ନୂଆଦିଲ୍ଲୀ,୧୩।୧୦: ଭାରତୀୟ କ୍ରିକେଟର୍ ବିରାଟ କୋହଲିଙ୍କୁ ଅଧିନାୟକ ଭାବରେ ପ୍ରମାଣ କରିବାକୁ ବହୁତ କମ ସମୟ ବାକି ଅଛି। ଯଦି ବିରାଟ କୋହଲି ଭାରତକୁ ୨୦୨୧ ଟି -୨୦ ବିଶ୍ୱକପ, ୨୦୨୨ ଟି -୨୦ ବିଶ୍ୱକପ ଏବଂ ୨୦୨୩ ଦିନିକିଆ ବିଶ୍ୱକପ ମଧ୍ୟରୁ କୌଣସି ଟୁର୍ନାମେଣ୍ଟର ଟ୍ରଫି ପାଇବାରେ ସକ୍ଷମ ନ ହୁଅନ୍ତି, ତେବେ ତାଙ୍କୁ ଅଧିନାୟକ ପଦରୁ ଅବ୍ୟାହତି ଦିଆଯାଇପାରେ। ୨୦୨୩ ଦିନିକିଆ ବିଶ୍ୱକପ ପରେ ବିରାଟ କୋହଲିଙ୍କ ବୟସ ୩୪-୩୫ ବର୍ଷ ହୋଇଥିବ। ଏଭଳି ପରିସ୍ଥିତିରେ ଭାରତୀୟ ଦଳ ନୂଆ ଅଧିନାୟକ ଖୋଜିବେ। ଏପରି ଜଣେ ଖେଳାଳି ଅଛନ୍ତି ଯିଏ, ବିରାଟ କୋହଲିଙ୍କ ବଦଳରେ ଟିମ ଇଣ୍ଡିଆର ସ୍ଥାୟୀ ଅଧିନାୟକ ହୋଇପାରିବେ।
ଦକ୍ଷିଣ ଆଫ୍ରିକାର ପୂର୍ବତନ ଅଲରାଉଣ୍ଡର ଲାନ୍ସ କ୍ଲୁସନରଙ୍କ ଅନୁଯାୟୀ ରିଷଭ ପନ୍ତ ଭବିଷ୍ୟତରେ ଭାରତୀୟ ଦଳର ଅଧିନାୟକ ହେବେ। ଏକ ସାକ୍ଷାତକାରରେ ସେ କହିଛନ୍ତି, ରୋହିତ ଶର୍ମା କିଛି ସମୟ ପାଇଁ ଭାରତୀୟ ଟି -୨୦ ଦଳର ଦାୟିତ୍ୱ ନେବା ଉଚିତ୍, କିନ୍ତୁ ଏହି ସମୟ ମଧ୍ୟରେ ରିଷଭ ପନ୍ତ ଅଧିନାୟକତ୍ୱ ପାଇଁ ପ୍ରସ୍ତୁତ ହେବା ଆବଶ୍ୟକ। ମୁଁ ଦିନେ ରିଷଭ ପନ୍ତଙ୍କ ଅଧିନାୟକରେ ଭାରତୀୟ ଦଳକୁ ଦେଖିବାକୁ ଚାହୁଁଛି। ସେ ଏବେ ଯୁବକ। ତାଙ୍କଠାରୁ ଅନେକ କ୍ରିକେଟ୍ ବାକି ଅଛି। ମୁଁ ଭାବୁଛି ଯଦି ବିରାଟ କୋହଲିଙ୍କ ଉତ୍ତରାଧିକାରୀ ଭାବରେ ପନ୍ତ ହିଁ ଉପଯୁକ୍ତ। କାରଣ ରୋହିତ ଶର୍ମା ମଧ୍ୟ ଆଉ ବେଶୀ ଦିନ ଅଧିନାୟକ ଦାୟିତ୍ୱ ସମ୍ଭାଳିପାରିବେ ନାହିଁ। ତାଙ୍କ ହାତରେ ବୟସ ବେଶୀ ନାହିଁ। ତେଣୁ ରିଷଭଙ୍କୁ ଏବେଠାରୁ ପ୍ରସ୍ତୁତି କରିବାକୁ ପଡ଼ିବ ବୋଲି ସେ କହିଛନ୍ତି।
କାନ୍ଧରେ ଆଘାତ ହେତୁ ଶ୍ରେୟସ ଆୟର୍ ଆଇପିଏଲ ୨୦୨୧ର ପ୍ରଥମ ପର୍ଯ୍ୟାୟରୁ ବାଦ ପଡିଥିଲେ। ଏହାପରେ ରିଷଭଙ୍କ ଅଧିନାୟିକତ୍ୱରେ ଚମତ୍କାର ପ୍ରଦର୍ଶନ କରି ଦିଲ୍ଲୀକୁ ପଏଣ୍ଟ ଟେବୁଲର ଶୀର୍ଷକୁ ନେଇଥିଲେ। ଏହା ପରେ ରିଷଭଙ୍କୁ ସମଗ୍ର ସିଜିନ୍ ପାଇଁ ଅଧିନାୟକ କରାଯାଇଥିଲା। ରିଷଭଙ୍କ ଅଧିନାୟକତ୍ୱରେ ଦିଲ୍ଲୀ କ୍ୟାପିଟାଲ୍ସ ପଏଣ୍ଟ ଅଫରେ ଶୀର୍ଷରେ ଥିବାବେଳେ ପ୍ଲେ ଅଫରେ ପହଞ୍ଚିଥିଲା। ତେବେ ସିଏସକେ ହାତରେ ପ୍ରଥମ ଯୋଗ୍ୟତା ପର୍ଯ୍ୟାୟରେ ସେ ପରାସ୍ତ ହୋଇଥିଲେ। ଏବେ ଦ୍ୱିତୀୟ ଯୋଗ୍ୟତା ପର୍ଯ୍ୟାୟରେ ଦିଲ୍ଲୀ କ୍ୟାପିଟାଲ୍ସ କେକେଆରକୁ ଭେଟିବ।