ନୂଆଦିଲ୍ଲୀ, ୧।୮: ବାଂଲାଦେଶ କ୍ରିକେଟ୍ ଦଳର ପ୍ରାକ୍ତନ ଅଧିନାୟକ ତଥା ଅଭିଜ୍ଞ ଅଲ୍ରାଉଣ୍ଡର ଶାକିବ ଅଲ୍ ହାସାନ ଇଦ୍ ଅବସରେ ସ୍ତ୍ରୀ ଉମି ଅହମ୍ମଦ ଶିଶିରଙ୍କୁ ଏକ ସ୍ବତନ୍ତ୍ର ଉପହାର ପ୍ରଦାନ କରିଛନ୍ତି। ଇଦ୍ ଉପଲକ୍ଷେ ଶାକିବ ଏକ ନୂଆ ମର୍ସିଡିଜ୍-ବେଞ୍ଜ କାର୍ ତାଙ୍କ ସ୍ତ୍ରୀଙ୍କୁ ଭେଟି ଦେଇଛନ୍ତି। କରୋନା ମହାମାରୀ ଲାଗି ଗତ ମାର୍ଚ୍ଚ ମାସରୁ ଏହି ଦମ୍ପତି ଆମେରିକାରେ ଅବସ୍ଥାପିତ ରହିଛନ୍ତି। ଏଭଳି କଠିନ ସମୟ ସତ୍ତ୍ୱେ ଶାକିବ ସ୍ତ୍ରୀଙ୍କ ପାଇଁ ଏହି ପର୍ବକୁ ଅଧିକ ସ୍ମରଣୀୟ କରିବା ଲାଗି ଭୁଲି ନ ଥିଲେ। ୩୧ ବର୍ଷୀୟା ଶିଶିର ଏହି ସୌଖିନ କାର୍ର ୨ଟି ଫଟୋ ତାଙ୍କ ଫେସ୍ବୁକ୍ ଆକାଉଣ୍ଟରେ ପୋଷ୍ଟ କରିଛନ୍ତି। ‘ସ୍ବାମୀଙ୍କଠାରୁ ମୋର ଇଦ୍’ ବୋଲି ଶିଶିର ଫଟୋର କ୍ୟାପସନରେ ସେ ଉଲ୍ଲେଖ କରିଛନ୍ତି।
୧୨ ଡିସେମ୍ବର ୨୦୧୨ରେ ଶାକିବଙ୍କୁ ବିବାହ କରିଥିବା ଶିଶିର ଜଣେ ସଫ୍ଟଓ୍ବେର ଇଞ୍ଜିନିୟର ଏବଂ ମଡେଲିଂରେ ମଧ୍ୟ ରୁଚି ରଖନ୍ତି। ଏହି ଦମ୍ପତିଙ୍କର ୨ଟି କନ୍ୟା ସନ୍ତାନ ରହିଛି। ଏଠାରେ ଉଲ୍ଲେଖଯୋଗ୍ୟ, ଗତବର୍ଷ ଅକ୍ଟୋବରରେ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ଶାକିବଙ୍କୁ ଗୋଟିଏ ବର୍ଷ ଲାଗି ସମସ୍ତ ପ୍ରକାର କ୍ରିକେଟ୍ରୁ ବାସନ୍ଦ କରିଛି। ଫିକ୍ସିଂ ମାମଲରେ ସେ ତଥ୍ୟ ପ୍ରକାଶ କରି ନ ଥିବାରୁ ଆଇସିସି ତାଙ୍କୁ ଏହି ବାସନ୍ଦାଦେଶ କରିଥିଲା।
