କଲମ୍ବୋ, ୨୯।୯: ନଭେମ୍ବରରେ ଖେଳାଯିବାକୁ ଥିବା ଲଙ୍କା ପ୍ରିମିୟର ଲିଗ୍ (ଏଲ୍ପିଏଲ୍)କୁ ବଡ଼ ଝଟ୍କା ଲାଗିଛି। ବାଂଲାଦେଶ କ୍ରିକେଟ୍ ବୋର୍ଡ (ବିସିବି) ଏହାର ଖେଳାଳିଙ୍କୁ ଲଙ୍କା ପ୍ରିମିୟର ଲିଗ୍ରେ ଖେଳିବା ଲାଗି ଅନୁମତି ଦେବାକୁ ମନା କରିଦେଇଛି। ବାଂଲାଦେଶର ଖେଳାଳିମାନେ ଏହି ଲିଗ୍ରେ ଭାଗ ନେବେ ନାହିଁ ବୋଲି ବିସିବି ଅଧ୍ୟକ୍ଷ ନଜମୁଲ ହସନ କହିଛନ୍ତି। ନଜମୁଲ୍ କହିଛନ୍ତି, ‘କୌଣସି ବାଂଲାଦେଶ ଖେଳାଳି ଏଲ୍ପିଏଲ୍ରେ ଭାଗ ନେବାର ସମ୍ଭାବନା ଅଛି ବୋଲି ମୋତେ ଲାଗୁ ନାହିଁ। କାହିଁକି ନା ଏହି ସମୟରେ ଆମର ଘରୋଇ କ୍ରିକେଟ୍ ପ୍ରତିଯୋଗିତା ଚାଲିଥିବ, ଏବଂ ସମସ୍ତ ଖେଳାଳି ସେଥିରେ ବ୍ୟସ୍ତ ଥିବେ।’ ଏଠାରେ ପ୍ରକାଶଯୋଗ୍ୟ, ଶ୍ରୀଲଙ୍କା କ୍ରିକେଟ୍ ଆନୁକୂଲ୍ୟରେ ହେବାକୁ ଥିବା ଏଲ୍ପିଏଲ୍ର ଖେଳାଳି ନିଲାମ ୧ ଅକ୍ଟୋବରରେ ହେବ। ଏହି ନିଲାମୀ ପ୍ରକ୍ରିୟାରେ ପ୍ରାୟ ୧୫୦ ଖେଳାଳି ଅଂଶଗ୍ରହଣ କରିବେ। ଯେଉଁମାନଙ୍କ ମଧ୍ୟରେ କ୍ରିସ ଗେଲ୍, ଡାରେନ ସାମି, ଡାରେନ ବ୍ରାଭୋ, ଶାହିଦ୍ ଆଫ୍ରିଦୀ, କଲିନ୍ ମୁନ୍ରୋ, ମୁନାଫ ପଟେଲ ଓ ରବି ବୋପାରାଙ୍କ ଭଳି ଖେଳାଳି ସାମିଲ ରହିଛନ୍ତି। ଏଲ୍ପିଏଲ୍ ୧୪ ନଭେମ୍ବରରୁ ଆରମ୍ଭ ହେବାକୁ ଥିବାବେଳେ ଏଥିରେ ୫ଟି ଫ୍ରାଞ୍ଚାଇଜ୍ ଅଂଶଗ୍ରହଣ କରିବେ।