କଟକ ଅଫିସ,୨୭।୭: ଥାନାକୁ ଯିବା ଆଉ ଦରକାର ପଡ଼ିବ ନାହିଁ। ଏବେ ହ୍ବାଟ୍ସଆପ୍ ନମ୍ବରରେ ଅଭିଯୋଗ କରିହେବ। ପ୍ରଦତ୍ତ ନମ୍ବରରେ ମେସେଜ କଲେ ପୋଲିସ ତଦନ୍ତ ଆରମ୍ଭ କରିବ। ଏଭଳି ଏକ ଭିନ୍ନ ପ୍ରୟାସ ଆରମ୍ଭ କରିଛି କଟକ ପୋଲିସ। ଡିସିପି ପ୍ରତୀକ ସିଂଙ୍କ ଦ୍ୱାରା ଉକ୍ତ କାର୍ଯ୍ୟକ୍ରମ ରବିବାରଠାରୁ ଚାଲୁ କରାଯାଇଛି। କରୋନା ଭୟ ଯୋଗୁ ଥାନା ଭିତରକୁ ପ୍ରବେଶ ନିଷେଧ ସହ ଲୋକେ ଥାନା ବାହାରେ ଏତଲା ଦେଉଥିଲେ। ଏହାର ବିକଳ୍ପ ବାଟ ଭାବେ କଟକ ପୋଲିସ ଏକ ମୋବାଇଲ ନମ୍ବର ଜାରି କରିଛି। ନମ୍ବରଟି ହେଲା ୮୭୬୩୦୬୮୧୬୭। ଏହି ନମ୍ବରକୁ ଖୋଦ୍ ଡିସିପି ପ୍ରତୀକ ସିଂ ବ୍ୟବହାର କରୁଛନ୍ତି। ନିଜ ଅଞ୍ଚଳର କୌଣସି ଘଟଣାର ଭିଡିଓ କିମ୍ବା ଅଭିଯୋଗ ମେସେଜ କଲେ ପୋଲିସ ନିଜ ପକ୍ଷରୁ ତଦନ୍ତ ଆରମ୍ଭ କରିବ। ନମ୍ବର ଘୋଷଣା ହେବା ପରଠାରୁ ୪ଟି ଅଭିଯୋଗ ଆସିଛି।
