ମୁମ୍ବାଇ,୩୦।୬: ବଲିଉଡ୍ର ମିଷ୍ଟର ଫରଫେକ୍ଟନିଷ୍ଟ ଆମିର ଖାଁଙ୍କ ଘରର ଜଣେ ସଦସ୍ୟ କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିଛି। ଅମିରଙ୍କ ଘରେ କାମ କରୁଥିବା କର୍ମଚାରୀଙ୍କ ମଧ୍ୟରୁ କେତେକଙ୍କ କରୋନା ପଜିଟିଭ୍ ବାହାରିଛି। ମୁମ୍ବାଇ ବିଏମ୍ସି ପକ୍ଷରୁ ସେମାନଙ୍କୁ କ୍ୱାରାଣ୍ଟାଇନ୍ରେ ରଖାଯିବା ସହ ଉକ୍ତ ସୋସାଇଟିକୁ ସାନିଟାଇଜ୍ କରାଯାଇଛି। ଏହାପରେ ଘରର ବାକି ସମସ୍ତ ସଦସ୍ୟଙ୍କର କରୋନା ଯାଞ୍ଜ କରାଯାଇଛି। ତେବେ ସମସ୍ତଙ୍କ ରିପୋର୍ଟ ନେଗେଟିଭ ଆସିଛି ବୋଲି ଆମିର ଟୁଇଟ କରି ସୂଚନା ଦେଇଛନ୍ତି। କେବଳ ତାଙ୍କ ମା’ଙ୍କ କରୋନା ଯାଞ୍ଚ କରାଯାଇ ନ ଥିବା ବେଳେ ଖୁବ୍ଶୀଘ୍ର ତାଙ୍କର ଯାଞ୍ଜ କରାଯିବ। ଦୟାକରି ପ୍ରାର୍ଥନା କରନ୍ତୁ ଯେ, ମା’ଙ୍କ ରିପୋର୍ଟ ନେଗେଟିଭ୍ ଆସୁ। ଆମିର ଟୁଇଟ କରି ନିଜ ପ୍ରଶଂସକଙ୍କୁ ଏଭଳି ନିବେଦନ କରିବା ସହ ଉକ୍ତ ଘଟଣାରେ ବିଏମ୍ସି ଦେଖାଇଥିବା ତତ୍ପରତାକୁ ସେ ବେଶ୍ ପ୍ରଶଂସା କରିଛନ୍ତି। ଏନେଇ ଆମିର ବିଏମ୍ସିକୁ ଧନ୍ୟବାଦ ମଧ୍ୟ ଜଣାଇଛନ୍ତି। ଏତଦ ବ୍ୟତୀତ କୋକିଲାବେନ ହସ୍ପିଟାଲର ଡାକ୍ତର, ନର୍ସ ଓ ସମସ୍ତ ସ୍ବାସ୍ଥ୍ୟ କର୍ମଚାରୀଙ୍କ କାର୍ଯ୍ୟକୁ ସେ ପ୍ରଶଂସା କରିବା ସହ ସମସ୍ତଙ୍କୁ ସୁରକ୍ଷିତ ରହିବାକୁ ନିବେଦନ କରିଛନ୍ତି।
