ୟୁଏଇ,୧୮।୮: ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଏବଂ ନ୍ୟୁଜିଲାଣ୍ଡ ମଧ୍ୟରେ ୩ ମ୍ୟାଚ ବିଶିଷ୍ଟ ଟି-୨୦ ସିରିଜ ୧୭ ଅଗଷ୍ଟରୁ ଆରମ୍ଭ ହୋଇଛି। ପ୍ରଥମ ମ୍ୟାଚ ଅତ୍ୟନ୍ତ ରୋମାଞ୍ଚକର ଥିଲା। କିୱି ଦଳ ଶେଷରେ ୧୯ ରନ୍ରେ ମ୍ୟାଚ ଜିତି ସିରିଜରେ ୧-୦ ଅଗ୍ରଣୀ ହାସଲ କରିଥିଲା। ଏହି ମ୍ୟାଚରେ କିଛି ଦେଖିବାକୁ ମିଳିଥିଲା, ଯାହା ଅନ୍ତର୍ଜାତୀୟ ଟି-୨୦ କ୍ରିକେଟ ଇତିହାସରେ ଏପର୍ଯ୍ୟନ୍ତ ଦେଖାଯାଇ ନ ଥିଲା। ଏହି ମ୍ୟାଚ୍ରେ ଉଭୟ ଦଳ ନିଜ ଇନିଂସର ପ୍ରଥମ ବଲରେ ଉଇକେଟ ହରାଇଥିଲେ।
ଅନ୍ତର୍ଜାତୀୟ ଟି-୨୦ କ୍ରିକେଟ ଇତିହାସରେ ପ୍ରଥମ ଥର ପାଇଁ ଏହା ଦେଖିବାକୁ ମିଳିଥିଲା। ନ୍ୟୁଜିଲାଣ୍ଡ ଦଳ ମ୍ୟାଚରେ ପ୍ରଥମେ ବ୍ୟାଟିଂ କରିବାର ସୁଯୋଗ ପାଇଥିଲା ଏବଂ ଜୁନାଦ ସିଦ୍ଦିକି ଚାଡ ବାଉସଙ୍କ ଉଇକେଟ ନେଇ ପ୍ରଥମ ଝଟକା ଦେଇଥିଲେ। ଏଥି ସହିତ, ୟୁଏଇ ଦଳ ଅଧିନାୟକ ମହମ୍ମଦ ୱାସିମଙ୍କ ଇନିଂସର ପ୍ରଥମ ବଲରେ କିୱି ଅଧିନାୟକ ଟିମ ସାଉଥିଙ୍କ ଦ୍ୱାରା ଶିକାର ହୋଇଥିଲେ।