ଦୁବାଇ, ୧୨।୧୦: ଚଳିତ ଆଇପିଏଲ୍ ୨୬ତମ ମୁକାବିଲାରେ ରବିବାର ରାଜସ୍ଥାନ ରୟାଲ୍ସ ୫ ଉଇକେଟ୍ରେ ସନ୍ରାଇଜର୍ସ ହାଇଦ୍ରାବାଦ୍କୁ ପରାସ୍ତ କରିଛି। ଏହି ରୋମାଞ୍ଚକ ମୁକାବିଲାରେ ହାଇଦ୍ରାବାଦ୍ ପକ୍ଷରୁ ଧାର୍ଯ୍ୟ ୧୫୯ ରନର ଲକ୍ଷ୍ୟକୁ ରାଜସ୍ଥାନ ଗୋଟିଏ ବଲ୍ ପୂର୍ବରୁ ୫ ଉଇକେଟ୍ ହରାଇ ହାସଲ କରିନେଇଥିଲା। ତେବେ ଏହି ମ୍ୟାଚ୍ରେ ପରାସ୍ତ ହୋଇଥିଲେ ମଧ୍ୟ ହାଇଦ୍ରାବାଦ୍ ଦଳର ଷ୍ଟାର୍ ସ୍ପିନର ରଶିଦ୍ ଖାନ୍ ଏକ ସ୍ବତନ୍ତ୍ର ରେକର୍ଡର ଅଧିକାରୀ ହୋଇଛନ୍ତି। ଆଇପିଏଲ୍ ଇତିହାସରେ ରଶିଦ୍ ଏଲ୍ବିଡବ୍ଲ୍ୟୁ ମାଧ୍ୟମରେ ସର୍ବାଧିକ ଉଇକେଟ୍ ହାସଲକାରୀ ବୋଲର୍ ହେବାର ସୌଭାଗ୍ୟ ଲାଭ କରିଛନ୍ତି। ମ୍ୟାଚ୍ରେ ରାଜସ୍ଥାନର ରବିନ୍ ଉଥପ୍ପାଙ୍କୁ ରଶିଦ୍ ଏଲ୍ବିଡବ୍ଲ୍ୟୁ କରିଥିଲେ। ଏଥିସହ ଆଇପିଏଲ୍ରେ ୧୮ଜଣ ବ୍ୟାଟ୍ସମ୍ୟାନଙ୍କୁ ସେ ଏଲ୍ବିଡବ୍ଲ୍ୟୁ ମାଧ୍ୟମରେ ଆଉଟ କରିଛନ୍ତି। ଏହିକ୍ରମରେ ରଶିଦ୍ କୋଲକାତାର ସୁନୀଲ ନାରିନ (୧୭ଥର)ଙ୍କୁ ପଛରେ ପକାଇଛନ୍ତି।
