‘କ୍ୟାପଟେନ ଆମେରିକା’ ଅର୍ଥାତ୍ ଅଭିନେତା କ୍ରିସ ଇଭାନ୍ସ ଲୁଚିଛପି ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ହଠାତ୍ ବିବାହ କରି ସେ ତାଙ୍କ ପ୍ରଶଂସକଙ୍କୁ ଚକିତ କରିଦେଇଛନ୍ତି। କ୍ରିସ ତାଙ୍କଠାରୁ ୧୬ ବର୍ଷ ସାନ ତାଙ୍କ ଗର୍ଲଫ୍ରେଣ୍ଡ ଅଲବା ବାପ୍ଟିଷ୍ଟାଙ୍କୁ ବିବାହ କରିଛନ୍ତି। କ୍ରିସ ଇଭାନ୍ସଙ୍କୁ ୪୨ ବର୍ଷ ହୋଇଥିବାବେଳେ ତାଙ୍କ ଗର୍ଲଫ୍ରେଣ୍ଡ ଅଲବା ୨୬ ବର୍ଷ ବୟସ।
ଏହି ଦମ୍ପତି ସେପ୍ଟେମ୍ବର ୯ରେ ମାସାଚୁସେଟ୍ସର ବୋଷ୍ଟନ ସ୍ଥିତ ଏକ ଘରୋଇ ବାସଭବନରେ ବିବାହ କରିଥିଲେ। ସେମାନଙ୍କର ବିବାହ ସମାରୋହ ଅତ୍ୟନ୍ତ ବ୍ୟକ୍ତିଗତ ଥିଲା। କ୍ରିସ ଏବଂ ଅଲବାଙ୍କ ବିବାହରେ କେବଳ ଘନିଷ୍ଠ ବନ୍ଧୁ ଏବଂ ପରିବାର ସଦସ୍ୟ ଉପସ୍ଥିତ ଥିଲେ। ତେବେ ଏପର୍ଯ୍ୟନ୍ତ କ୍ରିସ ଏବଂ ଅଲବାଙ୍କ ବିବାହ ସମ୍ପର୍କରେ କୌଣସି ନିଶ୍ଚିତତା ହୋଇନାହିଁ।
୨୦୨୨ରେ ପ୍ରଥମ ଥର ପାଇଁ ସେମାନଙ୍କର ଡେଟିଂ ଖବର ସାମ୍ନାକୁ ଆସିଥିଲା। ଏହି ଦମ୍ପତି ନ୍ୟୁୟର୍କରେ ଏକାଠି ବୁଲୁଥିବାର ନଜର ଆସିଥିଲେ। ଚଳିତ ବର୍ଷ ଆରମ୍ଭରେ ଦୁହେଁ ନିଜ ସମ୍ପର୍କକୁ ଅଫିସିଆଲ କରିଥିଲେ।
୨୬ ବର୍ଷୀୟା ଅଲବା ଜଣେ ପର୍ତ୍ତୁଗୀଜ ଅଭିନେତ୍ରୀ। ସେ ୨୦୧୪ରେ ଧାରାବାହିକ ‘ଜାର୍ଡିନ୍ସ ପ୍ରୋବିଡୋସ’ରୁ ନିଜର ଅଭିନୟ ଜୀବନ ଆରମ୍ଭ କରିଥିଲେ। ଏହା ପରେ ସେ ‘ଏ ଇମ୍ପୋଷ୍ଟୋରା’, ‘ଫିଲ୍ହା ଡା ଲେଇ’ ଭଳି ଅନେକ ଚଳଚ୍ଚିତ୍ରରେ ତାଙ୍କର ଅଭିନୟ ସହିତ ଲୋକଙ୍କ ହୃଦୟ ଜିତିଥିଲେ। କ୍ରିସ ଏବଂ ଅଲବା ପ୍ରଥମ ଥର ପାଇଁ ‘ୱାରିଅର୍ ନନ’ରେ ଏକାଠି କାମ କରିଥିଲେ।
