ଦୁବାଇ, ୨୪।୮: କରୋନା ମହାମାରୀ ମଧ୍ୟରେ ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ଆରମ୍ଭ ହେବାକୁ ଯାଉଛି। ଚଳିତ ବର୍ଷ କରୋନା ଲାଗି ଆଇପିଏଲ୍ର ତ୍ରୟୋଦଶ ସଂସ୍କରଣ ଭାରତ ବଦଳରେ ୟୁଏଇରେ ସେପ୍ଟେମ୍ବର ୧୯ରୁ ନଭେମ୍ବର ୧୦ ତାରିଖ ପର୍ଯ୍ୟନ୍ତ ଖେଳାଯିବ। ଏଥିଲାଗି ଆଇପିଏଲ୍ର ସମସ୍ତ ୮ଟି ଯାକ ଫ୍ରାଞ୍ଚାଇଜ୍ ପର୍ଯ୍ୟାୟକ୍ରମେ ୟୁଏଇରେ ପହଞ୍ଚି ସାରିଛନ୍ତି। ପୂର୍ବରୁ ୬ଟି ଫ୍ରାଞ୍ଚାଇଜ ଦୁବାଇରେ ପହଞ୍ଚିଥିବାବେଳେ ଦିଲ୍ଲୀ କ୍ୟାପିଟାଲ୍ସ ଓ ସନ୍ରାଇଜର୍ସ ହାଇଦ୍ରାବାଦର ଖେଳାଳି ଓ ସପୋର୍ଟ ଷ୍ଟାଫ୍ ରବିବାର ଆଇପିଏଲ୍ରେ ଅଂଶଗ୍ରହଣ କରିବା ଲାଗି ସେଠାରେ ପହଞ୍ଚିଛନ୍ତି। ହାଇଦ୍ରାବାଦ ପରେ ଦିଲ୍ଲୀ ଖେଳାଳି ଦୁବାଇରେ ଅବତାରଣ କରିଥିଲା। ଫଳରେ ସର୍ବଶେଷ ଦଳ ଭାବେ ଦୁବାଇରେ ପାଦ ଥାପିଛି ଦିଲ୍ଲୀ କ୍ୟାପିଟାଲ୍ସ। ଏଥିପୂର୍ବରୁ ଚେନ୍ନାଇ ସୁପର୍ କିଙ୍ଗ୍ସ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର, କିଙ୍ଗ୍ସ ଇଲେଭେନ ପଞ୍ଜାବ, କୋଲକାତା ନାଇଟ୍ ରାଇଡର୍ସ ଓ ମୁମ୍ବାଇ ଇଣ୍ଡିଆନ୍ସର ଖେଳାଳିମାନେ ଦୁବାଇରେ ପହଞ୍ଚି ସାରିଥିଲେ। ବିସିସିଆଇର କରୋନ ନିୟମ ଅନୁଯୟେୀ ସମସ୍ତ ଖେଳାଳି ଓ ଷ୍ଟାଫ୍ ହୋଟେଲ ରୁମ୍ରେ ୬ ଦିନ ଲାଗି କ୍ୱାରାଣ୍ଟାଇନରେ ରହିବେ। ଏହି ଅବସରରେ ଖେଳାଳିଙ୍କ କରୋନା ଟେଷ୍ଟ ୩ଥର କରାଯିବ।