ଚାଷୀର ସାଥୀ ଟ୍ରାକ୍ଟର। କେବଳ ଚାଷରେ ଯେ ଏହା ସାହାଯ୍ୟ କରେ ତାହା ନୁହେଁ ବରଂ ଭାରି ଜିନିଷ ନେବା ଆଣିବାରେ ବି ଏହାକୁ ବ୍ୟବହାର କରାଯାଏ। ଏଇ ଟ୍ରାକ୍ଟର କିନ୍ତୁ ଦ୍ରୁତ ଗତିରେ ଯାଇପାରି ନ ଥାଏ। ବହୁତ ଧୀର ଗତିରେ ଯାଏ। ହେଲେ ଏବେ ଆସିଛି ଏମିତି ଏକ ଟ୍ରାକ୍ଟର ଯାହା ଏତେ ଦ୍ରୁତଗତିରେ ଯାଏ ଯେ, କୌଣସି ସ୍ପୋର୍ଟସ୍ କାର୍ ବି ଏତେ ଦ୍ରୁତ ଗତିରେ ଯାଇପାରିବ ନାହିଁ। ଟ୍ରାକ୍ଟର ନିର୍ମାଣକାରୀ କମ୍ପାନୀ ଜେସିବି ପୃଥିବୀର ଏହି ଦ୍ରୁତତମ ଟ୍ରାକ୍ଟରକୁ ତିଆରି କରିଛନ୍ତି। ଏହାର ଟପ୍ ସ୍ପିଡ୍ ଘଣ୍ଟା ପ୍ରତି ୨୪୭ କି.ମି.। କମ୍ପାନୀ ଗିନିଜ ଓ୍ବାର୍ଲଡ ରେକର୍ଡସରେ ନିଜ ଟ୍ରାକ୍ଟରକୁ ସବୁଠାରୁ ଦ୍ରୁତତମ ଭାବେ ସ୍ଥାନିତ କରିବାକୁ ଚାହୁଁଥିଲେ। ତେଣୁ ଏଭଳି ଏକ ଟ୍ରାକ୍ଟର ନିର୍ମାଣ କରିଥିଲେ। ୨୦୧୯ ଏହାର ଟେଷ୍ଟ କରାଯାଇଥିଲା। ଟ୍ରାକ୍ଟରଟି ୨ କି.ମି ଯାତ୍ରା କରିଥିଲା। ଯେଉଁଥିରେ ଏହାର ହାରାହାରି ଗତି ଘଣ୍ଟାପ୍ରତି ୨୧୭ କି.ମି. ଓ ସର୍ବାଧିକ ଗତି ଘଣ୍ଟାପ୍ରତି ୨୪୭ କି.ମି. ଥିଲା। ଏହି ଟ୍ରାକ୍ଟରରେ ୭.୨ ଲିଟର, ୬ ସିଲିଣ୍ଡର ବିଶିଷ୍ଟ ଡିଜେଲ ମ୍ୟାକ୍ସ ଇଞ୍ଜିନ ଅଛି। ଏହାର ପିକ୍ ପାଓ୍ବାର ୧୦୧୬ ହର୍ଷ ପାଓ୍ବାର। ଏହା ଏତେ ଦ୍ରୁତଗତିରେ ଯାଉଥିଲେ ହେଁ ଏହାର ଓଜନ କିଛି କମ୍ ନୁହେଁ। ୫ ଟନ୍ ହେଉଛି ଏହାର ଓଜନ। ଜେସିବିର ଚିଫ୍ ଇନୋଭେସନ୍ ଓ ଗ୍ରୋଥ ଅଫିସର ଟିମ୍ ବର୍ନହୋପ କୁହନ୍ତି, ଏତେ ଭାରି ଟ୍ରାକ୍ଟରକୁ ସୁରକ୍ଷିତଭାବେ ଟପ୍ ସ୍ପିଡ୍ ପର୍ଯ୍ୟନ୍ତ ପହଞ୍ଚାଇବା ଓ ପୁଣିଥରେ ତା’ର ସ୍ପିଡକୁ କମାଇବା ସହଜ କଥା ନୁହେଁ। ତଥାପି ଏହାକୁ ସମ୍ଭବ କରି ଦେଖେଇବା ସହ ଓ୍ବାର୍ଲଡ ରେକର୍ଡ କରିପାରି ଥିବାରୁ ବହୁତ ଖୁସି ଲାଗେ।’