ଆଇପିଏଲ୍ରେ ଏମଏସ ଧୋନୀଙ୍କ ଦଳ ଚେନ୍ନାଇ ସୁପର କିଙ୍ଗ୍ସ ତାରକା ବୋଲର ଇମ୍ରାନ ତାହିର ପାକିସ୍ଥାନର ଅଟନ୍ତି। ଭାରତୀୟ ମୂଳ ଦକ୍ଷିଣ ଆଫ୍ରିକୀୟ ସୁମାୟା ଦିଲଦାରଙ୍କୁ ତାଙ୍କ ଜାବନସାଥୀ ଭାବରେ ବାଛିଥିଲେ ସେ। ତାହିର ଆଜି ଯେଉଁ ସ୍ଥାନରେ ଅଛନ୍ତି, ସେଥିରେ ତାଙ୍କ ସ୍ତ୍ରୀଙ୍କର ଏକ ବଡ଼ ହାତ ଅଛି। ସୁମାୟା ପେଶାରେ ଜଣେ ମେକଅପ୍ ଆର୍ଟିଷ୍ଟ। ଏଥିରେ ସେ ଅନେକ ଲୋକପ୍ରିୟତା ମଧ୍ୟ ହାସଲ କରିଛନ୍ତି। ତାହିର ପାକିସ୍ତାନ ପକ୍ଷରୁ ଅଣ୍ଡର -୧୯ ଏବଂ ପାକିସ୍ତାନ ଏ ପକ୍ଷରୁ ଖେଲିବା ପାଇଁ ଦକ୍ଷିଣ ଆଫ୍ରିକା ଗସ୍ତ କରିଥିଲେ। ସେତେବେଳେ ସୁମାୟାଙ୍କୁ ପ୍ରଥମ ଥର ଦେଖିଥିଲେ। ପ୍ରଥମ ଦେଖାରେ ତାଙ୍କ ପ୍ରେମରେ ପଡିଯାଇଥିଲେ ତାହିର। ଗସ୍ତ ସାରି ଘରକୁ ଫେରିବା ପରେ ମଧ୍ୟ ସୁମାୟାଙ୍କୁ ଭୁଲି ନ ଥିଲେ। ତାଙ୍କୁ ଭେଟିବାକୁ ପୁଣି ଥରେ ଦକ୍ଷିଣ ଆଫ୍ରିକା ଯାଇଥିଲେ। ସୁମାୟାଙ୍କ ନିକଟରେ ନିଜର ପ୍ରେମ ବ୍ୟକ୍ତ କରିଥିଲେ। ଏଥିପାଇଁ ଏକ ସର୍ତ୍ତ ରଖିଥିଲେ ସୁମାୟା। ସେ କହିଥିଲେ ମୁଁ ଯଦି ପ୍ରେମ ସ୍ବୀକାର କରିବି ତେବେ ତୁମେ ଦକ୍ଷିଣ ଆଫ୍ରିକା କେବେ ଛାଡିକି ଯିବ ନାହିଁ। ଏହି ସର୍ତ୍ତରେ ତାହିର ରାଜି ହୋଇଥିଲେ। ତାହିର ନିଜ ପ୍ରେମ ପାଇଁ ପାକିସ୍ତାନ ଛାଡି ଦକ୍ଷିଣ ଆଫ୍ରିକାରେ ରହିବାକୁ ନିଷ୍ପତ୍ତି ନେଇଥିଲେ। ଏହା ପରେ ତାହିର ଦକ୍ଷିଣ ଆଫ୍ରିକା ପକ୍ଷରୁ କ୍ରିକେଟ୍ ଖେଲିବା ଆରମ୍ଭ କଲେ। ଏବେ ସେ ବିଶ୍ୱର ଶ୍ରେଷ୍ଠ ବୋଲରମାନଙ୍କ ମଧ୍ୟରୁ ଅନ୍ୟତମ। ତାହିର ଦକ୍ଷିଣ ଆଫ୍ରିକା ପାଇଁ ୨୦ଟି ଟେଷ୍ଟ, ୧୦୭ଟି ଏକଦିବସୀୟ ମ୍ୟାଚ୍ ଏବଂ ୩୮ଟି ଟି-୨୦ ଅନ୍ତର୍ଜାତୀୟ ଖେଳିଛନ୍ତି। ୨୦୧୯ ଆଇସିସି ବିଶ୍ୱକପ ପରେ ସେ ଏକଦିବସୀୟରୁ ଅବସର ନେଇଥିଲେ।