ଲକ୍ଷ୍ନୌ: ରକ୍ଷାବନ୍ଧନ ପର୍ବକୁ ନେଇ ସାରା ଦେଶରେ ଉତ୍ସାହ ଭରି ରହିଥିବା ବେଳେ ଏମିତି ଏକ ଗାଁ ରହିଛି ଯେଉଁଠି ଏହି ପର୍ବ ପାଳନକୁ ଅଶୁଭ ବୋଲି ଧରାଯାଏ। ଏଭଳି ଏକ ଗାଁ ହେଉଛି ଉତ୍ତରପ୍ରଦେଶର ଗୋଣ୍ଡା ଜିଲାର ଜଗତପୁରବା। ଏହି ଗାଁରେ ଭଉଣୀମାନେ କେବେହେଲେ ସେମାନଙ୍କ ଭାଇ ହାତରେ ରାଖୀ ବାନ୍ଧନ୍ତି ନାହିଁ। ଗାଁ ଲୋକଙ୍କର ବିଶ୍ୱାସ ରହିଛି କି ରାଖୀ ବାନ୍ଧିଲେ ଘରେ ଅଶୁଭ ଘଟଣା ଘଟିବ।
ଗାଁରେ ପୂର୍ବଜମାନେ ଏହି ଉତ୍ସବ ପାଳନ କରିବା ପାଇଁ କଟକଣା ଆରମ୍ଭ କରିଥିଲେ। କୁହାଯାଏ ବହୁ ବର୍ଷ ପୂର୍ବେ ଥରେ ରକ୍ଷାବନ୍ଧନ ଦିନ ଏହି ଗାଁରେ ଜଣେ ଯୁବକଙ୍କର ହଠାତ୍ ମୃତ୍ୟୁ ହୋଇଯାଇଥିଲା। ସଂଯୋଗବଶତଃ ସେଦିନ ରାଖୀପୂର୍ଣ୍ଣିମା ଥିଲା ଓ ଯୁବକଜଣକ ମଧ୍ୟ ରାଖୀ ବାନ୍ଧିଥିଲେ। ତେଣୁ ଏଭଳି ଦୁର୍ଘଟଣା ଘଟିବା ପରେ ଲୋକେ ରାଖୀପୂର୍ଣ୍ଣିମା ଦିନଟିକୁ ଅଶୁଭ ବୋଲି ଧରି ନେଇଥିଲେ। ସେହିଦିନ ଠାରୁ ଗାଁରେ ରାଖୀପୂର୍ଣ୍ଣିମା ଉତ୍ସବ ପାଳନ କରାଯାଏ ନାହିଁ। ବହୁ ବର୍ଷର ଏହି ବିଶ୍ୱାସ ପିଢ଼ି ପରେ ପିଢ଼ି ଶୁଣିବା ଫଳରେ ରାଖୀ ବାନ୍ଧିବାକୁ ଭୟ କରୁଛନ୍ତି। ଏମିତି କି ଏହି ଗାଁର ଯୁବତୀମାନେ ଅନ୍ୟ ଗାଁକୁ ବିବାହ କରିଯିବା ପରେ ବି ସେଠାରେ ଅନ୍ୟ କାହା ହାତରେ ରାଖୀ ବାନ୍ଧିବା ପାଇଁ ପସନ୍ଦ କରୁନାହାନ୍ତି।