ସନ୍ତାନଟିଏ ପାଇଁ ମା’ କେବଳ ନଅ ମାସ ଗର୍ଭରେ ଧରିବା ସହ ଯନ୍ତ୍ରଣା ସହେ ନାହିଁ, ଆବଶ୍ୟକ ପଡ଼ିଲେ ସେ ପିତାର ଦାୟିତ୍ୱ ମଧ୍ୟ ତୁଲାଇପାରେ। ଆଜିକାଲି ସମୟରେ ପରିବାର ଏବଂ ପିଲାଙ୍କୁ ଭଲ ପୋଷଣ ଦେବାରେ ମହିଳାମାନେ ପଛରେ ନାହାନ୍ତି। ପୁରୁଷପ୍ରାଧାନ୍ୟ କାମରେ ମଧ୍ୟରେ ସେମାନେ ନିଜର ଛାପ ଛାଡ଼ୁଛନ୍ତି। ଯେମିତିକି ନୋଏଡାର ଚଞ୍ଚଲ ଶର୍ମା। ସେ କୋଳରେ ବର୍ଷକର ଶିଶୁପୁତ୍ରକୁ ଧରି ଇ-ରିକ୍ସା ଚଳାନ୍ତି। ଏପରି କରି ସେ ଏବେ ଅନେକଙ୍କ ଲାଗି ପ୍ରେରଣା ସାଜିଛନ୍ତି।
ଚଞ୍ଚଳଙ୍କ ଦିନ ଆରମ୍ଭ ହୁଏ ସକାଳ ୬.୩୦ରୁ। ସେ ପୁଅକୁ କୋଳରେ ଧରି ଗାଡ଼ି ଚଳାଇ ବାହାରିପଡନ୍ତି। ପରେ ସେ ଅପରାହ୍ନରେ ଘରକୁ ଫେରି ପିଲାକୁ ଗାଧୋଇବା ସହ ଖାଇବାକୁ ଦେଇଥାନ୍ତି। ଏହାଛଡ଼ା ଭୋକ ମେଣ୍ଟାଇବା ପାଇଁ ସେ ତାଙ୍କ ସହ ଏକ ବୋତଲ କ୍ଷୀର ମଧ୍ୟ ରଖିଥାଏ। ନୋଏଡାର ସେକ୍ଟର ୫୯ରେ ଥିବା ନ୍ୟାଶନାଲ ଇନଷ୍ଟିଚ୍ୟୁଟ୍ ଅଫ୍ ବାୟୋଲୋଜିକାଲ୍ସରୁ ସେ ସେକ୍ଟର ୫୯ର ଲେବର ଚୌକ ପର୍ଯ୍ୟନ୍ତ ଇ-ରିକ୍ସା ଚଳାଇଥାନ୍ତି। ଏହି ମାର୍ଗରେ ଇ-ରିକ୍ସା ଚଳାଇବାର ସେ ହେଉଛନ୍ତି ଏକମାତ୍ର ମହିଳା। ପିଲା ସହ ତାଙ୍କର ସଂଘର୍ଷ ଦେଖି ଅନେକେ ଯାତ୍ରୀ ତାଙ୍କର ପ୍ରଶଂସା କରନ୍ତି।
ସ୍ବାମୀଙ୍କଠାରୁ ଅଲଗା ହେବା ପରେ ଚଞ୍ଚଳ ଏକାକି ଛୁଆର ଲାଳନପାଳନ କରୁଛନ୍ତି। ସେ ନିଜ ମା’ଙ୍କ ସହ ଏକ ରୁମ୍ ନେଇ ରହୁଛନ୍ତି। ଟ୍ରଲିରେ ପିଆଜ ଲଦି ମା’ ବିକ୍ରି କରିବାକୁ ଯାଉଥିବାରୁ ପିଲା କାହା ପାଖରେ ସେ ଛାଡ଼ିବେ। ଏଥିଲାଗି ସେ ନିଜ ପୁଅକୁ ସାଙ୍ଗରେ ଧରି ଇ-ରିକ୍ସା ଚଳାଇଥାନ୍ତି। ଏଥିରୁ ଦୈନିକ ସେ ୬୦୦ରୁ ୭୦୦ ଟଙ୍କା ରୋଜଗାର କରିଥାନ୍ତି। ସେଥିରୁ ୩୦୦ ଟଙ୍କା ଘରୋଇ ଏଜେନ୍ସିକୁ ଯାଏ, କାରଣ ସେଠାରୁ ତାଙ୍କୁ ଇ-ରିକ୍ସା ଲାଗି ଋଣ ମିଳିଛି। ଆଗାମୀ ଦିନରେ ତାଙ୍କ ପୁଅ ଭଲ ଶିକ୍ଷା ଗ୍ରହଣ କରୁ। ତାଙ୍କ ଭଳି ଭାଗ୍ୟ ତାର ନ ହେଉ ବୋଲି ସେ ଚାହାନ୍ତି। ସେ ବଢ଼ୁଥିବା ଦରଦାମ ତାଙ୍କ ଚିନ୍ତା ବଢ଼ାଇଦେଇଛି। ହେଲେ ସେ ସଂଘର୍ଷ ଜାରି ରଖିବେ ବୋଲି ମତ ରଖନ୍ତି।