ଢାକା, ୨୦।୯: ବାଂଲାଦେଶ କ୍ରିକେଟ୍ ଦଳର ଷ୍ଟାର୍ ଅଲ୍ରାଉଣ୍ଡର ଶାକିବ ଅଲ୍ ହାସାନଙ୍କ ବାପା ମସହରୁର୍ ରେଜା କୁତିଲ୍ କରୋନା ଆକ୍ରାନ୍ତ ହୋଇଛନ୍ତି। ନିକଟରେ ମସହରୁରଙ୍କୁ ଥଣ୍ଡା ହୋଇଥିଲା। ଏହାପରେ ତାଙ୍କ ସ୍ବାବ ଟେଷ୍ଟ କରାଯାଇଥିଲା। ଯାହାର ରିପୋର୍ଟ ପଜିଟିଭ ଆସିଛି। ଶାକିବଙ୍କ ସମ୍ପର୍କୀୟ ଭାଇ ସୋହନ ଏହା ସ୍ପଷ୍ଟ କରିଛନ୍ତି। ସୋହନ ଆହୁରି ମଧ୍ୟ କହିଛନ୍ତି, ଶାକିବଙ୍କ ମା’ଙ୍କ ସ୍ବାବ୍ ଟେଷ୍ଟ ମଧ୍ୟ କରାଯାଇଛି। କିନ୍ତୁ ଏହାର ରିପୋର୍ଟ ଆସିନାହିଁ। ସ୍ତ୍ରୀ ଉମ୍ମେ ଅହମ୍ମଦ ଶିଶିର୍ ଓ ଦୁଇ ଝିଅଙ୍କ ସହ ୩୩ ବର୍ଷୀୟ ଶାକିବ ବର୍ତ୍ତମାନ ଆମେରିକାରେ ରହୁଛନ୍ତି। ଏଠାରେ ଉଲ୍ଲେଖଯୋଗ୍ୟ, ମ୍ୟାଚ୍ ଫିକ୍ସିଂ ଲାଗି ଶାକିବଙ୍କୁ ଅଫର୍ ଆସିଥିଲେ ମଧ୍ୟ ସେ ଏହି କଥାକୁ ଲୁଚାଇ ରଖିଥିଲେ। ଏହି କାରଣରୁ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ଚଳିତ ବର୍ଷ ପ୍ରାରମ୍ଭରେ ଶାକିବଙ୍କୁ ୨ ବର୍ଷ ଲାଗି କ୍ରିକେଟ୍ରୁ ବାସନ୍ଦ କରିଥିଲା।