ଭାରତୀୟ କ୍ରିକେଟ୍ ଖେଳାଳି କ୍ରୁନାଲ ପାଣ୍ଡ୍ୟା ଆସି ୩୦ ବର୍ଷରେ ପଦାର୍ପଣ କରିଛନ୍ତି। ମାର୍ଚ୍ଚ ୨୪, ୧୯୯୧ରେ ସେ ଗୁଜରାଟର ବରୋଦାରେ ଜନ୍ମଗ୍ରହଣ କରିଥିଲେ। ବରୋଦା ଦଳର ଅଧିନାୟକ ୩୦ ବର୍ଷୀୟ କ୍ରୁନାଲ ଭାରତର ତାରକା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ବଡ ଭାଇ। ଜନ୍ମଦିନର ଗୋଟିଏ ଦିନ ପୂର୍ବରୁ, କ୍ରୁନାଲ ଏକ ଏକଦିବସୀୟ ଡେବ୍ୟୁ କରିବାର ସୁଯୋଗ ପାଇଲେ ଏବଂ ପ୍ରଥମ ମ୍ୟାଚ୍ ଅର୍ଦ୍ଧଶତକ ହାସଲ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ॥ ଟିମ ଇଣ୍ଡିଆର ଅଲରାଉଣ୍ଡର ତଥା ମୁମ୍ବାଇ ଇଣ୍ଡିଆନ୍ସର ଗୁରୁତ୍ୱପୂର୍ଣ୍ଣ ଖେଳାଳି କ୍ରୁନାଲ ପାଣ୍ଡ୍ୟାଙ୍କ ବ୍ୟକ୍ତିଗତ ଜୀବନ ଅତ୍ୟନ୍ତ ରୋଚକ। କ୍ରୁନାଲ ପାଣ୍ଡ୍ୟା ଏକ ସାକ୍ଷାତକାରରେ କହିଥିଲେ ମୋର ଏବଂ ହାର୍ଦ୍ଦିକଙ୍କର ବହୁତ ସାଙ୍ଗ ନ ଥିଲେ। ଆମେ ସ୍କୁଲକୁ ଯାଇ ପଡ଼ିଆରେ କ୍ରିକେଟ୍ ଖେଲୁଥିଲୁ। ମୁଁ ଦଶମରେ ୩ ଥର ଫେଲ୍ ହୋଇଥିଲି, କିନ୍ତୁ ମୁଁ ହାର ମାନିଲି ନାହିଁ ଏବଂ ଏହା ପରେ ମୁଁ ମଧ୍ୟ କଲେଜ ପାସ କଲି । ମୋ ଭିତରେ କୌଣସି ସ୍ଥାନରେ ଭୟ ଥିଲା ଯେ ଯଦି କ୍ରିକେଟରେ କିଛି ନହୁଏ, ତେବେ ଶିକ୍ଷା ଆବଶ୍ୟକ, ଅନ୍ତତଃ ପକ୍ଷେ ମୁଁ ପେଟ ପୋଷି ପାରିବି।
ବହୁ ପରିଶ୍ରମ ପରେ କ୍ରୁନାଲ ଏବଂ ହାର୍ଦ୍ଦିକ ପାଣ୍ଡ୍ୟା କ୍ରିକେଟରେ ଯାତ୍ରା ଆରମ୍ଭ କରିବାକୁ ନିଷ୍ପତ୍ତି ନେଇଥିଲେ। କ୍ରୁନାଲଙ୍କୁ ସ୍ପିଡ୍ ପୋଷ୍ଟ ସରକାରୀ ଚାକିରି ମଧ୍ୟ ମିଳିଥିଲା, ଯାହାକୁ ସେ ଗ୍ରହଣ କରି ନ ଥିଲେ। ଯେଉଁଦିନ ଚାକିରି ପାଇଁ ଚିଠି ପାଇଥିଲେ ସେଦିନ ତାଙ୍କର ସୟଦ ମୁସ୍ତାକ ଅଲି ଟ୍ରଫି ପାଇଁ ଟ୍ରାଏଲ୍ ମ୍ୟାଚ୍ ଥିଲା। କ୍ରୁନାଲ ନିଷ୍ପତ୍ତି ନେଇଥିଲେ ଗତ ଅଢେଇ ବର୍ଷ ମଧ୍ୟରେ କଠିନ ପରିଶ୍ରମ କରିଛି କିନ୍ତୁ ଏହି ସ୍ପିଡ ପୋଷ୍ଟ ଚାକିରି ପାଇଁ ନୁହେଁ। ଭଲ କ୍ରିକେଟ ଖେଳିବା ପାଇଁ ମୁଁ କଠିନ ପରିଶ୍ରମ କଲି। ସେନିନର ନିଷ୍ବତ୍ତି ଆଜି ମୋ ଭାଗ୍ୟ ବଦଳାଇ ଦେଇଛି ବୋଲି କ୍ରୁନାଲ କହିଛନ୍ତି।
ସୂଚନାଯୋଗ୍ୟ, କ୍ରୁନାଲ ପାଣ୍ଡ୍ୟା ତାଙ୍କର ପ୍ରଥମ ଦିନିକିଆରେ ବିସ୍ଫୋରକ ଇନିଂଶ ଖେଳିଥିଲେ। ସେ ୨୬ ବଲରୁ ଅର୍ଦ୍ଧଶତକ ପୂରଣ କରିଥିଲେ। ଭାରତୀୟ ବ୍ୟାଟ୍ସମ୍ୟାନ ଡେବ୍ୟୁ ମ୍ୟାଚରେ ଏହା ହେଉଛି ସବୁଠୁ ଦ୍ରୁତତମ ଅର୍ଦ୍ଧଶତକ। ସେ ଏହି ଇନିଂସକୁ ତାଙ୍କ ପିତା ହିମାଂଶୁ ପାଣ୍ଡ୍ୟାଙ୍କୁ ଉତ୍ସର୍ଗ କରିଥିଲେ।