କରୋନା ଯୋଗୁ ଜାରି ରହିଥିବା ଲକ୍ଡାଉନ୍ ସମୟରେ ପ୍ରବାସୀ ଶ୍ରମିକଙ୍କୁ ସାହାଯ୍ୟକରି ଚର୍ଚ୍ଚାରେ ବଲିଉଡ୍ ଅଭିନେତା ସୋନୁ ସୁଦ। କେଉଁଠି କୃଷକଙ୍କ ପାଇଁ ସେ ଟ୍ରାକ୍ଟର ପଠାଉଛନ୍ତି ତ ଆଉ କାହାକୁ ଚାକରି ଦେଉଛନ୍ତି। ଏହି କାରଣରୁ ଲୋକେ ତାଙ୍କୁ ଏବେ ଭଗବାନ ଭଳି ପୂଜା କରୁଛନ୍ତି। ସେ ୩ ଲକ୍ଷ ଲୋକଙ୍କୁ ଚାକିରି ଦେବା ନେଇ ମଧ୍ୟ ଘୋଷଣା କରିଛନ୍ତି। ଏଥିପାଇଁ ଏକ ଓ୍ବେବ୍ସାଇଟ୍ ମଧ୍ୟ ଖୋଲିଛନ୍ତି। ହେଲେ ଏବେ ଜଣେ ପିଲାକୁ ଭିଡିଓଗେମ୍ର ଆବଶ୍ୟକତା ପଡିବାରୁ ସେଥିପାଇଁ ସେ ସୋନୁଙ୍କୁ ଟୁଇଟ୍ କରି ଜଣାଇଛନ୍ତି। ସେ ଟୁଇଟ୍ରେ ଲେଖିଛନ୍ତି, ସର୍ ମୋତେ ଗୋଟିଏ ପିଏସ୍୪(ଭିଡିଓଗେମ୍) ଦେଇ ପାରିବେ? ଲକ୍ଡାଉନ୍ରେ ସବୁ ପିଲାମାନେ ଗେମ୍ ଖେଳୁଛନ୍ତି। କିନ୍ତୁ ମୋ ପାଖରେ ତାହା ନାହିଁ। ଏହାର ଉତ୍ତରରେ ସୋନୁ ଲେଖିଛନ୍ତି, ଯଦି ତୁମ ପାଖରେ ପିଏସ୍୪ ନାହିଁ ତେବେ ତୁମେ ଭାଗ୍ୟବାନ୍। କିଛି ବହି ନେଇ ପାଠ ପଢ଼। ଏଥିପାଇଁ ମୁଁ ତୁମକୁ ସାହାଯ୍ୟ କରିପାରିବି ବୋଲି ସୋନୁ କହିଛନ୍ତି। ସୋନୁଙ୍କ ଏହି ଟୁଇଟ୍ ସମସ୍ତଙ୍କ ହୃଦୟ ଜିତିନେଇଛି।