ମେଲବୋର୍ନ,୨୯।୧୨: ମେଲବୋର୍ନରେ ଖେଳାଯାଇଥିବା ଭାରତ ଏବଂ ଅଷ୍ଟ୍ରେଲିଆ ବକ୍ସିଂ ଡେ’ ଟେଷ୍ଟ ମ୍ୟାଚରେ ଟିମ ଇଣ୍ଡିଆର ବିଜୟରେ ରବିନ୍ଦ୍ର ଜାଡେଜା ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ପ୍ରଥମ ଇନିଂସରେ ୫୭ ରନ ସଂଗ୍ରହ କରିଥିବା ଜାଡେଜା ମଧ୍ୟ ଏହି ମ୍ୟାଚରେ ୩ଟି ଉଇକେଟ ନେଇଥିଲେ। ଭାରତର ପ୍ରଥମ ଇନିଂସରେ ସେ ଅଧିନାୟକ ଅଜିଙ୍କ୍ୟ ରାହାନେଙ୍କ ସହ ୧୨୧ ରନର ଭାଗିଦାରୀ ଖେଳିଥିଲେ, ଯାହା ଟିମ ଇଣ୍ଡିଆକୁ ଆଗେଇ ନେବାରେ ସାହାଯ୍ୟ କରିଥିଲା। ଏହା ଜାଡେଜାଙ୍କ ୫୦ତମ ଟେଷ୍ଟ ମ୍ୟାଚ ଥିଲା। ଏହି ମ୍ୟାଚ୍ରେ ଭାରତୀୟ ଦଳ ସ୍ମରଣୀୟ ବିଜୟ ହାସଲ କରିଛ। ଅଲରାଉଣ୍ଡର ଜାଡେଜା ପରେ ବିରାଟ କୋହଲି ଏବଂ ମହେନ୍ଦ୍ର ସିଂ ଧୋନୀ କ୍ରିକେଟର ୩ଟି ଫର୍ମାଟରେ ୫୦ କିମ୍ବା ଅଧିକ ମ୍ୟାଚ ଖେଳିଥିବା ତୃତୀୟ ଭାରତୀୟ ଖେଳାଳି ହୋଇଛନ୍ତି।ଜାଡେଜା ଟୁଇଟ୍ କରି କହିଛନ୍ତି, ମାହି ଭୋଇ ଏବଂ ବିରାଟଙ୍କ କ୍ଲବରେ ସାମିଲ ହେବା ଅତ୍ୟନ୍ତ ଗୌରବର ବିଷୟ, ଭାରତ ପାଇଁ ୩ଟି ଫର୍ମାଟରେ ୫୦ରୁ ଅଧିକ ମ୍ୟାଚ ଖେଳିଛନ୍ତି। ମୋ ବିଶ୍ୱାସ ଏବଂ ସମର୍ଥନ ଜଣାଇବା ପାଇଁ ବିସିସିଆଇ, ମୋର ସାଥୀ ଖେଳାଳି ଏବଂ ସପୋର୍ଟ ଷ୍ଟାଫ୍ଙ୍କୁ ଧନ୍ୟବାଦ। ଆଶା କରୁଛି ଏହା ଆହୁରି ଆଗକୁ ମଧ୍ୟ ଚାଲିବ। ଜୟ ହିନ୍ଦ।
୨୦୦୯ରେ ଅନ୍ତର୍ଜାତୀୟ କ୍ରିକେଟରେ ଡେବ୍ୟୁ କରିଥିବା ଜାଡେଜା ଏପର୍ଯ୍ୟନ୍ତ ୫୦ଟି ଟେଷ୍ଟ, ୫୦ ଟି-୨୦ ମ୍ୟାଚ ଏବଂ ୧୬୮ଟି ଏକଦିବସୀୟ ମ୍ୟାଚ୍ ଖେଳିଛନ୍ତି। ସେ ଟେଷ୍ଟରେ ୨୧୬ ଉଇକେଟ, ଏକଦିବସୀୟରେ ୧୮୮ ଉଇକେଟ ଏବଂ ଟି-୨୦ରେ ୩୯ ଉଇକେଟ ନେଇଛନ୍ତି। ଟେଷ୍ଟରେ ୧୯୨୬, ଏକଦିବସୀୟରେ ୨୪୧୧ ଏବଂ ଟି-୨୦ରେ ୨୦୧୬ ସ୍କୋର କରିଥିଲେ।
