ଗୁଣ୍ଟୁର, ୧୩।୭- ନିଜର ଦମ୍ଦାର ବ୍ୟାଟିଂ ବଳରେ ଭାରତକୁ ଅନେକ ମ୍ୟାଚ୍ରେ ବିଜୟୀ କରାଇଥିବା ବ୍ୟାଟ୍ସମ୍ୟାନ ଅମ୍ବାତି ରାୟୁଡ଼ୁଙ୍କ ପାଇଁ ଖୁସି ଖବର। ରାୟୁଡ଼ୁ ପିତୃତ୍ୱ ଲାଭ କରିଛନ୍ତି। ତାଙ୍କ ସ୍ତ୍ରୀ ଚେନ୍ନୁପଲ୍ଲୀ ବିଦ୍ୟା ରବିବାର ଏକ କନ୍ୟା ସନ୍ତାନ ପ୍ରସବ କରିଛନ୍ତି। ରାୟଡ଼ୁ ଇନ୍ଷ୍ଟାଗ୍ରାମରେ ସ୍ତ୍ରୀ ଓ ନବଜାତ କନ୍ୟାର ଏକ ଫଟୋ ଶେୟାର କରି ଏହି ଖୁସି ଖବର ପ୍ରଶଂସକଙ୍କୁ ଜଣାଇଛନ୍ତି। ୩୪ ବର୍ଷୀୟ ରାୟୁଡୁ ତାଙ୍କ କଲେଜ ବାନ୍ଧବୀ ବିଦ୍ୟାଙ୍କୁ ୨୦୦୯ରେ ବିବାହ କରିଥିଲେ। ଏହି ଅବସରରେ ସୋସିଆଲ ମିଡିଆରେ ରାୟୁଡୁଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ଭାରତୀୟ କ୍ରିକେଟର୍ ସୁରେଶ ରାଇନା, ଆର୍.ପି. ସିଂ, ରବିନ୍ଦ୍ର ଉଥପ୍ପାଙ୍କ ସମେତ ରାୟୁଡୁଙ୍କ ଆଇପିଏଲ୍ ଟିମ୍ ଚେନ୍ନାଇ ସୁପର୍ କିଙ୍ଗ୍ସ ପକ୍ଷରୁ ମଧ୍ୟ ଶୁଭେଚ୍ଛା ପ୍ରଦାନ କରାଯାଇଛି। ଏଠାରେ ଉଲ୍ଲେଖଯୋଗ୍ୟ, ଗୁଣ୍ଟୁର ଜନ୍ମିତ ରାୟୁଡୁ ୨୦୧୩ରେ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ସେ ଭାରତ ପକ୍ଷରୁ ୫୫ ଦିନିକିଆ ଓ ୬ ଟି୨୦ ମ୍ୟାଚ୍ ଖେଳି ଯଥାକ୍ରମେ ୧୬୯୪ ଓ ୪୨ ରନ ସଂଗ୍ରହ କରିଛନ୍ତି। ଦିନିକିଆରେ ସେ ୩ ଶତକ ସହ ୪୭ରୁ ଊର୍ଦ୍ଧ୍ୱ ଆଭରେଜରେ ବ୍ୟାଟିଂ କରିଥିଲେ। ଏକଦା ଭାରତୀୟ ଦିନିକିଆ ଦଳରେ ୪ର୍ଥ ନମ୍ବର ସ୍ଥାନ ପାଇଁ ତାଙ୍କୁ ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ବିବେଚନା କରାଯାଉଥିଲା। କିନ୍ତୁ ୨୦୧୯ ବିଶ୍ୱକପ୍ରେ ତାଙ୍କୁ ଭାରତୀୟ ଦଳରେ ସ୍ଥାନ ନ ମିଳି ନ ଥିଲା। ୪ ନମ୍ବର ପାଇଁ ବିଜୟ ଶଙ୍କରଙ୍କୁ ଚୟନ କରାଯିବା ପରେ ରାୟୁଡୁ କ୍ଷୋଭ ପ୍ରକାଶ କରି ଗତ ବର୍ଷ ଜୁଲାଇରେ କ୍ରିକେଟ୍ରୁ ସନ୍ନ୍ୟାସ ନେଇଥିଲେ। କିନ୍ତୁ ଏହାର ଗୋଟିଏ ମାସ ପରେ ବହୁ ସିନିୟର ଖେଳାଳି ତାଙ୍କୁ ବୁଝାଇ କ୍ରିକେଟ୍କୁ ପ୍ରତ୍ୟାବର୍ତ୍ତନ କରାଇଥିଲେ।
