ନୂଆଦିଲ୍ଲୀ: ପ୍ରତିବର୍ଷ ଦେଶରେ ପ୍ରାୟ ୧୦୦ ଏସିଡ ଆକ୍ରମଣ ମାମଲା ସାମ୍ନାକୁ ଆସିଥାଏ। ଏଥିରେ ପୀଡ଼ିତ ଝିଅମାନଙ୍କ ଭବିଷ୍ୟତ ଅନ୍ଧକାର ଆଡକୁ ଚାଲିଯାଇଥାଏ। ତାଙ୍କୁ ସମାଜ ସହଜରେ ଗ୍ରହଣ କରେନାହିଁ। କାରଣ ସେମାନେ ଆଖିରେ ଆଖି ମିଶାଇ କଥା ହେବା ତ ଦୂରର କଥା ସାରା ଜୀବନ ନିଜକୁ ବୋଝ ମନେକରି ମାନସିକ ଦୁଶ୍ଚିନ୍ତାରେ କାଳାତିପାତ କରନ୍ତି। ହେଲେ ସେଭଳି ଝିଅମାନଙ୍କ ଲାଗି ବରଦାନ ପାଲଟିଛି ଏକ କାଫେ। ନୋଏଡ଼ାର ସେକ୍ଟର ୨୧ରେ ଏଭଳି ଏକ କାଫେ ରହିଛି, ଯାହାକୁ ଏସିଡ୍ ଆଟାକ୍ ସର୍ଭାଇଭର୍ ଚଳାଉଛନ୍ତି।
ଉକ୍ତ କାଫେର ନାମ ‘ସିରୋଜ’। ଏପରି ନାମକରଣ ପଛରେ ‘ସି(ସେ) ଏବଂ ହିରୋଜ୍(ହିରୋମାନଙ୍କ)ର ମିଶ୍ରଣ ରହିଛି। ଏହି କାଫେକୁ ୭ରୁ ଅଧିକ ଏସିଡ୍ ଆଟାକ୍ ସର୍ଭାଇଭର୍ ମିଶି ଚଳାଉଛନ୍ତି। ସେମାନେ ଜୀବନର ସବୁଠାରୁ କଠିନ ସମୟ ସହ ଲଢ଼ି ନିଜକୁ ଶକ୍ତିଶାଳୀ କରିଛନ୍ତି। ଏବେ କିନ୍ତୁ ଝିଅମାନେ ସମସ୍ତଙ୍କ ଭଳି କଠିନ ପରିଶ୍ରମ କରି ନିଜ ଘର ଚଳାଉଛନ୍ତି।
‘ଶିରୋଜ ହ୍ୟାଙ୍ଗଆଉଟ୍’ର ପିଆର୍ଓ ଅଜୟ ତୋମାର କହିଛନ୍ତି, ଏସିଡ ଆକ୍ରମଣରୁ ବର୍ତ୍ତି ଯାଇଥିବା ଝିଅମାନଙ୍କୁ ସାହାଯ୍ୟ କରିବାରେ ନୋଏଡା ପ୍ରାଧିକରଣର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ନୋଏଡା କର୍ତ୍ତୃପକ୍ଷ ତାଙ୍କୁ ସେକ୍ଟର ୨୧ ଅଞ୍ଚଳରେ ଥିବା ଷ୍ଟାଡିୟମ୍ର ଏକ ସ୍ଥାନ ଦେଇଥିଲେ। କର୍ତ୍ତୃପକ୍ଷଙ୍କ ବ୍ୟତିତ ଛାଓଁ ଫାଉଣ୍ଡେସନ ତାଙ୍କୁ ସାହାର୍ଯ୍ୟ କରିଥିଲା। ଏହାଛଡ଼ା ସେ ବିଭିନ୍ନ ଏନ୍ଜିଓ ମାଧ୍ୟମରେ ସମୟ ସମୟରେ ସାମାଜିକ ଏବଂ ଅର୍ଥନୈତିକ ସହଯୋଗ ପାଉଛନ୍ତି।
୨୦୧୪ରେ ଆଗ୍ରାରୁ ଏହି କାଫେ ଆରମ୍ଭ ହୋଇଥିଲା। ଏହାପରେ ୨୦୧୬ରେ ଲକ୍ଷ୍ନୌ, ୨୦୨୧ରେ ନୋଏଡାରେ ଅନ୍ୟ କାଫେ ଖୋଲାଯାଇଥିଲା। ନୋଏଡାରେ କାଫେ ଚଳାଉଥିବା ସର୍ଭାଇଭର୍ଙ୍କ ମଧ୍ୟରେ ହରିୟାଣାର ରିତୁ, ୟୁପିର ନଗମା, ଓଡ଼ିଶାର ମାନିନି ପ୍ରମୁଖ ଅଛନ୍ତି। ତେବେ ଏହି କାଫେର ଅନ୍ୟତମ ପ୍ରତିଷ୍ଠାତା ଆଶିଷ ଶୁକ୍ଳା କହିଛନ୍ତି, ଏସିଡ ଆକ୍ରମଣରେ ସର୍ଭାଇଭ୍ କରିଥିବା ଲୋକଙ୍କ ପାଇଁ ସରକାରଙ୍କ ପୃଥକ ଯୋଜନା ରହିବା ଆବଶ୍ୟକ। ଘଟଣା ପରେ ପୀଡ଼ିତାଙ୍କୁ ସଠିକ୍ ପରାମର୍ଶ, ଅଧ୍ୟୟନ ଏବଂ ଭବିଷ୍ୟତ ବିଷୟରେ ଆଲୋଚନା କରାଯିବା ଉଚିତ। ଏହାଛଡ଼ା ପ୍ରଶାସନ ପକ୍ଷରୁ ସମୟ ସମୟରେ ବଜାରରେ ଏସିଡର ଯାଞ୍ଚ କରିବା ଉଚିତ ବୋଲି ସେ କହିଛନ୍ତି।