ଲାହୋର, ୨୦।୮: ଯୁବ କ୍ରିକେଟର୍ଙ୍କ ଭବିଷ୍ୟତକୁ ଆହୁରି ଉଜ୍ଜଳ କରିବା ପାଇଁ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଏକ ବଡ଼ ପଦକ୍ଷେପ ନେଇଛି। ପୂର୍ବତନ ଅଧିନାୟକ ତଥା ମହାନ ବ୍ୟାଟ୍ସମ୍ୟାନ ମହମ୍ମଦ ୟୁସୁଫ୍ଙ୍କୁ ଗୁରୁବାର ଲାହୋରସ୍ଥିତ ଜାତୀୟ ହାଇପରଫର୍ମାନ୍ସ ସେଣ୍ଟରର ବ୍ୟାଟିଂ କୋଚ୍ ନିଯୁକ୍ତ କରିଛି। ଏହି ଦାୟିତ୍ୱ ଠିକ୍ ରାହୁଲ ଡ୍ରାଭିଡ୍ଙ୍କ ପରି। ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ପକ୍ଷରୁ ଯେପରି ଡ୍ରାଭିଡ୍ଙ୍କୁ ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ୍ ଏକାଡେମୀ (ଏନ୍ଏସି)ର ମୁଖ୍ୟ ଭାବେ ପୂର୍ବରୁ ନିଯୁକ୍ତ କରିଛି ଠିକ୍ ସେହିଭଳି ପିସିବି ୪୫ ବର୍ଷୀୟ ୟୁସୁଫ୍ଙ୍କୁ ଏକ ବଡ଼ ଦାୟିତ୍ୱ ପ୍ରଦାନ କରିଛି। ୟୁସୁଫ୍ଙ୍କ ବ୍ୟତୀତ ପୂର୍ବତନ ଲେଗ୍-ସ୍ପିନର ମୁସ୍ତାକ ଅହମ୍ମଦଙ୍କୁ ମଧ୍ୟ ସ୍ପିନ ବୋଲିଂ ପରାମର୍ଶଦାତା ଭାବେ ନିଯୁକ୍ତ କରିଛି। କୋଚିଂ କ୍ୟାରିୟରକୁ ନେଇ ୟୁସୁଫ୍ କହିଛନ୍ତି, ‘ଏହି ସୁଯୋଗ ପାଇ ମୁଁ ମହୁତ ଖୁସି। ମୁଁ ନିଶ୍ଚିତ ଯେ, ମୋର ଜ୍ଞାନ ଓ ଅଭିଜ୍ଞତା ସହିତ ଯୁବ କ୍ରିକେଟର୍ଙ୍କୁ ସାହାଯ୍ୟ କରିପାରିବି।’
ଖ୍ରୀଷ୍ଟିଆନ ପରିବାରରେ ଜନ୍ମଗ୍ରହଣ କରିଥିବା ୟୁସୁଫ୍ ପୂର୍ବରୁ କ୍ରିକେଟ୍ ଜଗତରେ ୟୁସୁଫ୍ ୟୋହାନ ଭାବରେ ପରିଚିତ ଥିଲେ। କିନ୍ତୁ ପରେ ସେ ଧର୍ମ ପରିବର୍ତ୍ତନ କରି ମହମ୍ମଦ ୟୁସୁଫ୍ ହୋଇଥିଲେ। ପାକିସ୍ତାନ ପକ୍ଷରୁ ସେ ୯୦ ଟେଷ୍ଟ ମ୍ୟାଚ୍ ଖେଳି ୫୨ରୁ ଊର୍ଦ୍ଧ୍ୱ ଆଭରେଜରେ ୭,୫୩୦ ରନ୍ ସଂଗ୍ରହ କରିଛନ୍ତି। ଯାହା ମଧ୍ୟୟରେ ୨୪ ଶତକ ସାମିଲ ରହିଛି। ଏହା ବ୍ୟତୀତ ସେ ୨୮୮ ଦିନିକିଆ ମ୍ୟାଚ୍ ଖେଳି ୧୫ ଶତକ ସହାୟତାରେ ୯,୭୨୦ ରନ୍ କରିଛନ୍ତି। ଏକ ଗରିବ ପରିବାରରେ ଜନ୍ମଗ୍ରହଣ କରିଥିବା ୟୁସୁଫଙ୍କ ବାପା ଲାହୋର ଷ୍ଟେସନର ସଫେଇ କର୍ମଚାରୀ ଥିଲେ। ୟୁସୁଫ୍ ମଧ୍ୟ ଛୋଟବେଳେ ଟେଲର ଦୋକାନରେ କାମ କରିଥିଲେ। ଏପରିକି ଟେଲର ଦୋକାନରେ କାମ କରିବା ସହ ପରିବାରର ବୋଝ ହାଲ୍କା ହେବା ଲାଗି ସେ ରିକ୍ସା ମଧ୍ୟ ଚଲାଉଥିଲେ। ଅନ୍ୟପିଲାଙ୍କ ପରି କ୍ରିକେଟ୍ ଖେଳିବାକୁ ଇଚ୍ଛା ଥିଲେ ମଧ୍ୟ ବ୍ୟାଟ୍ କିଣିବାକୁ ପାଖରେ ତାଙ୍କ ପଇସା ନ ଥିଲା। ତେଣୁ ସେ ନିଜେ ଗଛର କାଠରୁ ବ୍ୟାଟ୍ ପ୍ରସ୍ତୁତ କରି ଟେନିସ ବଲ୍ରେ ଖେଳୁଥିଲେ। ୟୁସୁଫ୍ଙ୍କୁ ଯେତେବେଳେ ୧୬ ବର୍ଷ ହୋଇଥିଲା ଲାହୋରର ଗୋଲ୍ଡେନ ଜିମ୍ଖାନ୍ନା କ୍ଲବର ଦୃଷ୍ଟି ତାଙ୍କ ପ୍ରତିଭା ଉପରେ ପଡ଼ିଥିଲା। ଏହାପରଠାରୁ ସେ ଆଉ ପଛକୁ ଫେରି ଚାହିଁ ନ ଥିଲେ।
