ନୂଆଦିଲ୍ଲୀ, ୧୧।୭- ଭାରତୀୟ କ୍ରିକେଟ୍ ଦଳର ପୂର୍ବତନ ଉଇକେଟ୍କିପର ବ୍ୟାଟ୍ସମ୍ୟାନ କିରନ ମୋରେଙ୍କୁ ଏକଦା ଗୋଟିଏ ଟେଷ୍ଟ ମ୍ୟାଚ୍ ସମୟରେ ପାକିସ୍ତାନର ସଲିମ୍ ମଲିକ ବ୍ୟାଟ୍ରେ ବାଡ଼େଇବା ପାଇଁ ଉଦ୍ୟମ କରିଥିଲେ। ୧୯୮୯ରେ କରାଚୀର ନ୍ୟାଶନାଲ ଷ୍ଟାଡିୟମରେ ଭାରତ ଓ ପାକିସ୍ତାନ ମଧ୍ୟରେ ଖେଳାଯାଇଥିବା ଟେଷ୍ଟ ମ୍ୟାଚ୍ରେ ଏହି ଅଘଟଣ ଘଟିଥିଲା। ମ୍ୟାଚ୍ ସମୟରେ ମୋରେ ଏମିତି କେଉଁ କଥା କହିଥିଲେ ଯେଉଁଥିରେ ସଲିମ୍ ରାଗିଯାଇ ଧମକ ଦେବା ସହ ବ୍ୟାଟ୍ରେ ବାଡ଼େଇବା ପାଇଁ ଉଦ୍ୟମ କରିଥିଲେ। ଏହି ଘଟଣାକୁ ମନେ ପକାଇ ଏକ କାର୍ଯ୍ୟକ୍ରମ ଅବସରରେ ମୋରେ କହିଛନ୍ତି, ‘ଯେବେବି ଭାରତ ଓ ପାକିସ୍ତାନ ମଧ୍ୟରେ ମ୍ୟାଚ୍ ଖେଳା ଯାଇଥାଏ ସେତେବେଳେ ସ୍ଲେଜିଂ ହୋଇଥାଏ। ୧୯୮୯ରେ ଆମେ ପାକିସ୍ତାନ ଗସ୍ତରେ ଯାଇଥିବାବେଳେ କରାଚୀରେ ଅନୁଷ୍ଠିତ ଟେଷ୍ଟରେ ମୁଁ ସଲିମ ମଲିକଙ୍କୁ ସ୍ଲେଜିଂ କରିଥିଲି। ଯାହା ଫଳରେ ସେ ମୋତେ ବ୍ୟାଟ୍ରେ ବାଡ଼େଇବା ପାଇଁ ଉଦ୍ୟମ କରିଥିଲେ। ପଞ୍ଜାବୀ ଭାଷାରେ ମୁଁ ତାଙ୍କୁ ଗୋଟିଏ ବହୁତ ଖରାପ କଥା କହିଥିଲି। ପଞ୍ଜାବୀ ଏମିତି ଏକ ଭାଷା ଯାହା ଆମ ପାଇଁ ସରଳ ଥିଲା। ବାସ୍ତବରେ ଦେଖିବାକୁ ଗଲେ ଏହା ଏକ ମଜାଦାର ଘଟଣା ଥିଲା। ମୁଁ ଭାବୁଛି ଯଦି ସେ ସମୟରେ ଷ୍ଟମ୍ପ୍ସରେ ମାଇକ୍ରୋଫୋନ ଲାଗିଥାନ୍ତା ତେବେ ଏହା ସମସ୍ତଙ୍କ ପାଇଁ ମଜାଦାର ରହିଥାନ୍ତି। ଏହି ମ୍ୟାଚ୍ ମଧ୍ୟ ଆଉ ଏକ ଦୃଷ୍ଟିରୁ ସ୍ମରଣୀୟ ହୋଇ ରହିଛି। ଭାରତୀୟ କ୍ରିକେଟ୍ ଦଳର କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଳକର ଓ ପାକିସ୍ତାନର ଓ୍ବାକର ୟୁନିସ ଏହି ମ୍ୟାଚ୍ ଜରିଆରେ ସେମାନଙ୍କ ଟେଷ୍ଟ କ୍ୟାରିୟର ଆରମ୍ଭ କରିଥିଲେ।