ତାରୌବା,୨୮।୭(ଏପି): ଆସନ୍ତା ମାସରୁ ଆରମ୍ଭ ହେବାକୁ ଯାଉଛି ୩୩ ମ୍ୟାଚ୍ ବିଶିଷ୍ଟ କାରିବିୟାନ ପ୍ରିମିୟର ଲିଗ୍ (ସିପିଏଲ୍) ଟୁର୍ନାମେଣ୍ଟ। ଗତଥରର ଚାମ୍ପିୟନ ବାର୍ବାଡୋସ ଟ୍ରାଇଡେଣ୍ଟ ଓ ସେଣ୍ଟ କିଟ୍ସ ଉଦ୍ଘାଟନୀ ମ୍ୟାଚ୍ରେ ମୁହଁାମୁହିଁ ହେବେ। ସେହିପରି ନେଭିସ୍ ପାଟ୍ରିଅଟ୍ସ, ଗୟନା ଆମାଜନ ଓ୍ବାରିୟର୍ସ ଓ ଟ୍ରିନିବାଗୋ ନାଇଟ୍ ରାଇଡର୍ସ ମଧ୍ୟ ମୁକାବିଲାରେ ଅବତୀର୍ଣ୍ଣ ହେବେ। ଅଗଷ୍ଟ ୧୮ରୁ ଆରମ୍ଭ ହୋଇ ଏହି ଟୁର୍ନାମେଣ୍ଟ ସେପ୍ଟେମ୍ବର ୧୦ ତାରିଖରେ ଶେଷ ହେବ। ତ୍ରିନିଦାଦ ଓ ଟବାଗୋର ଦୁଇଟି ଭେନ୍ୟୁ ମ୍ୟାଚ୍ ଆୟୋଜନ ହେବ ବୋଲି ସିପିଏଲ୍ ମୁଖ୍ୟ କାର୍ଯ୍ୟନିର୍ବାହୀ ଡାମିଏନ ଓ’ଡୋନୋହୋଏ କହିଛନ୍ତି। ତାରୌବାସ୍ଥିତ ବ୍ରାଏନ୍ ଲାରା କ୍ରିକେଟ ଏକାଡେମୀରେ ୨୩ଟି ମ୍ୟାଚ୍ ଆୟୋଜନ ହେବ। ଏଥିରେ ଦୁଇଟି ସେମିଫାଇନାଲ ଓ ଫାଇନାଲ ମ୍ୟାଚ୍ ସାମିଲ ରହିଛି। ସେହିପରି ପୋର୍ଟ ଅଫ୍ ସ୍ପେନ୍ରେ ୧୦ଟି ମ୍ୟାଚ୍ ଖେଳାଯିବ।
ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ଖେଳି ଓ୍ବେଷ୍ଟଇଣ୍ଡିଜ ଖେଳାଳିମାନେ ସ୍ବଦେଶ ଫେରିବା ପରେ ଟି୨୦ ଖେଳିବା ପାଇଁ ପ୍ରସ୍ତୁତି କରିବେ। ଫାଙ୍କା ଷ୍ଟାଡିୟମ ତଥା ଜୈବ ସୁରକ୍ଷିତ ପରିବେଶରେ ସିପିଏଲ୍ର ୬ଟି ଦଳ ମ୍ୟାଚ୍ରେ ଅବତୀର୍ଣ୍ଣ ହେବେ। କୋଭିଡ୍-୧୯ ମହାମାରୀର ପ୍ରକୋପ ଜାରି ରହିଥିବା ବେଳେ କଡ଼ାକଡ଼ି ଭାବେ ସବୁ ପ୍ରେଟୋକଲ ଅନୁଯାୟୀ ମ୍ୟାଚ୍ ଆୟୋଜନ ହେବ। ସିପିଏଲ୍ ଦେଖିବାକୁ କ୍ରିକେଟ ପ୍ରଶଂସକମାନେ ବେଶ୍ ଉତ୍ସାହର ସହିତ ଅପେକ୍ଷା କରିଛନ୍ତି। କୋଭିଡ୍-୧୯ ଯୋଗୁ ସାରା ବିଶ୍ୱରେ କ୍ରୀଡ଼ା ଠପ୍ ହେବା ପରେ ବିଶ୍ୱରେ ପ୍ରଥମ ଟି୨୦ ଟୁର୍ନାମେଣ୍ଟ ଭାବେ ସିପିଏଲ୍ ଆୟୋଜନ ହେବାକୁ ଯାଉଛି ବୋଲି ଓ’ଡୋନେହୋଏ କହିଛନ୍ତି।