ନୂଆଦିଲ୍ଲୀ, ୫।୭- ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ ଲିଗ୍ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ଖେଳିବା ଲାଗି ସବୁ ଖେଳାଳିଙ୍କ ସ୍ବପ୍ନ ରହିଥାଏ। ଆଇପିଏଲ୍ ଖେଳିବା ଦ୍ୱାରା ଅନେକ ଖେଳାଳିଙ୍କ ଜୀବନରେ ପରିବର୍ତ୍ତନ ଆସିଛି। ଆଇପିଏଲ୍ର ଗତ ଖେଳାଳି ନିଲାମୀରେ ସର୍ବାଧିକ ମୂଲ୍ୟରେ କ୍ରୟ ହୋଇଥିବା ଅଷ୍ଟ୍ରେଲିଆ ଦ୍ରୁତ ବୋଲର ପ୍ୟାଟ୍ କୁମିନ୍ସ କିନ୍ତୁ ୬ ମାସରେ ତାଙ୍କ ଜୀବନରେ କୌଣସି ପରିବର୍ତ୍ତନ ହୋଇ ନ ଥିବା କହିଛନ୍ତି। ଆଇପିଏଲ୍ ଗତ ଖେଳାଳି ନିଲାମୀରେ କୋଲକାତା ନାଇଟ୍ ରାଇଡର୍ସ କୁମିନ୍ସଙ୍କୁ ୧୫.୫ କୋଟି ଟଙ୍କା ମୂଲ୍ୟରେ କ୍ରୟ କରିଥିଲା। ଫଳରେ ଆଇପିଏଲ୍ ଇତିହାସରେ ସେ ସବୁଠାରୁ ମହଙ୍ଗା ଖେଳାଳି ହେବାର କୀର୍ତ୍ତିମାନ କରିଥିଲେ। ଏତେ ପରିମାଣର ରାଶିରେ ନିଲାମୀ ହୋଇଥିବା ନେଇ କୁମିନ୍ସକୁ ନିକଟରେ ଏକ ସାକ୍ଷାତ୍କାର ଅବସରରେ ଯେତେବେଳେ ପଚରାଗଲା ସେ କହିଥିଲେ, ‘ମୋତେ ଲାଗୁଛି ମୋ ଜୀବନରେ କିଛି ପରିବର୍ତ୍ତନ ଆସିନାହିଁ। ପ୍ରତ୍ୟେକ ମ୍ୟାଚ୍ରେ ମୋର ସର୍ବଶ୍ରେଷ୍ଠ ପ୍ରଦର୍ଶନ ଦେବାକୁ ଚେଷ୍ଟା କରୁଛି। ଏଥିସହ ସଫଳତା ଓ ବିଫଳତା ଯେମିତି ମୋ ଜୀବନ ଉପରେ ଅଧିକ ପ୍ରଭାବ ନ ପକାଏ ସେଥିପ୍ରତି ଧ୍ୟାନ ଦେଉଛି। ନିଲାମୀରେ ଏତେ ପରିମାଣର ରାଶି ମିଳିବାର ଖୁସି ଏବେ ମଧ୍ୟ ରହିଛି। ସମ୍ଭବତଃ ଯେତେବେଳେ ଆଇପିଏଲ୍ ଖେଳିବା ଲାଗି ଯିବି ସେତେବେଳେ ଏହି ଭାବନାକୁ ଛାଡ଼ିପାରିବି’ ବୋଲି କୁମିନ୍ସ କହିଛନ୍ତି। କୁମିନ୍ସ ଅଷ୍ଟ୍ରେଲିଆ ପକ୍ଷରୁ ୩୦ ଟେଷ୍ଟ ମ୍ୟାଚ୍ ଖେଳି ୨୧.୮୨ ପ୍ରତିଶତରେ ୧୪୩ ଉଇକେଟ୍ ହାସଲ କରିଛନ୍ତି।