ମାଞ୍ଚେଷ୍ଟର, ୩୧।୮: କ୍ରିକେଟ୍ର ସବୁଠାରୁ ଛୋଟିଆ ଫର୍ମାଟ୍ ଟି୨୦ରେ ଛକା-ଚୌକା ବୃଷ୍ଟି ହେବା ଏକ ସାଧାରଣ କଥା। ବିଶ୍ୱର ଅନେକ ବ୍ୟାଟ୍ସମ୍ୟାନ ରହିଛନ୍ତି ଯେଉଁମାନେ ଟି୨୦ କ୍ରିକେଟ୍ରେ ଲମ୍ବା ଲମ୍ବା ଛକା ମାରିବାରେ ବେଶ୍ ପାରଙ୍ଗମ। ସେମାନଙ୍କ ମଧ୍ୟରେ କ୍ରିସ୍ ଗେଲ୍, ରୋହିତ୍ ଶର୍ମା, କିରନ ପୋଲାର୍ଡ, ଏବି ଡି ଭିଲର୍ସ ଅନ୍ୟତମ। ଟି୨୦ରେ ଏହି ବ୍ୟାଟ୍ସମ୍ୟାନମାନେ ବେଶ୍ ପରିଚିତ। ତେବେ ବିଶ୍ୱରେ ଏମିତି ଜଣେ ବ୍ୟାଟ୍ସମ୍ୟାନ ରହିଛନ୍ତି, ଯାହାଙ୍କ ଲୋକପ୍ରିୟତା ଏହି କିମ୍ବଦନ୍ତୀ ଖେଳାଳିଙ୍କ ପରି ନୁହେଁ କିନ୍ତୁ ଛକା ମାରିବାରେ ସେମାନଙ୍କଠାରୁ କିଛି କମ୍ ବି ନୁହେଁ। ଆମେ ଏଠାରେ ଇଂଲଣ୍ଡ ସୀମିତ ଓଭର ଦଳର ଅଧିନାୟକ ଇଅନ ମୋର୍ଗାନଙ୍କ କଥା କହୁଛୁ, ଯିଏକି କିଛି ସମୟ ଧରି ତାଙ୍କ ବ୍ୟାଟିଂରେ ବେଶ୍ ପ୍ରଭାବୀ ପ୍ରଦର୍ଶନ କରିଆସିଛନ୍ତି।
ଦଳର ଏହି ବାମହାତୀ ବ୍ୟାଟ୍ସମ୍ୟାନ ପୂର୍ବରୁ ୧ କିମ୍ବା ୨ ରନ ଉପରେ ନିର୍ଭର କରୁଥିଲେ। କିନ୍ତୁ ଏବେ ମୋର୍ଗାନଙ୍କ ବ୍ୟାଟିଂ ଶୈଳୀରେ ବହୁତ କିଛି ପରିବର୍ତ୍ତନ ଆସିଛି। ସୁଯୋଗ ମିଳିଲେ ସେ ବଲ୍କୁ ବାଉଣ୍ଡରୀ ବାହାରକୁ ପଠାଇବାରେ ଅବହେଳା କରୁନାହାନ୍ତି। ରବିବାର ପାକିସ୍ତାନ ବିପକ୍ଷ ୨ୟ ଟି୨୦ ମ୍ୟାଚ୍ରେ ମୋର୍ଗାନ ଯେଉଁଭଳି ବ୍ୟାଟିଂ କଲେ ତାହା ତାଙ୍କ ବ୍ୟାଟିଂର ଆକ୍ରମଣାତ୍ମକ ଶୈଳୀକୁ ଦର୍ଶାଉଛି। ଏହି ମ୍ୟାଚ୍ରେ ପାକିସ୍ତାନ ପକ୍ଷରୁ ଧାର୍ଯ୍ୟ ୧୯୬ ରନର ବିଶାଳ ଲକ୍ଷ୍ୟକୁ ପିଛା କରି ଇଂଲଣ୍ଡ ୬୬ ରନରେ ୨ଟି ଉଇକେଟ୍ ହରାଇ ସାରିଥିଲା। କିନ୍ତୁ ଏହାପରେ କ୍ରିଜରେ ଯୋଗଦେଇଥିବା ମୋର୍ଗାନ ୩୩ ବଲରୁ ୬୬ ରନର ମାରାଇନ ଇନିଂସ ଖେଳି ଦଳକୁ ସହଜସାଧ୍ୟ ବିଜୟ କରାଇଥିଲେ। ଏହି ଅର୍ଦ୍ଧଶତକୀୟ ଇନିଂସ ମଧ୍ୟରେ ସେ ୬ ଚୌକା ଓ ୪ ଛକା ଲଗାଇଥିଲେ। ଏଥିସହ ସେ ତାଙ୍କ ଶେଷ ୧୦ଟି ଟି୨୦ ମ୍ୟାଚ୍ରୁ ୨୯ ଛକା ମାରିସାରିଛନ୍ତି। ଟି୨୦ କ୍ୟାରିୟରରେ ଏହା ତାଙ୍କ ମୋଟ୍ ଛକାର ୨୬.୩ ପ୍ରତିଶତ।