କଟକ ଅଫିସ,୧୫।୧୧-କଟକ ମଧୁସୂଦନ ସେତୁ ନିକଟ ମହାନଦୀରୁ ଓଲିଉଡ୍ର ଅଭିନେତା ଅମ୍ଳାନ ଦାସଙ୍କ ସ୍ତ୍ରୀ ଭୂମିକାଙ୍କୁ ଉଦ୍ଧାର କରାଯାଇଛି। ପରେ ମେଡିକାଲରେ ତାଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ସିଡିଏ ଫେଜ୍-୨ ଥାନାକୁ ଆଣି ପଚରାଉଚରା କରାଯାଇଛି। ତାଙ୍କ ସ୍ବାସ୍ଥ୍ୟାବସ୍ଥା ଠିକ୍ ଥିବା ଫେଜ୍-୨ ଥାନାଧିକାରୀ ବିଜୟିନୀ ସିଂ ସୂଚନା ଦେଇଛନ୍ତି। ତେବେ ଏହା ଦୁର୍ଘଟଣା ନା ଅନ୍ୟ କିଛି କାରଣ ତାହାକୁ ନେଇ ପୋଲିସ ତଦନ୍ତ ଚଳାଇଛି।
ମିଳିଥିବା ସୂଚନା ଅନୁଯାୟୀ, ରବିବାର ଅପରାହ୍ନରେ ଭୂମିକା ପୂଜା ସାମଗ୍ରୀ ବିସର୍ଜନ କରିବାକୁ ମହାନଦୀର ମଧୁସୂଦନ ସେତୁ ନିକଟକୁ ଯାଇଥିଲେ। ସେଠାରେ ସାମଗ୍ରୀ ବିସର୍ଜନ କରୁଥିବାବେଳେ ମହାନଦୀକୁ ଖସି ପାଣିରେ ଭାସି ଯାଇଥିଲେ। ଖବରପାଇ ପୋଲିସ ଓ ସ୍ଥାନୀୟ ଲୋକଙ୍କ ସହାୟତାରେ ଭୂମିକାଙ୍କୁ ପାଣିରୁ ଉଦ୍ଧାର କରାଯାଇଥିଲା। ପରେ ତାଙ୍କର ସ୍ବାସ୍ଥ୍ୟ ପରୀକ୍ଷା ଲାଗି ମେଡିକାଲରେ ଭର୍ତ୍ତି କରାଯାଇଥିଲା। ଏହା ପରେ ଭୂମିକା ଓ ଅମ୍ଳାନ ଥାନାକୁ ଯାଇଥିଲେ। ଏ ସମ୍ପର୍କରେ ଅମ୍ଳାନ କହିଛନ୍ତି, ଏହା ଏକ ଦୁର୍ଘଟଣା। ପୋଲ ଉପରେ ପୂଜା ସାମଗ୍ରୀ ବିସର୍ଜନ ବେଳେ ଅସାବଧାନତାବଶତଃ ଗୋଡ଼ ଖସିଯିବାରୁ ଭୂମିକା ମହାନଦୀକୁ ଖସିପଡ଼ିଥିଲେ। ଏ ନେଇ ପୋଲିସକୁ ଖବର ଦିଆଯାଇଥିଲା। ପୋଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ଉଦ୍ଧାର କରିଥିଲା।