ନୂଆଦିଲ୍ଲୀ: ଇଂଲଣ୍ଡ କ୍ରିକେଟ୍ ଦଳର ଷ୍ଟାର୍ ଅଲ୍ରାଉଣ୍ଡର ବେନ୍ ଷ୍ଟୋକ୍ସ ଏକାକୀ ଦମ୍ଦାର ପ୍ରଦର୍ଶନ କରି ଗତବର୍ଷ ଦଳକୁ ବିଶ୍ୱକପ୍ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ସେହିଭଳି ଆଶେସ ସିରିଜରେ ଅଷ୍ଟ୍ରେଲିଆ ନିକଟରୁ ଦଳକୁ ପରାଜୟରୁ ରକ୍ଷା କରିବା ସହ ଓ୍ବେଷ୍ଟଇଣ୍ଡିଜ ବିପକ୍ଷ ଗତ ୨ୟ ଟେଷ୍ଟ ମ୍ୟାଚ୍ ବିଜୟରେ ଷ୍ଟୋକ୍ସଙ୍କ ପ୍ରଦର୍ଶନ ବେଶ୍ ଉଲ୍ଲେଖନୀୟ ରହିଥିଲା। କୁହାଯାଏ ୨୯ ବର୍ଷୀୟ ଷ୍ଟୋକ୍ସ ଯଦି ପଡ଼ିଆରେ ଠିଆ ହୁଅନ୍ତି ତେବେ ଦଳକୁ ଜିତାଇବା ପରେ ହିଁ ଆସିଥାନ୍ତି। ଇଂଲଣ୍ଡ ଦଳର ଏହି ଅଭିଜ୍ଞ ଅଲ୍ରାଉଣ୍ଡ ୨୦୧୭ରେ ତାଙ୍କ ପିଲାଦିନର ସାଥୀ କ୍ଲାରେଙ୍କ ସହ ବିବାହ ବନ୍ଧନରେ ଆବଦ୍ଧ ହୋଇଥିଲେ। କ୍ଲାରେ ଓ ଷ୍ଟୋକ୍ସ ପରସ୍ପରକୁ ପିଲାଦିନରୁ ଚିହ୍ନିଥିବାବେଳେ ପ୍ରଥମେ ବହୁଦିନ ଧରି ଲିଭ୍ ଇନ୍ ରିଲେଶନରେ ରହିଥିଲେ। ଏହାପରେ ୨୦୧୩ରେ ଷ୍ଟୋକ୍ସଙ୍କ ବାପାଙ୍କ ମୃତ୍ୟୁ ପରେ କ୍ଲାରେଙ୍କ ସହ ତାଙ୍କର ନିର୍ବନ୍ଧ ଅନୁଷ୍ଠିତ ହୋଇଥିଲା। ଷ୍ଟୋକ୍ସଙ୍କ ପ୍ରତିଟି କଠିନ ମୁହୂର୍ତ୍ତରେ ସର୍ବଦା ସାଥୀରେ ଠିଆ ହେଉଥିବା କ୍ଳାରେ ଜଣେ ସ୍କୁଲ ଶିକ୍ଷୟତ୍ରୀ। ଏକ ପ୍ରାଇମେରୀ ସ୍କୁଲରେ ପିଲାଙ୍କୁ ସେ ଶିକ୍ଷାଦାନ କରିଥାନ୍ତି। କ୍ଲାରେ ଓ ଷ୍ଟୋକ୍ସଙ୍କ ଲେଟନ ଓ ଲିବି ନାମରେ ଗୋଟିଏ ପୁଅ ଓ ଝିଅ ସନ୍ତାନ ରହିଛି।