ମୁମ୍ବାଇ: କୋଟିପତିଙ୍କ ବିଳାସପୂର୍ଣ୍ଣ ଜୀବନଶୈଳୀ ବିଷୟରେ ଆପଣ ନିଶ୍ଚୟ ଅନେକ କାହାଣୀ ଶୁଣିଥିବେ। କୋଟି କୋଟି ଟଙ୍କା ମୂଲ୍ୟର ଧନୀ ବ୍ୟକ୍ତିଙ୍କ ପାଇଁ ଦାମୀ ଘରୋଇ ଜେଟ ଏବଂ ଦୁନିଆର ସବୁଠୁ ଦାମୀ କାର ସଂଗ୍ରହ କରିବା ସାଧାରଣ କଥା। ଆଜି ଆମେ ଆପଣଙ୍କୁ ଏକ ବିଲିୟନେୟାରଙ୍କ କାହାଣୀ କହୁଛୁ ଯାହାଙ୍କ ସମ୍ପତ୍ତି ହଜାରେ ହଜାର କୋଟି ଟଙ୍କା, କିନ୍ତୁ ତା’ପରେ ମଧ୍ୟ ସେ ମୁମ୍ବାଇ ଲୋକାଲ ଟ୍ରେନରେ ଅଫିସକୁ ଯାଉଥିବାର ନଜର ଆସିଛନ୍ତି …
ଏହା ହେଉଛି ରିଅଲ ଇଷ୍ଟେଟ କ୍ଷେତ୍ରର ଜଣେ ପ୍ରସିଦ୍ଧ ବ୍ୟବସାୟ ଟାଇକୁନ ନିରଂଜନ ହିରାନନ୍ଦାନୀଙ୍କ କାହାଣୀ। ହିରାନନ୍ଦାନୀ ଗ୍ରୁପର ସହ-ପ୍ରତିଷ୍ଠାତା ତଥା ପରିଚାଳନା ନିର୍ଦ୍ଦେଶକ ନିରଂଜନ ହିରାନନ୍ଦାନୀ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛନ୍ତି। ଭାଇରାଲ ଭିଡିଓରେ ସେ ମୁମ୍ବାଇର ଲୋକାଲ ଟ୍ରେନରେ ଯାତ୍ରା କରୁଥିବାର ନଜର ଆସିଛନ୍ତି। କୁହାଯାଉଛି ଯେ ଏହି ଭିଡିଓଟି ସେହି ସମୟର ଯେତେବେଳେ ହିରାନନ୍ଦାନୀ ମୁମ୍ବାଇ ଲୋକାଲ ଟ୍ରେନରେ ଯାତ୍ରା କରିି ଉହ୍ଲାସନଗରରେ ଥିବା ତାଙ୍କ କାର୍ଯ୍ୟାଳୟକୁ ଯାଉଥିଲେ।
ଏତେ ବଡ ବ୍ୟବସାୟୀଙ୍କୁ ଏହିପରି ମୁମ୍ବାଇ ଲୋକାଲ ଟ୍ରେନରେ ଦେଖି ସମସ୍ତେ ଆଶ୍ଚର୍ଯ୍ୟ ହୋଇଯାଆନ୍ତି। ହିରାନନ୍ଦାନୀଙ୍କ ବିଷୟରେ କହିବାକୁ ଗଲେ ସେ ଦେଶର ଶ୍ରେଷ୍ଠ ଧନୀମାନଙ୍କ ମଧ୍ୟରେ ରହିବେ। ୨୦୨୩ର ହୁରୁନ ତାଲିକା ଅନୁଯାୟୀ, ନିରଂଜନ ହିରାନନ୍ଦାନୀ ଭାରତର ୫୦ ଧନୀ ବ୍ୟକ୍ତିଙ୍କ ମଧ୍ୟରେ ଥିଲେ। ତାଙ୍କର ନେଟଓ୍ବର୍ଥ ୩୨ହଜାର କୋଟିରୁ ଅଧିକ ବୋଲି କୁହାଯାଉଛି। ତାଙ୍କର ବିଳାସପୂର୍ଣ୍ଣ କାରଗୁଡିକର ସଂଗ୍ରହ ମଧ୍ୟ ଅଛି।
ଏହା ସ୍ବାଭାବିକ ଯେ ଯଦି କୌଣସି ବ୍ୟକ୍ତିଙ୍କର ହଜାର ହଜାର କୋଟି ଟଙ୍କାର ଅପାର ସମ୍ପତ୍ତି ଅଛି, ମହଙ୍ଗା କାରର ଚମତ୍କାର ସଂଗ୍ରହ ଅଛି, ଏବଂ ତଥାପି ଅଫିସକୁ ଯିବା ପାଇଁ ମୁମ୍ବାଇଲୋକାଲ ଟ୍ରେନରେ ଚଢିଯାଏ, ତେବେ ଲୋକମାନେ ଆଶ୍ଚର୍ଯ୍ୟ ହୋଇଯିବେ। ହିରାନନ୍ଦାନୀଙ୍କ ଯାତ୍ରା କରିବାର କାରଣ ହେଉଛି ମୁମ୍ବାଇର ଅସମ୍ଭବ ଟ୍ରାଫିକ ଜାମ। ମୁମ୍ବାଇର ଟ୍ରାଫିକ ଜାମ କାରଣରୁ ଅନେକ ଥର ଲୋକମାନେ ରାସ୍ତାରେ ଅଟକି ରହି ଘଣ୍ଟା ଘଣ୍ଟା ନଷ୍ଟ କରନ୍ତି। ଏଭଳି ପରିସ୍ଥିତିରେ ସମୟ ବଞ୍ଚାଇବା ପାଇଁ ହିରାନନ୍ଦାନୀ ମୁମ୍ବାଇର ଲାଇଫ ଲାଇନ ଲୋକାଲ ଟ୍ରେନରେ ଯିବାକୁ ପସନ୍ଦ କରିଥିଲେ।
