଦ ମାଡ଼ିଆସିଛି। ‘କୋଭିଡ୍-୧୯’ ଏବଂ ‘ଇନ୍ଫ୍ଳୁଏଞ୍ଜା’କୁ ଦେଶରେ ‘ଟ୍ବିନଡେମିକ୍’ ବା ଯଁାଳା ମହାମାରୀ ବୋଲି ଅଭିହିତ କରାଯାଉଛି। ଏହି ଟ୍ବିନଡେମିକ୍ର ଗୋଷ୍ଠୀ ସଂକ୍ରମଣକୁ ଏଡ଼ାଇବା ପାଇଁ ଭାକ୍ସିନ ଦିଆଯାଉଛି। ଉକ୍ତ ଭାକ୍ସିନ ନେଇ ଅଦ୍ୟାବଧି ୩୨ ଜଣଙ୍କ ମୃତ୍ୟୁ ଘଟିଲାଣି। ଅନ୍ୟପକ୍ଷେ ଦକ୍ଷିଣ କୋରିଆର ସ୍ବାସ୍ଥ୍ୟ ମନ୍ତ୍ରଣାଳୟ ଟିକା ଯୋଗୁ ଲୋକଙ୍କ ଜୀବନ ଯାଉଥିବା ଅଭିଯୋଗକୁ ଖଣ୍ଡନ କରିବା ସହ ଭାକ୍ସିନେଶନ ପ୍ରୋଗ୍ରାମ ଜାରି ରହିବ ବୋଲି ସ୍ପଷ୍ଟ କରିଛି। ପ୍ରଧାନମନ୍ତ୍ରୀ ଚୁଙ୍ଗ୍ ସ୍ୟେ-କ୍ୟୁନ୍ ଶୁକ୍ରବାର ଭାକ୍ସିନ ମୃତ୍ୟୁର ତଦନ୍ତ ନିର୍ଦ୍ଦେଶ ଦେଇଛନ୍ତି।
ସୂଚନା ଅନୁସାରେ, ଦକ୍ଷିଣ କୋରିଆରେ ଗତ ମାସରୁ ମାଗଣା ଟିକାକରଣ କାର୍ଯ୍ୟକ୍ରମ ଚାଲିଛି। ଦେଶର ମୋଟ ଜନସଂଖ୍ୟା ୫୨ ନିୟୁତ ହୋଇଥିବାବେଳେ ୩୦ ନିୟୁତ ଯୋଗ୍ୟ ଲୋକ (ସ୍ବଳ୍ପ ବୟସ୍କ ଓ ବୃଦ୍ଧ)ଙ୍କୁ ଏହି ଟିକା ବିନା ମୂଲ୍ୟରେ ଦିଆଯିବା ପାଇଁ ସ୍ଥିର କରାଯାଇଛି। ବର୍ତ୍ତମାନ ସୁଦ୍ଧା ୧୩ ନିୟୁତ ଲୋକ ଏହି ଟିକା ନେଇସାରିଲେଣି ବୋଲି କୋରିଆ ଡିଜିଜ୍ କଣ୍ଟ୍ରୋଲ ଆଣ୍ଡ ପ୍ରିଭେନ୍ସନ ଏଜେନ୍ସି ପକ୍ଷରୁ କୁହାଯାଇଛି। ଘରୋଇ ଟିକା ପ୍ରସ୍ତୁତକାରୀ କମ୍ପାନୀ ଜିସି ଫାର୍ମା, ଏସ୍କେ
ବାୟୋସାଇନ୍ସ, କୋରିଆ ଭାକ୍ସିନ ଓ ବୋରିୟୁଙ୍ଗ୍ ବାୟୋଫାର୍ମାକୁ ଭାକ୍ସିନ ଯୋଗାଣ ପାଇଁ ଦାୟିତ୍ୱ ଦିଆଯାଇଛି। ସରକାରଙ୍କ ପକ୍ଷରୁ ଟିକାକରଣ କାର୍ଯ୍ୟକ୍ରମ ଚାଲିଥିବାବେଳେ ଇତିମଧ୍ୟରେ ୩୨ ଜଣ ଭାକ୍ସିନ ନେଇ ପ୍ରାଣ ହରାଇଥିବା କୁହାଯାଉଛି। ତେବେ ଉପରୋକ୍ତ ୪ କମ୍ପାନୀ ଏନେଇ କିଛି ମନ୍ତବ୍ୟ ଦେଇନାହାନ୍ତି। ଅନ୍ୟପକ୍ଷେ ଦକ୍ଷିଣ କୋରିଆ ସ୍ବାସ୍ଥ୍ୟ କର୍ତ୍ତୃପକ୍ଷ କହିଛନ୍ତି, ସନ୍ଦିଗ୍ଧ ମୃତ୍ୟୁସଂଖ୍ୟା ବଢ଼ିଚାଲିଥିଲେ ମଧ୍ୟ ଏହି ଅଭିଯାନକୁ ବନ୍ଦ କରାଯିବ ନାହିଁ। କାରଣ ଫ୍ଲୁ ଶଟ୍ସ ସହିତ ମୃତ୍ୟୁର କୌଣସି ପ୍ରତ୍ୟକ୍ଷ ସମ୍ପର୍କ ନାହିଁ।
ନିକଟରେ ଭାକ୍ସିନ ନେଇଥିବା ଲୋକଙ୍କ ମଧ୍ୟରୁ ଗୁରୁବାର ଅପରାହ୍ନ ୪ଟା ସୁଦ୍ଧା ୨୫ ଜଣଙ୍କ ମୃତ୍ୟୁ ଘଟିଥିଲା। ଗତ ସପ୍ତାହରୁ ଲୋକଙ୍କ ଜୀବନ ଯିବା ଆରମ୍ଭ ହୋଇଥିବାବେଳେ ଶୁକ୍ରବାର ମୃତ୍ୟୁସଂଖ୍ୟା ୩୨ ଛୁଇଁଛି। ଭାକ୍ସିନ ନେଇ ପ୍ରାଣ ହରାଇଥିବା ପ୍ରଥମ ବ୍ୟକ୍ତି ହେଉଛନ୍ତି ଜଣେ ୧୭ ବର୍ଷୀୟ କିଶୋର। ଫ୍ଲୁ ଶଟ୍ସ ନେବାର ଦୁଇଦିନ ପରେ ତାଙ୍କ ମୃତ୍ୟୁ ଘଟିଛି। ନ୍ୟାଶନାଲ ଫରେନ୍ସିକ୍ ସର୍ଭିସ ତାଙ୍କ ମୃତଦେହ ବ୍ୟବଚ୍ଛେଦ କରିବା ପରେ ଜାଣିବାକୁ ପାଇଛି ଯେ, ଭାକ୍ସିନ ସହିତ ତାଙ୍କ୍ ମୃତ୍ୟୁର କିଛି ସମ୍ପର୍କ ନାହିଁ। ଏହାସତ୍ତ୍ୱେ ଟିକା ନେବା ପରେ ହିଁ ଏହି ଲୋକମାନଙ୍କ ଜୀବନ ଯାଉଥିବାରୁ ଭାକ୍ସିନ ଦେବା ବନ୍ଦ କରାଯାଉ ବୋଲି ରାଜନେତା ଓ ଡାକ୍ତରମାନେ ଦାବି କରିଛନ୍ତି। ଭାକ୍ସିନ ନେଇଥିବା ଆଉ କେତେଜଣଙ୍କ ଅବସ୍ଥା ସଙ୍କଟାପନ୍ନ ଥିବାରୁ ମୃତ୍ୟୁସଂଖ୍ୟା ବଢ଼ିପାରେ ବୋଲି ଲୋକେ ଆଶଙ୍କା କରୁଛନ୍ତି। ଏହାର ଜବାବରେ ସ୍ବାସ୍ଥ୍ୟ ମନ୍ତ୍ରଣାଳୟ କହିଛି, ଭାକ୍ସିନ ସହି ମୃତ୍ୟୁର ସମ୍ପର୍କ ଥିବା ନେଇ କିଛି ପ୍ରମାଣ ନାହିଁ। ତେଣୁ ସରକାର ନିର୍ଦ୍ଧାରିତ ଟାର୍ଗେଟ ପୂରଣ ପାଇଁ ଟିକା ପ୍ରଦାନ କାର୍ଯ୍ୟକ୍ରମ ଜାରି ରଖିବେ।