ଲଣ୍ଡନ,୧।୯: ଆଜିଠାରୁ ଓଭାଲରେ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷ ଚତୁର୍ଥ ଟେଷ୍ଟ ପୂର୍ବରୁ ଲିଡ୍ସରେ ଲଜ୍ଜାଜନକ ପରାଜୟ ବିଷୟରେ ଚିନ୍ତା କରିବା ପରିବର୍ତ୍ତେ ଲର୍ଡସ ମ୍ୟାଚ୍ ବିଜୟରୁ ପ୍ରେରଣା ନେବାକୁ ରବି ଶାସ୍ତ୍ରୀ କହିଛନ୍ତି। ଶାସ୍ତ୍ରୀ ସ୍ବୀକାର କରିଛନ୍ତି ଯେ, ତୃତୀୟ ଟେଷ୍ଟର ପ୍ରଥମ ଦିନରେ ୭୮ ରନରେ ଅଲଆଉଟ୍ ହେବା ନିର୍ଣ୍ଣାୟକ ପ୍ରମାଣିତ ହୋଇଥିଲା କିନ୍ତୁ ସିରିଜ ଜିତିବା ସମ୍ଭବ ବୋଲି କହିଛନ୍ତି। ତାଙ୍କ ପୁସ୍ତକ ‘ଷ୍ଟାରଗେଜିଂ’ର ପ୍ରମୋଶନ ବେଳେ କହିଛନ୍ତି, ଏହା ବହୁତ ସରଳ। ଭେଳାଳି କେବଳ ଲର୍ଡସ ଟେଷ୍ଟ ବିଷୟରେ ଭାବନ୍ତୁ, ଶେଷ ମ୍ୟାଚ ଭୁଲିଯାଅ। ମୁଁ ଜାଣେ ଏହା କହିବା ସହଜ କିନ୍ତୁ ଭଲ ମୁହୂର୍ତ୍ତଗୁଡ଼ିକୁ ମଧ୍ୟ ମନେ ରଖିବା ଉଚିତ୍। ଏହି ସବୁ ଖେଳରେ ଘଟେ। ଶାସ୍ତ୍ରୀ ଇଂଲଣ୍ଡକୁ ଚେତାବନୀ ଦେଇ କହିଛନ୍ତି ଯେ, ବିରାଟ କୋହଲି ଏବଂ ତାଙ୍କ ଦଳକୁ ହାଲୁକା ଭାବେ ନେବାରେ କେହି ଭୁଲ କରିବା ଉଚିତ୍ ନୁହେଁ। ସେ କହିଛନ୍ତି, ସିରିଜ ଏବେ ୧-୧ ସ୍ଥିତିରେ ଅଛି ଏବଂ ଆମେ ବିଦେଶରେ ଖେଳୁଛୁ। ଇଂଲଣ୍ଡ ଉପରେ ଚାପ ରହିଛି, ସେମାନଙ୍କୁ ନିଜ ଦେଶରେ ଜିତିବାକୁ ପଡିବ। ଆମକୁ ଭଲ କରିବାକୁ ପଡିବ ବୋଲି ସେ କହିଛନ୍ତି।
ସୂଚନାଯୋଗ୍ୟ ଯେ, ଇଂଲଣ୍ଡ ବିପକ୍ଷ ଚତୁର୍ଥ ଟେଷ୍ଟରେ ଟିମ ଇଣ୍ଡିଆର ଖେଳୁଥିବା ଏକାଦଶରେ ପରିବର୍ତ୍ତନ ହୋଇପାରେ। ଏକାଦଶ ଖେଳିବାରେ ଭାରତୀୟ ଦଳ ଆର ଅଶ୍ୱିନଙ୍କୁ ଏକ ସୁଯୋଗ ଦେଇପାରେ। ଏଥି ସହିତ ଜଣେ ଦ୍ରୁତ ବୋଲରଙ୍କୁ ଦଳରୁ ବାଦ୍ ଦିଆଯାଇପାରେ। ଇଶାନ୍ତ ଶର୍ମାଙ୍କୁ ବିଶ୍ରାମ ଦିଆଯାଇପାରେ ବୋଲି ଖବର ରହିଛି।
