ଢାକା, ୧୫।୭- ବିଶ୍ୱରେ ଅନେକ କ୍ରୀଡ଼ାବିତ୍ କରୋନା ଭାଇରସ୍ରେ ସଂକ୍ରମିତ ହୋଇ ଆରୋଗ୍ୟ ଲାଭ କରିଛନ୍ତି। ଏହିକ୍ରମରେ ବାଂଲାଦେଶ କ୍ରିକେଟ୍ ଦଳର ପୂର୍ବତନ ଅଧିନାୟକ ମାଶ୍ରାଫି ମୋର୍ତାଜା ଏହି ମହାମାରୀରୁ ସୁସ୍ଥତା ଲାଭ କରିଛନ୍ତି। ସୁସ୍ଥ ହୋଇଥିବା ନେଇ ମୋର୍ତାଜା ନିଜେ ତାଙ୍କ ଟୁଇଟର୍ ପୃଷ୍ଠାରେ ସ୍ପଷ୍ଟ କରିଛନ୍ତି। ‘ଆଶା କରୁଛି ସମସ୍ତେ ସୁସ୍ଥ ଅଛନ୍ତି। ଭଗବାନଙ୍କ କୃପା ଏବଂ ସମସ୍ତଙ୍କ ଆଶୀର୍ବାଦା ଯୋଗୁ ବର୍ତ୍ତମାନ ମୋର କରୋନା ଭାଇରସ୍ ରିପୋର୍ଟ ନେଗେଟିଭ ଆସିଛି। ଏଭଳି କଠିନ ସମୟରେ ମୋର ସାଥୀରେ ରହିଥିବା ଏବଂ ସ୍ବାସ୍ଥ୍ୟ ପ୍ରତି ଚିନ୍ତା ପ୍ରକଟ କରିଥିବାରୁ ସମସ୍ତଙ୍କୁ କୃତଜ୍ଞତା ଜ୍ଞାପନ କରୁଛି’ ବୋଲି ୩୬ ବର୍ଷୀୟ ମୋର୍ତାଜା ଟୁଇଟର୍ ପୃଷ୍ଠାରେ ଉଲ୍ଲେଖ କରିଛନ୍ତି। ତେବେ ମୋର୍ତାଜା ସୁସ୍ଥ ହୋଇଥିଲେ ମଧ୍ୟ ତାଙ୍କ ସ୍ତ୍ରୀ ସୁମୋନା ହକ୍ଙ୍କ କରୋନା ରିପୋର୍ଟ କିନ୍ତୁ ପୁନର୍ବାର ପଜିଟିଭ ଆସିଛି। ‘ଦୁଇ ସପ୍ତାହର ଚିକିତ୍ସା ପରେ ମୋ ସ୍ତ୍ରୀଙ୍କ କରୋନା ରିପୋର୍ଟ ପଜିଟିଭ ଆସିଛି। ସେ ଆରୋଗ୍ୟ ଲାଭ କରୁଛନ୍ତି। ତାଙ୍କ ପାଇଁ ପ୍ରାର୍ଥନା କର’ ବୋଲି ମୋର୍ତାଜା ଆଉ ଏକ ପୋଷ୍ଟରେ ଏହା କହିଛନ୍ତି। ଏଠାରେ ଉଲ୍ଲେଖଯୋଗ୍ୟ, ବାଂଲାଦେଶ ପକ୍ଷରୁ ଏହି ଡାହାଣହାତୀ ଦ୍ରୁତ ବୋଲର ୩୬ ଟେଷ୍ଟ, ୨୨୦ ଦିନିକିଆ ଓ ୫୪ ଟି୨୦ ମ୍ୟାଚ୍ ଖେଳି ଯଥାକ୍ରମେ ୭୮, ୨୭୦ ଓ ୪୨ ଉଇକେଟ୍ ଅକ୍ତିଆର କରିଛନ୍ତି। ଅନ୍ୟତମ ବାଂଲଦେଶ ଖେଳାଳି ନଜମୁଲ ଇସଲାମ ଯିଏକି ୩ ସପ୍ତାହ ତଳେ କରୋନାରେ ଆକ୍ରାନ୍ତ ହୋଇଥିଲେ ସେ ମଧ୍ୟ ଆରୋଗ୍ୟ ଲାଭ କରିଥିବା ଜଣାପଡ଼ିଛି।