ନୂଆଦିଲ୍ଲୀ,୧୧।୪ : ଦେଶରେ ତାତି ବୃଦ୍ଧି ନେଇ ସମସ୍ୟାରେ ପଡ଼ିଥିବା ଲୋକଙ୍କୁ ପାଣିପାଗ ବିଭାଗର ପୂର୍ବାନୁମାନ ଆଶ୍ୱସ୍ତି ଦେଇଛି। ଭାରତୀୟ ପାଣିପାଗ ବିଭାଗ (ଆଇଏମଡି) ପକ୍ଷରୁ ପୂର୍ବାନୁମାନ କରାଯାଇଛି , ଚଳିତ ମୌସୁମୀ ସ୍ବଭାବିକ ହେବ। ଆଇଏମଡି କହିଛି ଚଳିତ ବର୍ଷ ଜୁନ ରୁ ସେପ୍ଟେମ୍ବର ମାସରେ ଦେଶରେ ୮୩.୫ ମିଲି ବର୍ଷା ହେବ। ବିଭାଗ ଅନୁଯାୟୀ, ଚଳିତ ବର୍ଷ ଜୁନ ରୁ ସେପ୍ଟେମ୍ବର ମଧ୍ୟରେ ୯୬ ପ୍ରତିଶତ ବୃଷ୍ଟିପାତ ରେକର୍ଡ ହେବାର ସମ୍ଭାବନା ରହିଛି। ଏହା ସାଧାରଣ ବର୍ଷା ବର୍ଗରେ ଆସିଥାଏ ।
ପୃଥିବୀ ବିଜ୍ଞାନ ମନ୍ତ୍ରଣାଳୟର ସଚିବ ଏମ ରବିଚନ୍ଦ୍ରନଙ୍କ ଅନୁଯାୟୀ ଦକ୍ଷିଣ-ପଶ୍ଚିମ ମୌସୁମୀ ସମୟରେ ଭାରତରେ ଚଳିତ ବର୍ଷ ସାଧାରଣ ବୃଷ୍ଟିପାତ ହେବ। ଆହୁରି ମଧ୍ୟ, ଚଳିତ ବର୍ଷ ଦକ୍ଷିଣ-ପଶ୍ଚିମ ମୌସୁମୀ ସମୟରେ ଉତ୍ତର-ପଶ୍ଚିମ ଭାରତ, ପଶ୍ଚିମ, ମଧ୍ୟ ଏବଂ ଉତ୍ତର-ପୂର୍ବ ଅଞ୍ଚଳରେ ସାମାନ୍ୟରୁ ନେଇ କମ ବୃଷ୍ଟିପାତ ହୋଇପାରେ। ଅନ୍ୟପକ୍ଷରେ, ଅନେକ ଅଞ୍ଚଳରେ, ପୂର୍ବ ଏବଂ ଉତ୍ତର-ପୂର୍ବ ଅଞ୍ଚଳରେ ଏବଂ ଉତ୍ତର-ପଶ୍ଚିମ ଭାରତର କେତେକ ସ୍ଥାନରେ ସାଧାରଣ ବର୍ଷା ହୋଇପାରେ।
ରବିଚନ୍ଦ୍ରନ ଆହୁରି ମଧ୍ୟ କହିଛନ୍ତି ଯେ ଚଳିତ ବର୍ଷ ଏଲ ନିନୋର ପ୍ରଭାବ ମଧ୍ୟ ଦେଖାଯିବ। ଅର୍ଥାତ ମରୁଡ଼ି ଭଳି ପରିସ୍ଥିତିର ସାମ୍ନା କରିବାକୁ ପଡିପାରେ। ସୂଚନା ଅନୁଯାୟୀ, ମୌସୁମୀ ସମୟରେ ଏଲ ନିନୋ ଅବସ୍ଥା ବିକଶିତ ହୋଇପାରେ ଏବଂ ଏହାର ପ୍ରଭାବ ମୌସୁମୀର ଦ୍ୱିତୀୟ ପର୍ଯ୍ୟାୟରେ ଅନୁଭବ କରାଯାଇପାରେ। ତଥାପି, ଏହାର ଅର୍ଥ ନୁହେଁ ଯେ କମ ବର୍ଷା ହେବ। ଗତ କିଛି ବର୍ଷ ମଧ୍ୟରେ, ଏଲ ନିନୋ ସମୟରେ ସାଧାରଣ ଏବଂ ଅଧିକ ବୃଷ୍ଟିପାତ ମଧ୍ୟ ଦେଖିବାକୁ ମିଳିଥିଲା ।
