ନୂଆଦିଲ୍ଲୀ, ୧୬।୮: ପୂର୍ବତନ ଭାରତୀୟ କ୍ରିକେଟର୍ ତଥା ଉତ୍ତର ପ୍ରଦେଶ ସରକାରରେ କ୍ୟାବିନେଟ୍ ମନ୍ତ୍ରୀ ରହିଥିବା ଚେତନ ଚୌହାନଙ୍କ ପରଲୋକ ଘଟିଛି। ମୃତ୍ୟୁବେଳକୁ ତାଙ୍କୁ ୭୩ ବର୍ଷ ହୋଇଥିଲା। ଗତ ମାସରେ କରୋନା ଆକ୍ରାନ୍ତ ହୋଇ ଚେତନ ଚିକିତ୍ସାଧୀନ ରହିଥିଲେ। କିନ୍ତୁ ଶୁକ୍ରବାର ତାଙ୍କର କିଡ୍ନୀ ଓ ବ୍ଲଡପ୍ରେସର ସମସ୍ୟା ମଧ୍ୟ ଦେଖା ଦେଇଥିଲା। ଏହି କାରଣରୁ ଶନିବାର ତାଙ୍କୁ ଗୁରୁଗ୍ରାମସ୍ଥିତ ମେଦାନ୍ତ ହସ୍ପିଟାଲରେ ଭେଣ୍ଟିଂଲେଟର ମଧ୍ୟରେ ରଖାଯାଇଥିଲା। କିନ୍ତୁ ରବିବାର ଅପରାହ୍ନରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ।
ଜୁଲାଇ ୧୯୪୭ରେ ଉତ୍ତର ପ୍ରଦେଶର ବରେଲୀରେ ଜନ୍ମଗ୍ରହଣ କରିଥିବା ଚେତନ ୧୯୬୯ରେ ତାଙ୍କ ଅନ୍ତର୍ଜାତୀୟ କ୍ରିକେଟ୍ କ୍ୟାରିୟର ଆରମ୍ଭ କରିଥିଲେ। ନ୍ୟୁଜିଲାଣ୍ଡ ବିପକ୍ଷରେ ସେ ନିଜର ପ୍ରଥମ ଟେଷ୍ଟ ମ୍ୟାଚ୍ ଖେଳିଥିଲେ। ଏହି ଡାହାଣହାତୀ ବ୍ୟାଟ୍ସମ୍ୟାନ ଭାରତ ପକ୍ଷରୁ ୪୦ ଟେଷ୍ଟ ଓ ୭ଟି ଦିନିକିଆ ମ୍ୟାଚ୍ ଖେଳିଛନ୍ତି। ଚେତନଙ୍କ ନାମରେ ଏକ ବିରଳ ରେକର୍ଡ ବହୁ ବର୍ଷ ଧରି ରହିଥିଲା। ବିଶ୍ୱର ପ୍ରଥମ ବ୍ୟାଟ୍ସମ୍ୟାନ ଭାବେ ସେ ବିନା ଶତକରେ ଟେଷ୍ଟରେ ୨ ହଜାର ରନ୍ ସଂଗ୍ରହ କରିଥିଲେ। ଏହି ତାଲିକାରେ ସେ ବର୍ତ୍ତମାନ ୨ୟ ସ୍ଥାନରେ ରହିଛନ୍ତି। ଚୌହାନ ୪୦ ଟେଷ୍ଟ ମ୍ୟାଚ୍ ଖେଳି ୨,୦୮୪ ରନ ସଂଗ୍ରହ କରିଛନ୍ତି। ଏହା ମଧ୍ୟରେ ୧୬ ଅର୍ଦ୍ଧଶତକ ରହିଛି। ଟେଷ୍ଟର ତାଙ୍କର ସର୍ବାଧିକ ସ୍କୋର ୯୭ ରହିଛି। ତେବେ ଚୌହାନଙ୍କ ଏହି ରେକର୍ଡକୁ ଅଷ୍ଟ୍ରେଲୀୟ କ୍ରିକେଟର୍ ସେନ୍ ଓ୍ବର୍ନ ଭାଙ୍ଗିଥିଲେ। ଓ୍ବର୍ନ ୧୯୯୨ରୁ ୨୦୦୭ ପର୍ଯ୍ୟନ୍ତ ୧୪୫ ଟେଷ୍ଟ ମ୍ୟାଚ୍ ଖେଳି ୩,୧୫୪ ରନ ସଂଗ୍ରହ କରିଛନ୍ତି। ୯୯ ରନ ତାଙ୍କର ଟେଷ୍ଟରେ ସର୍ବାଧିକ ବ୍ୟକ୍ତିଗତ ସ୍କୋର।